Litsini LiBhayibheli NgaKhisimusi?

Lokushiwo liBhayibheli

LiBhayibheli alisho kutsi Jesu watalwa nini futsi alisho nekutsi kufanele siligubhe lilanga lekutalwa kwakhe. Kunjengobe I-Cyclopedia yaMcClintock naStrong isho: “Nkulunkulu akazange ayale emaKhristu kutsi agubhe Khisimusi, futsi akukhulunywa ngawo ngisho naseThestamentini Lelisha.”

Nakuhlolisiswa umlandvo waKhisimusi, kutfolakele kutsi usukela emasikweni enkholo yemacaba. LiBhayibheli liveta kutsi siyamkhuba Nkulunkulu nasetama kumkhonta ngendlela langayemukeli.​—Eksodusi 32:5-7.

Umlandvo wemasiko aKhisimusi

1. Kugujwa kwelilanga lekutalwa kwaJesu: “EmaKhristu ekucala bekangaligubhi lilanga laJesu lekutalwa ngobe ngaleso sikhatsi bekwatiwa kutsi kugubha lilanga lekutalwa lanobe ngubani bekungumkhuba wemacaba.”​—I-The World Book Encyclopedia.

2. December 25: Kute bufakazi lobukhombisa kutsi Jesu watalwa ngalelilanga. Kungenteka baholi bemasontfo bakhetsa lelilanga kuze licondzane nemikhosi yemacaba leba khona ebusika.

3. Kuphana tipho, imicimbi kanye nemaphathi: I-The Encyclopedia Americana itsi: “Tintfo letinyenti letentiwa ngaKhisimusi takotjwa ku-Saturnalia, umbutsano wemaRoma lebewugujwa emkhatsini waDecember. Sibonelo nje, kwakotjwa kuphana tipho, kushiswa kwemakhandlela kanye nekuba nemicimbi.” I-Encyclopædia Britannica itsi “bekuvalwa emabhizinisi futsi kungasetjentwa” ngalelilanga le-Saturnalia.

4. Emalambu aKhisimusi: Ngekusho kwe-The Encyclopedia of Religion, bantfu base-Europe bebahlobisa emakhaya abo “ngemalambu kanye nangeluhlobo lolutsite lwetihlahla” kuze bagubhe kungena kwebusika futsi bacoshe nemimoya lemibi.

5. I-Mistletoe ne-holly: “Ema-Druids akholelwa kutsi i-mistletoe inemandla ekwenta imilingo. I-holly beyikhontwa njengesetsembiso sekutsi lilanga litawubuya.”​—I-The Encyclopedia Americana.

6. Sihlahla saKhisimusi: “Ngemuva kwekutsi emacaba ase-Europe aphendvukele enkholweni yebuKhristu, achubeka nekukhonta tihlahla.” Lenye indlela lekhombisa kutsi kukhontwa kwesihlahla kwachubekela enkholweni yebuKhristu, “kubekwa kwesihlahla saKhisimusi ngaphandle emnyango nobe ngekhatsi endlini ngesikhatsi semaholide asebusika.”​—I-Encyclopædia Britannica.