Loko Lesingakufundza Emavini Ekugcina AJakobe Lasiphrofetho​—Incenye 1

1-2. Yini Jakobe layenta nasekatawufa, futsi ngasiphi sizatfu? (Buka nesitfombe lesisekhasini lekucala.)

SEKUPHELE iminyaka lengu-17 kusukela Jakobe losikhonti saJehova lesetsembekile esuka eKhenani waya eGibhithe nemndeni wakhe. (Gen. 47:28) Kuleso sikhatsi, ujabule kakhulu ngekuphindze abe nendvodzana yakhe layitsandzako, lokunguJosefa, futsi ekugcineni abone umndeni wakhe uphindze uba ndzawonye. Kodvwa nyalo Jakobe uyabona kutsi sewutawufa. Ngako ubita umhlangano lobalulekile wemndeni.​—Gen. 49:28.

² Ngalawo malanga, bekuvamile kutsi nangabe inhloko yemndeni seyitawufa ibite emalunga emndeni wayo kuze iwatjele emavi ekugcina. (Isa. 38:1) Kulowo mhlangano, beyingaphindze ivete kutsi ngubani lotawuba yinhloko yalomndeni.

3. Ngekusho kwaGenesisi 49:1, 2, yini leyenta emavi aJakobe abaluleke kakhulu?

³ Fundza Genesisi 49:1, 2. Kodvwa lona bekungasiwo nje umhlangano wemndeni lovamile. Jakobe bekangumphrofethi. Kulomhlangano, Jehova waphefumulela lenceku yakhe kutsi ikhulume ngetintfo letibalulekile lebetitawenteka esikhatsini lesitako lebetitasitsintsa kakhulu situkulwane sakhe. Kungako emavi akhe kuhle kutsiwa ngemavi ekugcina aJakobe lasiphrofetho.

4. Ngusiphi siphrofetho Jakobe lasisho, futsi sifundzani kuloko lakusho? (Buka nelibhokisi lelitsi “Umndeni WaJakobe.”)

⁴ Kulesihloko, sitawucoca ngaloko Jakobe lakutjela emadvodzana akhe lamane: lokunguRubeni, Simeyoni, Levi naJuda. Esihlokweni lesilandzelako, sitawucoca ngemavi lawatjela lalamanye emadvodzana akhe langu-8. Njengobe sitawubona, Jakobe akagcinanga nje ngekukhuluma ngaloko lokutawenteka kulamadvodzana akhe, kodvwa wakhuluma nangaloko lokutawenteka esitukulwaneni sawo lebesitawuba sive saka-Israyeli. Kuhlola umlandvo walesive kutasisita sibone kutsi emavi aJakobe lasiphrofetho agcwaliseka njani. Ngetulu kwaloko, nasihlolisisa lamavi akhe, sitawufundza tifundvo letibalulekile letitasisita kutsi sijabulise Babe wetfu wasezulwini, lokunguJehova.

RUBENI

5. Yini lokungenteka Rubeni bekalindzele kuyitfola kubabe wakhe?

⁵ Jakobe wacale wakhuluma naRubeni watsi: “Ungumntfwana wami wekucala.” (Gen. 49:3) Njengobe Rubeni awekucala, kungenteka bekalindzele kutsi utawutfola tintfo letiphindvwe kabili kunaleto betitawutfolwa bomnakabo. Kungenteka nekutsi bekalindzele kutsi besekutawuba nguye inhloko yalomndeni ngemuva kwekushona kwababe wakhe, nekutsi bekutawuhlale kunalovela esitukulwaneni sakhe loyinhloko yalomndeni.

6. Yini leyenta Rubeni wangalitfoli lifa lelitfolwa ngumntfwana wekucala? (Genesisi 49:3, 4)

⁶ Nobe kunjalo, Rubeni akazange alitfole lifa lelitfolwa ngumntfwana wekucala. (1 Khr. 5:1) Ngasiphi sizatfu? Eminyakeni lengaphambili, Rubeni walala nemfati lomncane waJakobe lokunguBilha. Bilha bekasisebenti saRakheli umfati waJakobe lamtsandzako lebesekashonile. (Gen. 35:19, 22) Rubeni bekangumntfwana waLeya, longulomunye umfati waJakobe. Kungenteka Rubeni bekaphetfwe yinkhanuko. Nobe kungenteka bekangafuni kutsi Jakobe atsandze kakhulu Bilha kwendlula make wakhe. Kunobe ngukuphi, loko lakwenta bekukubi kakhulu kuJehova nakubabe wakhe.​—Fundza Genesisi 49:3, 4.

