Ngumuphi Umholi Lotamkhetsa?—Litsini LiBhayibheli?

Kulamaviki lambalwa letako, kutawuba nelukhetfo emaveni lamanyenti emhlabeni. Bantfu batawube benta tincumo letibalulekile tekutsi bobani labatabakhetsa kutsi babe baholi babo.

Litsini liBhayibheli?

Kulinganiselwe lokungentiwa baholi lababantfu

LiBhayibheli liveta kulinganiselwa bonkhe baholi lababantfu labanako.

• “Ningalibeki litsemba lenu kubaholi nobe kumuntfu, ngobe ngeke akhone kunisindzisa. Umoya wakhe uyaphuma, yena abuyele emhlabatsini; futsi imicabango yakhe iphela ngalo lelolanga.”—Tihlabelelo 146:3, 4, umbhalo longentasi.

Ngisho nemholi lokahle kakhulu utawugcine afile. Ngetulu kwaloko, kute siciniseko sekutsi labo labatawuhola ngemuva kwakhe batawuchubekisa lemisebenti yakhe lemihle.—Umshumayeli 2:18, 19.

Liciniso likutsi liBhayibheli liveta kutsi bantfu bebangakadalwa ngenjongo yekutsi batibuse.

• “Akusiko kwemuntfu kutsi aticondzisele yena imphilo yakhe.—Jeremiya 10:23.

Ukhona yini umuntfu longaba ngumholi lokahle kulesikhatsi setfu?

Umholi lowemukelwa nguNkulunkulu

LiBhayibheli liveta kutsi Nkulunkulu ubeke umholi lokahle kakhulu nalesingametsemba, longuJesu Khristu. (Tihlabelelo 2:6) Jesu uyiNkhosi yeMbuso waNkulunkulu, lokunguhulumende lobusa usezulwimi.—Matewu 6:10.

Utawuvuma yini kuholwa nguJesu? LiBhayibheli liveta kubaluleka kwalombuto:

• “Hloniphani indvodzana [Jesu Khristu], ngale kwaloko Nkulunkulu utawutfukutsela futsi nitawushabalala endleleni, ngobe intfukutselo yakhe isheshe ivutse. Bayajabula bonkhe labakhosela kuye.”—Tihlabelelo 2:12.

Lesi sikhatsi sekutsi wente sincumo. Siphrofetho seliBhayibheli siveta kutsi Jesu wacala kubusa nga-1914 futsi ngekushesha uMbuso waNkulunkulu utawutsatsa sikhundla sabo bonkhe bohulumende bebantfu.—Danyela 2:44.

Kuze utfole lokwengetiwe ngekutsi ungakusekela njani kuhola kwaJesu, fundza sihloko lesitsi “Khetsa Nyalo Kusekela UMbuso WaNkulunkulu!”