EmaKhristu Kufanele Aye Yini Emphini—Litsini LiBhayibheli?

Njengobe sibonile kulemphi lese-Ukraine, baholi betinkholo letitsi tebuKhristu bakhutsata bantfu kutsi batsatse luhlangotsi kulemphi. Naka indlela labaholi benkholo labasekele ngayo lemphi:

• Metropolitan Epiphanius I waseKyiv watsi, “Siwaniketa ludvumo futsi siyawabonga emasotja etfu ngekuvikela live lawo i-Ukraine esitseni . . . Sihlale sinithantazela ngebucotfo futsi sinisekela.”—Kubika I-The Jerusalem Post, yangaMarch 16, 2022.

• “Umholi welisontfo lema-Orthodox aseRussia wabamba inkonzo nemasotja aseRussia ngeliSontfo lapho awakhutsata khona kutsi avikele live lawo iRussia njengobe iMoscow ichubeka ihlasela i-Ukraine.”—I-Reuters, yanga-April 3, 2022.

Kufanele yini kutsi emaKhristu aye emphini? Litsini liBhayibheli?

Litsini mbambambamba liBhayibheli?

LiBhayibheli liveta kutsi labo lababalandzeli baJesu Khristu mbamba abayingeneli imphi.

• “Buyisela inkemba yakho endzaweni yayo, ngobe bonkhe labasebentisa inkemba batawubhujiswa ngenkemba.”—Matewu 26:52.

  Umuntfu losekela imphi nobe alwe kuyo uyawalalela yini vele lamavi aJesu?

• “Ngininika umtsetfo lomusha, wekutsi nitsandzane; njengobe nje nami nginitsandzile, nani tsandzanani. Nangabe nitsandzana, bonkhe batawukwati kutsi nibafundzi bami.”—Johane 13:34, 35.

  Umuntfu losekela imphi uyalukhombisa yini lolutsandvo Jesu latsi bafundzi nobe balandzeli bakhe bebatawubonakala ngalo?

Kuze utfole lokunyenti, fundza sihloko lesitsi “Ingabe Impi Iyahambisana NobuKristu?” lesitfolakala ngesiZulu.

EmaKhristu nekuya emphini lamuhla

Kunengcondvo yini kulindzela kutsi emaKhristu angayi emphini lamuhla? Yebo. LiBhayibheli laphrofetha kutsi esikhatsini setfu, lokusikhatsi lesibitwa ngekutsi ‘ngemalanga ekugcina,’ bekutawuba nebantfu labavela kuto tonkhe tive lebebangeke ‘basaceceshelwa kulwa imphi,’ lokuvumelana naloko lokwafundziswa nguJesu.—Isaya 2:2, 4; umbhalo longentasi.

• Fundza tihloko letiluchungechunge letiku-Sicongosekulindza lesinesihloko lesitsi “Timphi Tiyamjabulisa Yini Nkulunkulu?,” kuze utfole lokunyenti.

Madvutane Jehova,a “Nkulunkulu wekuthula,” utawusebentisa hulumende wakhe wasezulwini kuze asindzise bantfu “ekucindzetelweni nasebudloveni.”—KubaseFiliphi 4:9; Tihlabelelo 72:14.

• Kuze ubone kutsi utakwenta njani loko, bukela i-video letsi Uyini UMbuso WaNkulunkulu?