7. Yini leyenteka kuRubeni nasesitukulwaneni sakhe? (Buka nelibhokisi lelitsi “Emavi Ekugcina AJakobe Lasiphrofetho.”)

⁷ Jakobe watjela Rubeni watsi: “Ngeke ube mkhulu.” Lamavi agcwaliseka. Kute eBhayibhelini lasifundza khona kutsi ukhona umuntfu esitukulwaneni sakhe lowaba yinkhosi, umphristi nobe umphrofethi. Nobe kunjalo, Jakobe akazange ayilahle lendvodzana yakhe futsi situkulwane sayo saba sive ka-Israyeli. (Josh. 12:6) Tikhona tikhatsi lapho khona Rubeni akhombisa buntfu lobuhle, futsi kute lasifundza khona kutsi waphindze watiphatsa kabi.​—Gen. 37:20-22; 42:37.

8. Ngutiphi tifundvo lesingatifundza esibonelweni saRubeni?

⁸ Yini lesingayifundza? Kufanele sisebente kamatima kuze sitibambe futsi sigweme kutiphatsa kabi. Nakwenteka silingeka kutsi sente sono, kufanele sime, sicabange ngendlela loko lesitakwenta lokutamvisa ngayo buhlungu Jehova, umndeni wetfu nobe labanye. Kufanele sikhumbule nekutsi “nobe yini umuntfu layihlanyelako, utawuvuna yona futsi.” (Gal. 6:7) Ngakulokunye, loko lokwenteka kuRubeni kusikhumbuta kutsi Jehova unemusa. Ngisho nobe angeke asivikele kutsi sibhekane nemiphumela yemaphutsa etfu, kodvwa utasibusisa nasetama kamatima kwenta lokulungile.

SIMEYONI NALEVI

9. Yini leyenta Jakobe wangajabuli ngaSimeyoni naLevi? (Genesisi 49:5-7)

⁹ Fundza Genesisi 49:5-7. Ngemuva kwaloko Jakobe wabese ukhuluma naSimeyoni naLevi, futsi loko lakusho kwakhombisa kutsi bekangajabuli ngabo. Eminyakeni lengaphambili, Dina indvodzakati yaJakobe wadlengulwa ngulenye indvodza lengumKhenani lokutsiwa nguShekhemu. Onkhe emadvodzana aJakobe atfukutsela kakhulu ngaloko bekwenteke kusisi wawo, kube kufanele, kodvwa boSimeyoni naLevi baba neludlame. Ngebucili, betsembisa emadvodza aseShekhemu kutsi batawakha kuthula nawo nangabe onkhe atawusoka. Lamadvodza avuma. Ngesikhatsi lamadvodza asetinhlungwini ngenca yekusoka, boSimeyoni naLevi “batsatsa tinkemba tabo bangena kulelidolobha kungakalindzeli muntfu futsi babulala bonkhe bantfu labadvuna.”​—Gen. 34:25-29.

10. Sagcwaliseka njani siphrofetho saJakobe lesimayelana naSimeyoni naLevi? (Buka nelibhokisi lelitsi “Emavi Ekugcina AJakobe Lasiphrofetho.”)

¹⁰ Jakobe bekatfukutsele kakhulu ngekutsi emadvodzana akhe bekabulele bantfu labanyenti kangaka. Waphrofetha kutsi bebatawusakateka kulo lonkhe laka-Israyeli. Lesiphrofetho sagcwaliseka ngemuva kweminyaka lengetulu kwalengu-200 ngesikhatsi sive sema-Israyeli singena eVeni Lesetsembiso. Lifa lesive sakaSimeyoni belisakateke endzaweni lelifa lesive sakaJuda. (Josh. 19:1) Lifa lesive sakaLevi bekungemadolobha langu-48 lasakateke kulo lonkhe laka-Israyeli.​—Josh. 21:41.

