Budlova Lobuhambisana Netindzaba Tepolitiki​—Litsini LiBhayibheli?

Sebandzile budlova lobucondzene netiphatsimandla.

Yini leyenta kube nebudlova lobunyenti kangaka lobuhambisana netepolitiki? Buyoke buphele yini? Litsini liBhayibheli?

Kwehlukana ekhatsi kutepolitiki kwaphrofethwa

LiBhayibheli laphrofetha kutsi kulesikhatsi setfu lesibitwa ngekutsi ‘ngemalanga ekugcina’ bantfu labanyenti batawuba nebudlova futsi bangafuni kwenta tivumelwane.

• ‘Emalangeni ekugcina kutawuba netikhatsi letibucayi lokumatima kubhekana nato. Ngobe bantfu . . . batawuba ngulabangabongi, labangetsembeki, . . . labangavumi kwenta tivumelwane, . . . labanelulaka, . . . labatsengisa ngalabanye, labanenkhani, labagcwele umgcabho.’​—2 KuThimothi 3:1-4.

LiBhayibheli laphindze laphrofetha kutsi imibango lefaka ekhatsi kuvukela tiphatsimandla kanye netiphitsiphitsi bekutawukhombisa kutsi siphila emalangeni ekugcina. (Lukha 21:9, umbhalo longentasi) Nobe kunjalo, budlova lobuhambisana netepolitiki kanye nembango angeke kuze kube khona phakadze.

Kuphela kwebudlova lobuhambisana netepolitiki

LiBhayibheli liveta kutsi Nkulunkulu utawubeka hulumende wakhe wasezulwini lotawutsatsa sikhundla sabobonkhe bohulumende bebantfu.

• “Nkulunkulu welizulu utawubeka umbuso . . . utawupitjita yonkhe lemibuso uyicedze futsi ngiwo wodvwa lotawuma kuze kube phakadze.”​—Danyela 2:44.

UMbuso waNkulunkulu utawenta bantfu babe nebunye futsi uletse kuthula emhlabeni wonkhe.

• INkhosi yawo Jesu Khristu ibitwa ngekutsi, “Sikhulu Sekuthula,” futsi itawucinisekisa kutsi ‘kuthula angeke kuphele.”​—Isaya 9:6, 7.

• Nalamuhla, tikhonti talombuso tifundza kuphilisana ngekuthula. Kungako liBhayibheli litsi: “Tiyawugucula tinkemba tato tibe ngemakhuba, tikhali tato titente tikelo tekutsena tihlahla. Sive ngeke siphindze silwe nalesinye sive, futsi ngeke tiphindze ticeceshelwe kulwa imphi.”​—Isaya 2:3, 4.

Kuze utfole lokunyenti, fundza sihloko lesitsi “Yini Letawufezwa NguMbuso WaNkulunkulu?” ubukele ne-video letsiUyini UMbuso WaNkulunkulu?