Bohulumende Bangabambisana Yini Ekuvimbeni Umonakalo Lobangelwa Kushintja Kwesimo Selitulu?—Litsini LiBhayibheli?

NgeliSontfo mhlaka-20 November 2022, kwaphetfwa umhlangano we-COP27 United Nations Climate Change. Ngisho nobe kwentiwa sivumelwane lesiyincophamlandvo sekutsi kusitwe emave laphuyile ngekwetimali kuze nawo akhone kulwisana netinhlekelele letibangelwa kushintjashintja kwesimo selitulu, kodvwa labanyenti bayavuma kutsi loku angeke kuwulungise umsuka walenkinga.

• NgaNovember 19, 2022, António Guterres lowengamele inhlangano yaMhlabuhlangene utsite: “Ngiyasemukela lesincumo sekutsi kube nesikhwama setimali lesibuke kulungiswa kwemonakalo lobangelwa kushintja kwesimo selitulu. Kusebaleni kutsi kudzingeka kwentiwe lokungetulu kwaloko . . . Iplanethi yetfu isesimeni lesibucayi.”

• “Umhlaba solo ulengela engotini ngenca yekushintja kwesimo selitulu.”—Mary Robinson, lobekangumengameli wase-Ireland futsi lowake waba ngu-High Commissioner for Human Rights waMhlabuhlangene, November 20, 2022.

Bantfu labasha ngibo labakhatsateke kakhulu ngelikusasa leplanethi yetfu. Nobe kunjalo, bohulumende batawubambisana yini kuze bagcine setsembiso sabo sekulungisa inkinga yekushintja kwesimo selitulu? Litsini liBhayibheli?

Bohulumende batawubambisana yini futsi baphumelele?

LiBhayibheli liveta kutsi ngisho nobe bangaba nesifiso lesihle kangakanani futsi basebente kamatima kangakanani, nobe yini bohulumende labakhona kuyenta kuze balungise lenkinga ilinganiselwe. Naka nati tizatfu letimbili letibangela loko:

• “Intfo legwegwile angeke ize icondziswe.”—Umshumayeli 1:15.

  Lokukushoko: Bohulumende bayehluleka ngobe bantfu bebangakadwa ngenjongo yekutsi batibuse. (Jeremiya 10:23) Ngisho nobe bohulumende bangasebenta ngekubambisana futsi batimisele kangakanani, angeke baze bakhone kulungisa tinkinga temhlaba.

• “Ngobe bantfu batawutitsandza bona, batsandze imali, . . . bangavumi kwenta tivumelwane.”—2 KuThimothi 3:2, 3.

  Lokukushoko: LiBhayibheli laphrofetha ngalokucondzile kutsi esikhatsini setfu, bantfu labanyenti bebataticabangela bona futsi bangavumi kusebenta ngekubambisana nalabanye kuze kuzuze wonkhe umuntfu.

Sizatfu sekuba nelitsemba

Nobe kunjalo, likusasa leplanethi yetfu aliyi ngetetsembiso letentiwa bohulumende bebantfu. Nkulunkulu usinike uMbusi wemhlaba lofanelekako, lokunguJesu Khristu. LiBhayibheli litsi ngaloMbusi:

• ‘Hulumende utawuba semahlombe akhe. Libito lakhe kutawutsiwa nguMeluleki Lomangalisako, Nkulunkulu Lonemandla, Babe Waphakadze, Sikhulu Sekuthula.’—Isaya 9:6, umbhalo longentasi.

Jesu uyiNkhosi yeMbuso waNkulunkulu, nobe hulumende wasezulwini. (Matewu 6:10) Unemandla, kuhlakanipha kanye nesifiso sekunakekela umhlaba kanye nako konkhe lokuhlala kuwo. (Tihlabelelo 72:12, 16) Nasekubusa Jesu, lohulumende wasezulwini utawucedza labo “labalimata umhlaba” futsi ulungise umonakalo lokhona emhlabeni.—Sembulo 11:18; Isaya 35:1, 7.

Kuze ufundze lokunyenti ngesisombululo semonakalo lobangelwa kushintja kwesimo selitulu, fundza sihloko lesitsi “Litsini LiBhayibheli Ngekushintja Kwesimo Selitulu Kanye Nangelikusasa Letfu?”