11. Ngutiphi tintfo letinhle letentiwa sive sakaSimeyoni nesive sakaLevi?

¹¹ Situkulwane saSimeyoni naLevi asizange siwente emaphutsa lentiwa bokhokho baso. Sive sakaLevi sakhombisa kutsi bekuta kucala kuso kukhonta lokuhlantekile. Ngesikhatsi Mosi atfola uMtsetfo kuJehova eNtsabeni iSinayi, ema-Israyeli lamanyenti akhonta sithico selitfole kodvwa emaLevi asekela Mosi futsi amsita ekususeni lobubi. (Eks. 32:26-29) Jehova watikhetsela sive sakaLevi, futsi wasinika umsebenti lokhetsekile webuphristi ka-Israyeli. (Eks. 40:12-15; Num. 3:11, 12) Ngekuhamba kwesikhatsi, sive sakaSimeyoni sasekela sive sakaJuda nasilwa nemaKhenani kuze sitsatse live lawo eVeni Lesetsembiso, ngekuvumelana nanjongo yaJehova​—Khu. 1:3, 17.

12. Ngutiphi tifundvo lesingatifundza esibonelweni saSimeyoni naLevi?

¹² Yini lesingayifundza? Ungavumeli intfukutselo ilawule tincumo takho naloko lokwentako. Kungulokuvamile kutsi utfukutsele nangabe wena nobe umuntfu lomtsandzako aphatfwa kabi. (Hla. 4:4) Kodvwa kufanele ukhumbule kutsi Jehova akawemukeli emavi nobe tento letikhombisa kutsi utfukutsele kakhulu. (Jak. 1:20) Sitabaphatsa ngendlela lehambisana netimiso teliBhayibheli labo labasiphatsa kabi, lokungenteka baboFakazi nobe abasibo, ngaleyondlela sigweme umonakalo lobangelwa yintfukutselo lengakalawulwa. (Rom. 12:17, 19; 1 Phet. 3:9) Ngisho nobe batali bakho benta tintfo letingamjabulisi Jehova, khumbula kutsi akukafaneli usilingise sibonelo sabo. Ungacabangi kutsi ngeke kwenteke umjabulise Jehova nekutsi angeke usitfole sibusiso sakhe. Jehova utakusita kutsi wente lokulungile futsi utakubusisa ngekwenta njalo.

JUDA

13. Yini lebeyingenta Juda akhatsateke ngesikhatsi sekulitfuba lekutsi babe wakhe akhulume naye?

¹³ Jakobe wabese ukhuluma naJuda indvodzana yakhe. Ngemuva kwekutsi Juda sekeve loko babe wakhe lakutjele bobhuti bakhe, kungenteka wakhatsateka. Ngetulu kwako konkhe, naye bekawentile emaphutsa lamakhulu. Kubonakala ngatsi wasifaka sandla ngesikhatsi bobhuti bakhe bahlasela lidolobha laseShekhemu. (Gen. 34:27) Bekanabobhuti bakhe ngesikhatsi batsengisa Josefa kutsi abe sigcili futsi bakhohlisa babe wabo ngaloko bekwentekile. (Gen. 37:31-33) Ngekuhamba kwesikhatsi, walala naThamari makoti wakakhe acabanga kutsi yingwadla.​—Gen. 38:15-18.

14. Ngutiphi tintfo letinhle letentiwa nguJuda? (Genesisi 49:8, 9)

¹⁴ Nanobe kunjalo, aphefumulelwe, Jakobe wavele nje wamncoma Juda futsi wambusisa. (Fundza Genesisi 49:8, 9.) Juda bekakhombisile kutsi unendzaba mbamba nababe wakhe losakhulile. Ngetulu kwaloko, bekamkhombise sihawu bhuti wakhe lomncane lokunguBhenjamini.​—Gen. 44:18, 30-34.

