UMbuso WaNkulunkulu Usenhlitiyweni Yakho Yini?
Lokushiwo liBhayibheli
Cha, uMbuso waNkulunkulu awukho etinhlitiyweni tebantfu labatsi bayakholwa.a LiBhayibheli liwubita ngekutsi ‘nguMbuso welizulu’ ngobe usezulwini. (Matewu 4:17, LiBhayibheli LesiSwati Lelivamile) Naka kutsi liBhayibheli likhombisa njani kutsi loMbuso unguhulumende mbamba lobusa usezulwini.
UMbuso waNkulunkulu unebabusi, bantfu lobabusako, imitsetfo kanye nemigomo losekelwe kuwo kuze kufezeke intsandvo yaNkulunkulu ezulwini nasemhlabeni.—Matewu 6:10; Sembulo 5:10.
Hulumende waNkulunkulu nobe uMbuso utawubusa “bonkhe bantfu, netive kanye nebantfu labakhuluma tilwimi letehlukahlukene” emhlabeni. (Danyela 7:13, 14) Ligunya lekubusa kwawo aliveli kubantfu, kodvwa livela ngalokucondzile kuNkulunkulu.—Tihlabelelo 2:4-6; Isaya 9:7.
Jesu watjela bafundzi bakhe labetsembekile kutsi bebatawuba naye eMbusweni wasezulwini kuze bahlale naye “etihlalweni tebukhosi.”—Lukha 22:28, 30.
LoMbuso unetitsa lotatibhubhisa.—Tihlabelelo 2:1, 2, 8, 9; 110:1, 2; 1 KubaseKhorinte 15:25, 26.
LiBhayibheli alifundzisi kutsi uMbuso wemazulu usenhlitiyweni ngemcondvo wekutsi ubusa usenhlitiyweni yemuntfu. Nobe kunjalo, liyasho kutsi “livi lelimayelana neMbuso” nobe tindzaba “letimnandzi teMbuso” kufanele titsintse inhlitiyo yemuntfu.—Matewu 13:19; 24:14.
Asho kutsini emavi latsi “umbuso waNkulunkulu ukini”?
Indlela emavi lakuLukha 17:21 labekeke ngayo kulamanye emahumusho eliBhayibheli adide labanye bantfu mayelana nekutsi uMbuso waNkulunkulu ukuphi. Sibonelo nje, LiBhayibheli LesiSwati Lelivamile litsi “umbuso waNkulunkulu ukini.” Kuze silicondze kahle lelivesi, kufanele sibuke kutsi bekukhulunywa ngani.
UMbuso waNkulunkulu bewungekho etinhlitiyweni talabaphikisi baJesu labababulali futsi labanetinhlitiyo letilukhuni
Jesu bekakhuluma nebaFarisi, licembu lebaholi benkholo lebebamphikisa futsi lababa nencenye ekuhleleni kubulawa kwakhe. (Matewu 12:14; Lukha 17:20) Kunengcondvo yini kucabanga kutsi uMbuso bewusetinhlitiyweni tabo letilukhuni? Jesu watsi kubo: “Ngekhatsi nigcwele kutentisa nebubi.”—Matewu 23:27, 28.
Lamanye emahumusho awabeka ngendlela lecacile emavi aJesu lakuLukha 17:21 latsi: “UMbuso waNkulunkulu usemkhatsini wenu.” (Lihumusho Lemhlaba Lomusha, umbhalo longentasi) Ngako uMbuso wemazulu bewusemkhatsini webaFarisi ngemcondvo wekutsi Jesu, loyiNkhosi yaloMbuso, bekeme emkhatsini wabo.—Lukha 1:32, 33.
a Emasontfo lamanyenti latsi ebuKhristu afundzisa kutsi uMbuso waNkulunkulu ungekhatsi kumuntfu nobe enhlitiyweni yakhe. Sibonelo nje, lisontfo lema-Southern Baptist Convention leliseMelika latsi uMbuso waNkulunkulu usho “kubusa kwaNkulunkulu enhlitiyweni nobe ekuphileni kwemuntfu.” Avumelana naloko, Pope Benedict XVI, encwadzini yakhe letsi Jesus of Nazareth watsi, “uMbuso waNkulunkulu uwutfola ngekutsi ube nenhlitiyo lelalelako.”