Kusono Yini Kugembula?

Lokushiwo liBhayibheli

Nanobe liBhayibheli lingakhulumi kakhulu ngekugembula, kodvwa singawati umbono waNkulunkulu ngako nasisebentisa timiso teliBhayibheli.​—Kubase-Efesu 5:17.a

• Kugembula kusekelwe etentweni tebugovu, leto letenyanywa nguNkulunkulu. (1 KubaseKhorinte 6:9, 10; Kubase-Efesu 5:3, 5) Labagembulako bafuna kutfola imali ngekulahlekelwa kwalabanye, kodvwa liBhayibheli liyabalahla bantfu labatsatsa tintfo talabanye.​—Eksodusi 20:17; KubaseRoma 7:7; 13:9, 10.

• Ngisho nobe kukwemali lencane, kugembula kungakwenta ugcine sewuyitsandza kakhulu imali.​—1 KuThimothi 6:9, 10.

• Bantfu labagembulako betsembela enhlanhleni. Nobe kunjalo, Nkulunkulu ukutsatsa njengekukhonta titfombe kwenta kanjalo, futsi akuvumelani nendlela lafuna kukhontwa ngayo.​—Isaya 65:11.

• Kunekutsi silwele kutfola tintfo lesingakatisebenteli, liBhayibheli lisikhutsata kutsi sisebente kamatima. (Umshumayeli 2:24; Kubase-Efesu 4:28) Labo labasebentisa leseluleko seliBhayibheli ‘batawudla kudla labakusebentele.’​—2 KubaseThesalonika 3:10, 12.

• Kugembula kungakhulisa umoya wekuncintisana, lokungumkhuba liBhayibheli lelingawukhutsati.​—KubaseGalathiya 5:26.