Bantfu Abasabetsembi Bosopolitiki​—Litsini LiBhayibheli?

Kulomnyaka wa-2024, emave lamanyenti emhlabeni atawuba nelukhetfo. Nobe kunjalo, bantfu labanyenti abasabetsembi bosopolitiki.

• Bantfu labanyenti baseMelika labaphendvule nakwentiwa luhlolo batsi “bosopolitiki labanyenti baticabangela bona” kunekufuna kusita bantfu.a​—I-Pew Research Center, yaSeptember 19, 2023.

Nebantfu labasha labanyenti ababetsembi bosopolitiki.

• “Bantfu labaseminyakeni yekutfomba bafuna kutfolakale sisombululo setinkinga letinkhulu letikhatsata bantfu, kodvwa nakwentiwa luhlolo, batsi bosopolitiki behlulekile kutfola sisombululo.”​—I-The New York Times, yaJanuary 29, 2024.

• “Lolunye luhlolo lutfole kutsi bantfu labasha labanyenti betsemba kakhulu bantfu labanebalandzeli labanyenti kutekuchumana kunabosopolitiki.”​—I-The Korea Times, yaJanuary 22, 2024.

Singetsemba yini kutsi bosopolitiki batasiletsela likusasa lelihle? Ngubani vele lesingametsemba?

Caphela kutsi wetsemba bani

Bantfu benta kahle ngekunaka kutsi betsemba bani. LiBhayibheli litsi “umuntfu lote lwati wetsemba konkhe lakuvako, kodvwa lohlakaniphile uyacabangisisa ngako konkhe lakwentako.”​—Taga 14:15.

• Kuze uhlole kutsi kwatiswa lokuvako kuliciniso yini nobe cha, fundza sihloko lesitsi “Zivikele Emangeni,” lesitfolakala ngesiZulu.

Ngetulu kwaloko, ngisho nabosopolitiki labetsembekile futsi labanetisusa letinhle abakhoni kwenta konkhe labangatsandza kukwenta. Kungako liBhayibheli lecwayisa ngekutsi:

• “Ningalibeki litsemba lenu kubaholi nobe kumuntfu, ngobe ngeke akhone kunisindzisa.”​—Tihlabelelo 146:3.

Umholi lesingametsemba

LiBhayibheli lisitjela kutsi Nkulunkulu ubeke umholi lesingametsemba ngalokuphelele, lokunguJesu Khristu. (Lukha 1:32, 33) Jesu uyiNkhosi yeMbuso waNkulunkulu, lokunguhulumende lobusa usezulwini.​—Matewu 6:10.

• Tfola kutsi yini lengakwenta umetsembe Jesu nekutsi yini latayenta kuze acatulule tinkinga lesibhekana nato. Fundza sihloko lesitsi “Ngubani INkhosi YeMbuso WaNkulunkulu?” kanye nalesitsi “Yini Letawufezwa NguMbuso WaNkulunkulu?”