15. Sagcwaliseka njani siphrofetho lesimayelana naJuda?

¹⁵ Jakobe waphrofetha kutsi Juda bekatawuba ngumholi wabomnakabo. Nobe kunjalo, bekutawutsatsa sikhatsi lesidze kutsi lesiphrofetho sigcwaliseke. Eminyakeni lengaba ngu-200 Jakobe ashito lamavi, ngemuva kwekutsi ema-Israyeli aphume eGibhithe futsi adzabule ehlane aya eVeni Lesetsembiso, sive sakaJuda sahamba embili futsi besilandzelwa nguleletinye tive. (Num. 10:14) Ngemuva kweminyaka, sive sakaJuda sakhuphuka kucala sayokulwa nemaKhenani kuze sitsatse liVe Lesetsembiso. (Khu. 1:1, 2) Ngetulu kwaloko, Davide lebekavela esitukulwaneni saJuda waba wekucala kutsi abe yinkhosi levela esiveni sakaJuda futsi walandzelwa ngemakhosi lamanyenti lavela kulesive. Kodvwa kunaletinye tintfo letenteka.

16. Sagcwaliseka njani siphrofetho lesikuGenesisi 49:10? (Buka nelibhokisi lelitsi “Emavi Ekugcina AJakobe Lasiphrofetho.”)

¹⁶ Jakobe washo kutsi uMbusi lotawubusa bantfu kuze kube phakadze bekatawuvela esitukulwaneni saJuda. (Fundza Genesisi 49:10 nembhalo longentasi.) LoMbusi nguJesu Khristu, loyo Jakobe lambita ngekutsi nguShilo. Ngesikhatsi lenye ingilosi ikhuluma ngaJesu, yatsi: ‘Jehova Nkulunkulu utamnika sihlalo sebukhosi sababe wakhe Davide.’ (Luk. 1:32, 33) Jesu uphindze abitwe ngekutsi ‘yiNgwenyama levela esiveni sakaJuda.’​—Semb. 5:5.

17. Singamlingisa njani Jehova endleleni lesibabuka ngayo labanye?

¹⁷ Yini lesingayifundza? Jehova wambusisa Juda ngisho nobe enta emaphutsa lamakhulu. Kodvwa kungenteka yini kutsi bobhuti bakhe bebatibuta kutsi yini Jehova layibonako kuye? Kunobe ngukuphi, Jehova wabona lokuhle kuJuda futsi wambusisa. Singamlingisa njani Jehova? Nangabe umzalwane nobe dzadze lesati emaphutsa akhe anikwa imisebenti letsite ebandleni, singahle singacondzi kutsi yini leyente wanikwa lemisebenti. Kodvwa senta kahle ngekukhumbula kutsi Jehova uyajabula ngebuntfu bakhe lobuhle. Jehova ubuka lokuhle kubantfu bakhe. Shengatsi singatimisela kwenta lokufanako.

18. Kubaluleke ngani kutsi sibe nesineke?

¹⁸ Lokunye lesikufundzako kulokwenteka kuJuda kutsi kufanele sibe nesineke. Jehova uhlale atifeza tetsembiso takhe, kodvwa akahlali atifeza ngendlela lesilindzele ngayo nobe ngesikhatsi lesisilindzele. Situkulwane saJuda asizange sicale ngekushesha kuhola bantfu baNkulunkulu. Kodvwa sabasekela ngekwetsembeka labo labakhetfwa nguJehova kutsi bahole, samsekela Mosi umLevi, Joshuwa lovela ka-Efrayimu neNkhosi Sawula yakaBhenjamini. Shengatsi natsi singasekela nobe ngubani Jehova lamkhetsa kutsi ahole bantfu bakhe lamuhla.​—Heb. 6:12.

19. Yini lesesiyifundzile ngaJehova emavini ekugcina aJakobe lasiphrofetho?

¹⁹ Kuze kube ngunyalo, sifundzeni emavini ekugcina aJakobe lasiphrofetho? Kusebaleni kutsi “indlela umuntfu labuka ngayo ayifanani neyaNkulunkulu.” (1 Sam. 16:7) Jehova unesineke ngendlela lemangalisako futsi ucolela kakhulu. Ngisho nobe angabubeketeleli bubi, kodvwa akalindzeli kutsi kube ngatsi bantfu bakhe bete sono. Angabusisa ngisho nalabo labente tono letinkhulu esikhatsini lesendlulile nangabe baphendvuka mbamba futsi bente lokulungile. Esihlokweni lesilandzelako, sitawucoca ngaloko Jakobe lakutjela lalamanye emadvodzana akhe langu-8.