Litsini LiBhayibheli Ngemphi LeseMiddle East?

Emhlabeni wonkhe bantfu bakhatsatekile ngekutsi kutokwentekani ngekungevani lokukhona emkhatsini weMelika, i-Israyeli kanye ne-Iran. Lokungevani kutawugcine kubange imphi lenkhulu yini? Bohulumende bangakhona yini kuvimba kutsi kucale tiphitsiphitsi letinebudlova futsi baletse kuthula emhlabeni?

Labo labasatiko siphrofetho seliBhayibheli bangahle batibute kutsi lemphi leseMiddle East isho kucala kwemphi ye-Amagedoni lokukhulunywa ngayo encwadzini yeSembulo yini.

Litsini liBhayibheli?

Bohulumende batayicedza yini imphi leseMiddle East?

LiBhayibheli litsi: “Ningalibeki litsemba lenu kubaholi nobe kumuntfu, ngobe ngeke akhone kunisindzisa.”​—Tihlabelelo 146:3.

Kutawubonakala njengobe sikhatsi sichubeka kutsi bohulumende batawukhona yini kuletsa kuthula eMiddle East. Nobe kunjalo, liBhayibheli likwenta kucace kutsi kute umbusi, hulumende webantfu nobe licembu lebantfu lelingaletsa kuthula lokungahlala phakadze. NguNkulunkulu kuphela ‘longacedza timphi emhlabeni wonkhe.’​—Tihlabelelo 46:9.

• Kuze utfole lokunyenti, fundza Sicongosekulindza lesinesihloko lesitsi, “Imphi Itawuphela​​—Kanjani?”

Imphi leseMiddle East igcwalisa siphrofetho yini?

LiBhayibheli litsi: “Nitawuva ngetimphi etindzaweni letehlukahlukene. . . . Sive sitawuvukela lesinye sive, nembuso uvukele lomunye umbuso.”​—Matewu 24:6, 7.

Lokungevani lokukhona eMiddle East kungulokunye lokukhombisa kutsi ‘sesisekupheleni kwalelive?’ futsi kwengeta bufakazi bekutsi siphila “emalangeni ekugcina.” (Matewu 24:3; 2 KuThimothi 3:1) Letimphi lesitibonako lamuhla tikhombisa kutsi madvutane Nkulunkulu utaticedza timphi kanye nato tonkhe tinkinga letihlasele bantfu.

• Kuze utfole lokunyenti, fundza sihloko lesitsi, “Sitawubona Ngani Kutsi Sesiphila “Emalangeni Ekugcina”?”

I-Amagedoni itawucala eMiddle East yini?

LiBhayibheli litsi: “Tawabutsela ndzawonye lamakhosi endzaweni ngesiHebheru lebitwa ngekutsi yi-Amagedoni.”​—Sembulo 16:16.

Imphi ye-Amagedoni ayisiyo imphi lesemkhatsini wabohulumende bebantfu lecala eMiddle East. Iyimphi yemhlaba wonkhe lesemkhatsini waNkulunkulu kanye nabohulumende bebantfu.

• Kuze utfole lokunyenti, fundza sihloko lesitsi “Iyini Imphi Ye-Amagedoni?”

Yini lengasisita sibhekane netikhatsi letimatima?

LiBhayibheli litsi: “Ningakhatsateki ngalutfo, kodvwa kuko konkhe ticelo tenu atatiwe nguNkulunkulu ngekuthantaza, ngekuncusa nangekubonga.”​—KubaseFiliphi 4:6.

Jehovaa Nkulunkulu usimema kutsi sithantaze kuye ngobe unendzaba natsi, utayilalela imithantazo yetfu futsi utasisita sikhone kubhekana nekukhatsateka. (1 Phetro 5:7) Lenye indlela lakwenta ngayo loku, kusisita sicondze kutsi yini lebangela kutsi kube netimphi, titocedvwa kanjani kanye nekutsi yini latoyenta kuze acedze buhlungu nekuhlupheka.​—Sembulo 21:3, 4.

• Kuze utfole lokunyenti ngendlela Nkulunkulu lasisita ngayo, fundza sihloko lesitsi, “IBhayibheli Linawo Yini Amazwi Enduduzo ,”lesitfolakala ngesiZulu.