Kudubula Etikolweni—Litsini LiBhayibheli?

Nga-May 24, 2022, kwenteke intfo lengakhulumeki edolobheni lelincane lase-Uvalde, eTexas, e-U.S.A. Ngekusho kwe-The New York Times, “kwadutjulwa kwabulawa bantfwana labangu-19 kanye nabothishela lababilli . . . eRobb Elementary School.”

Lokubuhlungu kutsi tentakalo letimbi njengalesi setivamile. I-USA Today ibika kutsi “kulomnyaka lophelile,” e-United States nje iyodvwana, “kube netigameko tekudutjulwa letingu-249 etikolweni. Letigameko letinyenti njengaleti tagcina kwenteka ngabo-1970.”

Tentekelani tintfo letimbi njengaleti? Singabhekana njani naletento letimbi kangaka? Likhona yini litsemba lekutsi lobudlova buyawuke buphele? LiBhayibheli lisiniketa timphendvulo.

Yini lebangela kutsi budlova budlange emhlabeni?

•  LiBhayibheli lichaza sikhatsi lesiphila kuso ngekutsi ‘ngemalanga ekugcina’ lapho bantfu labanyenti batawuba “bete lutsandvo” “babe nelulaka,” futsi bente tento tebulwane. Bantfu labenta tintfo letinjengaleti “batawudlanga ngebubi.” (2 KuThimothi 3:1-5, 13) Kuze utfole lokunyenti, fundza sihloko lesitsi “Did the Bible Predict the Way People Think and Act Today?” lesitfolakala ngesiNgisi.

Bantfu labanyenti bayatibuta, ‘Nkulunkulu akativimbi leni tintfo letimbi njengalokudutjulwa etikolweni kutsi tingenteki?’ Kuze utfole imphendvulo leseBhayibhelini, fundza sihloko lesitsi “Izinto Ezimbi Zenzeka Kubantu Abalungile—Kungani?” lesitfolakala ngesiZulu.

Singabhekana njani nalobubi lobunje?

•  ‘Tintfo letabhalwa kadzeni tabhalelwa kufundzisa tsine . . . kuze kutsi ngendvudvuto lesiyitfola emiBhalweni sibe nelitsemba.’—KubaseRoma 15:4.

Timiso teliBhayibheli tingakusita ubhekane nebudlova lobukulelive. Kuze utfole kwatiswa lokunyenti, fundza magazini iPhaphama! lenesihloko lesitsi “Ingabe Ubudlova Buyoke Buphele?” letfolakala ngesiZulu.

Kuze utfole kutsi batali bangabasita njani bantfwana babo babhekane nemibiko yetindzaba leyetfusako, fundza sihloko lesitsi “Imibiko Yezindaba Ethusayo Nezingane Zakho,” lesitfolakala ngesiZulu.

Buyawuke buphele yini lobudlova?

•  “Itawubakhulula ekucindzetelweni nasebudloveni.”—Tihlabelelo 72:14.

•  “Tiyawugucula tinkemba tato titente tibe ngemakhuba, tikhali tato titente tikelo tekutsena tihlahla. Sive ngeke siphindze silwe nalesinye sive, futsi ngeke tiphindze ticeceshelwe kulwa imphi.”—Mikha 4:3.

Nkulunkulu utawukwenta loko bantfu labehluleka kukwenta. UMbuso wakhe longuhulumende wasezulwini utawucedza tonkhe tikhali futsi ucedze nabo bonkhe budlova. Kuze utfole lokunyenti ngaloko lokutakwentiwa nguMbuso waNkulunkulu, fundza sihloko lesitsi “Lapho Sekubusa UMbuso KaNkulunkulu, ‘Kuyochichima Ukuthula’” lesitfolakala ngesiZulu.