BoFakazi BaJehova Banayo Yini Imitsetfo Lemayelana Nekutsandzana Nalotsite?

BoFakazi BaJehova bakholelwa kutsi timiso kanye nemitsetfo leseBhayibhelini kungabasita kutsi bente tincumo letitawujabulisa Nkulunkulu futsi tibazuzise. (Isaya 48:17, 18) Asikatenteli letimiso nalemitsetfo, kodvwa siphila ngayo. Asesibone kutsi leminye yayo itsini ngendzaba yekutsandzana nalotsite.a

• Umshado usibopho lesihlala njalo. (Matewu 19:6) BoFakazi BaJehova bakutsatsa njengalokubalulekile kutsandzana nalotsite ngobe kusinyatselo lesiholela emshadweni.

• Kutsandzana nalotsite kwalabo lesebakulungele kushada. Labo, bantfu ‘lesebendlulile esikhatsini sekuvutselwa yinkhanuko yebusha.’​—1 KubaseKhorinte 7:36.

• Labo labatsandzana nalotsite kufanele bakulungele kushada. Labanye labadivose ngalokusemtsetfweni abakavumeleki kutsi baphindze bashade ngekwembono waNkulunkulu, ngobe Nkulunkulu utsi, kuphinga kuphela kwesizatfu sekudivosa.​—Matewu 19:9.

• EmaKhristu lafuna kushada kufanele ashade nalomunye lakholwa nawo. (1 KubaseKhorinte 7:39) BoFakazi BaJehova bakholelwa kutsi lomyalo usho umuntfu lokholelwa loko lokukholelwako futsi longuFakazi lobhajatisiwe, hhayi umuntfu lohlonipha loko lokukholelwako nje kuphela. (2 KubaseKhorinte 6:14) Kusukela kadzeni, Nkulunkulu bekasolo acondzisa bantfu bakhe kutsi bashade nalabo labanetinkholelo letifana netabo. (Genesisi 24:3; Malakhi 2:11) Lomtsetfo usasebenta nalamuhla, futsi nebacwaningi bayavumelana nawo.b

• Bantfwana kufanele balalele batali babo. (Taga 1:8; KubaseKholose 3:20) Lomyalo ufaka ekhatsi kutsi bantfwana labasahlala ekhaya balalele tincumo tebatali babo nakutiwa endzabeni yekutsandzana nalotsite. Letincumo talabatali tingafaka ekhatsi iminyaka labafise kutsi umntfwana wabo acale ngayo kutsandzana nalotsite kanye nalavumeleke kukwenta nase atsandzana nalotsite.

• Basebentisa leticondziso letiseBhayibhelini, BoFakazi bayatikhetsela kutsi batawutsandzana yini nalotsite futsi batikhetsele nekutsi batotsandzana nabani. Loku kuvumelana nesimiso lesitsi: “Nguloyo naloyo utawutetfwalela umtfwalo wakhe.” (KubaseGalathiya 6:5, umbhalo longentasi) Nobe kunjalo, nakutiwa endzabeni yekutsandzana nalotsite, labanyenti bacela seluleko kuboFakazi labavutsiwe labangeke babayenge.​—Taga 1:5.

• Tintfo letinyenti letentiwa bantfu labatsandzanako titono letinkhulu. Sibonelo nje, liBhayibheli lisiyala kutsi sigweme kutiphatsa lokubi. Loku kufaka ekhatsi tonkhe tento letingcolile letentiwa bantfu labangakashadi, letifaka ekhatsi kuphululana titfo tangasense, kulala umuntfu emlonyeni kanye nemantanyula. (1 KubaseKhorinte 6:9-11) Ngisho kuvuselana inkhanuko nibe ningakashadi, ‘kukungcola’ lokungamjabulisi Nkulunkulu. (KubaseGalathiya 5:19-21) LiBhayibheli liyatilahla tincociswano letingcolile letifaka ekhatsi ‘inkhulumo leyenyanyekako’.​—KubaseKholose 3:8.

• Inhlitiyo nobe umuntfu longekhatsi iyakhohlisa. (Jeremiya 17:9) Ingenta umuntfu ente tintfo latiko kutsi timbi. Kuze tinhlitiyo tabo tingabadukisi, labatsandzanako bayakugwema kuba bodvwana endzaweni lethulile lapho bangalingeka khona kutsi batiphatse kabi. Bangakhetsa kuba ndzawonye bakanye nalabanye bantfu nobe lotsite longabagadza. (Taga 28:26) EmaKhristu lasengakashadi futsi lafuna langashada naye ayabati bungoti bekutsandzana nalotsite etinkhundleni tekuchumana, labangati lokunganani ngaye.​—Tihlabelelo 26:4.