HLALANI NILINDZILE!
Indzima Yenkholo Emphini Lese-Ukraine—Litsini LiBhayibheli?
Cabanga nganaku lokulandzelako lokumayelana nebaholi benkholo labadvumile kanye nemphi lese-Ukraine:
“Umholi we-Russian Orthodox Church, Patriarch Kirill, akakayigceki iRussia ngekuhlasela i-Ukraine. . . . Lisontfo lakhe lisakate tindzaba letingemanga nge-Ukraine futsi Putin usebentise leto tindzaba njengesizatfu sekuhlasela kwakhe.”—I-EUobserver, March 7, 2022.
“Patriarch Kirill . . . utsi sizatfu lesiyinhloko lesente iRussia yahlasela i-Ukraine kutsi yetama kucedza sono.”—I-AP News, March 8, 2022.
“Ngemsombuluko, umholi welisontfo lema-Orthodox e-Ukraine, Metropolitan Epiphanius I waseKyiv, ubusise bantfu bakhe kuze ‘balwe nemasotja aseRussia’ . . . Uphindze watsi kubulala emasotja aseRussia akusiso sono.”—I-Jerusalem Post, March 16, 2022.
“Tsine i-[Ukrainian Council of Churches and Religious Organizations (UCCRO)] siyawasekela emasotja ase-Ukraine kanye nebantfu labalwako kuze bavikele lelive letfu. Siyayibusisa imetamo yabo yekuvikela i-Ukraine esitseni futsi siyabathantazela.”—Lokushiwo yi-UCCRO,a February 24, 2022.
Ucabangani? Kufanele yini tinkholo letitsi tilandzela Jesu Khristu tikhutsate emalunga ato kutsi aye emphini? Litsini liBhayibheli?
Umlandvo Wenkholo Etimphini
Umlandvo ukhombisa kutsi esikhatsini lesinyenti inkholo itsi kuvumelekile, kukahle nobe kubalulekile kuya emphini, kodvwa ngesikhatsi lesifanako yente shengatsi ikhutsata kuthula. Sekuphele iminyaka BoFakazi BaJehova basita bantfu babone kutsi loku kukutentisa. Cabanga ngetibonelo letitfolakala etincwadzini tetfu.
Sihloko lesitsi “IziMpi Zenkolo—‘Ukuzikhohlisa Okusabekayo’,” lesitfolakala ngesiZulu, sikhombisa kutsi liSontfo lemaRoma Katolika laba nesandla ekubulaweni kwebantfu labanyenti, lelatsi likwenta egameni laNkulunkulu nelaKhristu.
Sihloko lesitsi “ISonto LamaKatolika E-Afrika,” lesitfolakala ngesiZulu, sichaza indlela inkholo leyahluleka ngayo kuvimba imphi kanye nekubulalana kwebantfu bebuhlanga lobehlukahlukene.
Sihloko lesitsi “Ingabe Kufanele Kusolwe Inkolo?,” “Indima Yenkolo Ezimpini Zabantu,” kanye nalesitsi “Inkolo Ithatha Uhlangothi” letitfolakala ngesiZulu, tichaza indlela baholi bemaKatolika, bema-Orthodox kanye nebema-Protestant labasekele ngayo tinhlangotsi letimbili letilwako etimphini letinyenti.
Kufanele yini tinkholo tebuKhristu tisekele imphi?
Loko Jesu lakufundzisa: “Kufanele utsandze makhelwane wakho njengobe utitsandza wena.” (Matewu 22:39) “Chubekani nitsandza titsa tenu.”—Matewu 5:44-47.
Cabanga nganaku: Inkholo ingasho yini kutsi ilalela umyalo waJesu wekutsi sitsandzane, ngesikhatsi lesifanako ibe ikhutsata balandzeli bayo kutsi babulale labanye bantfu emphini? Kuze utfole imphendvulo, fundza sihloko lesitsi “AmaKristu Eqiniso Nempi?” nalesitsi “Ingabe Umuntu Angakwazi Ukuthanda Izitha Zakhe?,” letitfolakala ngesiZulu.
Loko Jesu lakufundzisa: “UMbuso wami awusiyo incenye yalelive. Kube bewuyincenye yalo, balandzeli bami bebangangilwela kuze nginganikelwa kumaJuda. Kodvwa-ke uMbuso wami awuveli kulelive.” (Johane 18:36) “Bonkhe labasebentisa inkemba batawubhujiswa ngenkemba.”—Matewu 26:47-52.
Cabanga nganaku: Nangabe emaKhristu bekangakavumeleki kulwa kuze avikele Jesu, sikhona yini sizatfu lokufanele siwente alwe nyalo? Fundza sihloko lesitsi “Ingabe Impi Iyahambisana NobuKhristu?,” lesitfolakala ngesiZulu, kuze ubone kutsi emaKhristu ekucala asilandzela njani ngekwetsembeka sibonelo saJesu kanye naloko lakufundzisa.
Yini letakwenteka etinkholweni letikhutsata imphi?
LiBhayibheli lifundzisa kutsi Nkulunkulu akatemukeli tinkholo letitsi timelela Jesu kodvwa tibe tingakulaleli loko lakufundzisa.—Matewu 7:21-23; KuThithusi 1:16.
Incwadzi yeSembulo ikhombisa kutsi Nkulunkulu utawenta tinkholo letibe nesandla ekufeni kwabo “bonkhe lababulawa emhlabeni” tilandzise. (Sembulo 18:21, 24) Kuze utfole kutsi leni, fundza sihloko lesitsi “Liyini IBhabhiloni Elikhulu?,” lesitfolakala ngesiZulu.
Jesu waveta kutsi tonkhe tinkholo letingemukelwa nguNkulunkulu titawubhujiswa ngenca yetento tato letimbi, njengobe nje nesihlahla lesibi lesitsela titselo letibolile ‘sijutjwa sijikwe emlilweni.’ (Matewu 7:15-20) Kuze utfole kutsi loko kutawenteka njani, fundza sihloko lesitsi “Ukuphela Kwenkolo Yamanga Kuseduze!,” lesitfolakala ngesiZulu.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a I-UCCRO nobe i-Ukrainian Council of Churches and Religious Organizations, ifaka ekhatsi emasontfo langu-15 lamelela ema-Orthodox, ema-Greek nemaRoma Katolika, ema-Protestant, netinhlelo tema-Evangelical kanye nema-Juda nemaMuslim.