Siyini Silwane Sesiganga Lesibovu LesikuSembulo Sehluko 17?

Lokushiwo liBhayibheli

Lesilwane sesiganga lesibovu lesikuSembulo sehluko 17, simelela inhlangano lenenjongo yekuletsa bunye futsi imelele tonkhe tive temhlaba. Sacale sabitwa ngekutsi Yinhlangano Yetive Letihlangene futsi nyalo sesibitwa ngekutsi nguMhlabuhlangene.

Tindlela tekubona lesilwane sesiganga lesibovu

1. Siyinhlangano yetepolitiki. Lesilwane sesiganga lesibovu ‘sinetinhloko letingu-7’ letimelela “tintsaba letingu-7” kanye ‘nemakhosi langu-7,’ nobe imibuso. (Sembulo 17:9, 10) EBhayibhelini, tintsaba kanye netilwane tesiganga timelela bohulumende.​—Jeremiya 51:24, 25; Danyela 2:44, 45; 7:17, 23.

2. Sifana netinhlangano tetepolitiki letikhona emhlabeni. Lesilwane sesiganga lesibovu sifana nesilwane sesiganga lesinetinhloko letingu-7 lesikuSembulo sehluko 13, lesimelela tonkhe tinhlangano tetepolitiki letikhona emhlabeni wonkhe. Totimbili letilwane tesiganga tinetinhloko letingu-7, timphondvo letingu-10 kanye nemagama lahlambalatako. (Sembulo 13:1; 17:3) Lokufana kukhulu kakhulu kutsi kungenteka ngengoti. Lesilwane sesiganga lesibovu singumfanekiso, nobe sifana netinhlangano tetepolitiki letikhona emhlabeni wonkhe.​—Sembulo 13:15.

3. Sitfola emandla kuleminye imibuso. Lesilwane sesiganga lesibovu “sivela,” nobe sakhiwa ngulabanye bohulumende.​—Sembulo 17:11, 17.

4. Siyincenye yenkholo. IBhabulona Lenkhulu, lokuyinhlangano yenkholo yemanga ihleti etikwalesilwane sesiganga lesibovu, lokusho kutsi lesilwane sesiganga sicondziswa ngemacembu enkholo.​—Sembulo 17:3-5.

5. Sihlambalata Nkulunkulu. Lesilwane sesiganga ‘sigcwele emagama lahlambalatako.’​—Sembulo 17:3.

6. Angeke sisebente sikhashana lesitsite. Lesilwane sesiganga lesibovu sitawuba ‘semgodzini longenamkhawulo,’a nobe singasebenti sikhashana lesitsite, kodvwa sitawuphindze sisebente.​—Sembulo 17:8.

Siphrofetho seliBhayibheli siyagcwaliseka

Cabanga ngendlela Inhlangano Yetive Letihlangene kanye naleyo leta emva kwayo lokunguMhlabuhlangene, letigcwalisa ngayo siphrofetho seliBhayibheli lesimayelana nesilwane sesiganga lesibovu.

1. Iyinhlangano yetetepolitiki. Mhlabuhlangene usekela tinhlangano tetepolitiki ngekutsi akhutsate “kulingana kuwo onkhe emalunga akhe.”b

2. Ifana netinhlangano tetepolitiki letikhona emhlabeni. Nga-2011, Mhlabuhlangene wengeta lilunga lesi-193 kumalunga akhe. Kungako atsi umelela yonkhe imibuso kanye nebantfu emhlabeni.

3. Itfola emandla kuleminye imibuso. Mhlabuhlangene ukhona ngenca yetive letingemalunga akhe, futsi timnika emandla kanye neligunya.

4. Iyincenye yenkholo. Kokubili Inhlangano Yetive Letihlangene kanye naMhlabuhlangene kuchubeka kusekelwa tinkholo letisemhlabeni wonkhe.c

5. Ihlambalata Nkulunkulu. Mhlabuhlangene wasungulwa “kuze uletse kuthula kanye nekulondzeka emhlabeni wonkhe.”d Ngisho nobe umgomo wayo umuhle, kodvwa i-UN ihlambalata Nkulunkulu ngobe itsi yenta loko lokutokwentiwa nguMbuso waNkulunkulu kuphela.​—Tihlabelelo 46:9; Danyela 2:44.

6. Angeke isebente sikhashana lesitsite. Inhlangano Yetive Letihlangene, leyasungulwa ngekushesha ngemuva kweMphi Yelive Yekucala kuze iletse kuthula, ayikhonanga kucedza intfukutselo yemave emhlaba. Yayekela kusebenta nakucala iMphi Yelive Yesibili nga-1939. Nakuphela iMphi Yelive Yesibili nga-1945, kwase kusungulwa Mhlabuhlangene. Imigomo yakhe, indlela yekusebenta kanye nendlela lahlelwe ngayo kuyafana nekweNhlangano Yetive Letihlangene.