BANTFU LABASHA BAYABUTA
Kuganana—Incenye 2: Yini Lengingayilindzela Nangitsandzana Nalotsite?
Utsandzana nalotsite, futsi nifuna kucitsa sikhatsi ndzawonye kuze nibone kutsi ningashada yini. Yini longayilindzela njengobe nicitsa sikhatsi ndzawonye?
Kulesihloko
Kulindzeleni kuvulelana sifuba
Wena nalona lotsandzana naye nitokwatana kancono njengobe nicitsa sikhatsi ndzawonye. Lokunye utakufundza njengobe ubona indlela lona lotsandzana naye lenta ngayo tintfo.
Nobe kunjalo, kunaletinye tintfo lokutawudzingeka nikhulume ngato ngalokucondzile. Njengobe nikhuluma, banini nengcondvo levulekile ningavumeli indlela lenitiva ngayo inente nifike esiphetfweni lesingesiso.
Tintfo leningacoca ngato tifaka ekhatsi:
Indzaba yemali. Ninato yini tikweleti? Ukutfola kumatima yini kusebentisa kahle imali? Nakwenteka nishada, wena nalona lotoshada naye nitawutenta njani tincumo nakutiwa endzabeni yekusebentisa imali leniyitfolako?
Indzaba yemphilo. Niphile kahle yini? Uke wagula kakhulu yini esikhatsini lesendlulile?
Imigomo. Yini longatsandza kuyifeza ekuphileni kwakho? Imigomo yakho iyafana yini neyalona lotsandzana naye? Nase nishadile, utawujabula yini ngisho nobe loko bewufisa kukufeza kungasenteki?
Umndeni. Akhona yini emalunga emndeni wakini lowanakekelako? Ucabanga kutsi kutawudzingeka uchubeke yini unakekela lamalunga emndeni? Uyafuna yini kuba nebantfwana? Nawubafuna, ufuna bangakhi?
Nanicoca ngaletintfo yetsembekani futsi ningafihli lutfo. Khuluma liciniso ungakhulumi loko locabanga kutsi kutojabulisa lona lotsandzana naye.—KumaHebheru 13:18.
Longacabanga ngako: Yini lodzinga kuyati ngalomuntfu locitsa sikhatsi naye? Yini lona lotsandzana naye lokudzingeka ayati ngawe? Kukhuluma liciniso kutanisita njani nikhone kukhulumisana ngekwetsembeka ngisho senishadile?
Simiso seliBhayibheli: “Nguloyo naloyo akakhulume liciniso.”—Kubase-Efesu 4:25.
“Lona wesifazane angase acabange, ‘Kungenteka sibe sesetsembisene umshado ngemuva kwetinyanga letisitfupha,’ kodvwa lowesilisa mhlawumbe angacabanga kutsi ngemuva kwemnyaka. Nangabe kunjalo, lowesifazane angahle advumateke futsi akhatsateke ngobe ulindzele kutsi tintfo tenteke ngekushesha. Kubalulekile kutsi laba latsandzanako babe nemgomo munye.”—Ariana, lonemnyaka ashadile.
Kulindzeleni kuba nemibono lengafani
Bantfu abafani. Ngako ungacabangi kutsi ninalomuntfu lotsandzana naye nitawuvumelana kuto tonkhe tintfo nobe nitotiva ngendlela lefanako ngentfo letsite. Emasiko kanye nendlela lokhule ngayo itayitsintsa indlela lobona ngayo tintfo.
Longacabanga ngako: Nangabe imibono yenu endzabeni letsite ingafani, ukulungele yini kushintja umbono wakho kuze kube nekuthula, yingci nje nakute simiso seliBhayibheli lesephulwako?
Simiso seliBhayibheli: “Kucabangela kwenu akwatiwe ngibo bonkhe bantfu..”—KubaseFiliphi 4:5.
“Ngisho ungacabanga kutsi nifanelana kahle kanjani kukhona lapho ningeke nivumelane khona. Ngisho nobe kufanelana kubalulekile, buntfu umuntfu labukhombisako nakunetintfo leningavumelani kuto bubaluleke kakhulu.”—Matthew, Loneminyaka lengu-5 ashadile.
Kulindzeleni kutsi kucitsa sikhatsi ndzawonye kutanenta nicindzeteleke
Kucitsa sikhatsi nemuntfu lotsandzana naye kungadla sikhatsi sakho lesinyenti futsi kukwente ucindzeteleke. Yini lengakusita?
Tibekele imincele longayikhona. Ungavumeli kutsi sikhatsi losicitsa nalona lotsandzana naye sikwente ukhohlwe letinye tintfo lokumelwe utente nobe bangani bakho. Alana, loneminyaka lesihlanu ashadile, utsi: “Utobadzinga bangani bakho nase ushadile futsi nabo batokudzinga. Ungabalahli ngobe nje sewutsandzana nalotsite.”
Khumbula kutsi nasewushadile kutawudzingeka wente tonkhe tintfo lokufanele utente futsi ulinganisele. Kungakusita kucale wente loku ngalesikhatsi nisatsandzana.
Longacabanga ngako: Ufuna lona lotsandzana naye acitse sikhatsi lesinyenti nawe futsi akunake kakhulu yini? Nobe uva shengatsi yena ufuna ucitse sikhatsi lesinyenti naye? Yini leningayenta kuze kube nekulinganisela futsi kube bete kini lotikhandza sekenta lokungetulu kwalokudzingekile?
Simiso seliBhayibheli: “Yonkhe intfo inesikhatsi sayo, konkhe . . . kunesikhatsi sako.”—Umshumayeli 3:1.
“Nangabe kutijabulisa ngiyo intfo lehamba embili kulokutsandzana kwenu, nitotfola kutsi tintfo tehlukile emshadweni. Kuhle kutsi bantfu labatsandzanako bente tintfo ndzawonye, njengekuyotsenga, kwenta imisebenti yasekhaya kanye nekwenta tintfo letiphatselene naNkulunkulu. Loku kungabasita kutsi bakhone kwenta tintfo ndzawonye ngisho sebashadile.”—Daniel, loneminyaka lemibili ashadile.
Khumbula kutsi kucitsa sikhatsi nalotsandzana naye kwesikhashana nje, kutawuholela ekutseni nente sincumo sekutsi nitawushada yini nobe nitokwehlukana. Incenye 3 yalesihloko itawucoca ngetintfo lokudzingeka ucabange ngato nawenta lesincumo.