KUCHAZWA KWEMAVESI LASEBHAYIBHELINI
Numeri 6:24-26—“Shangatsi Simakadze Angakubusisa Akugcine”
“Shengatsi Jehova anganibusisa futsi anivikele. Shengatsi Jehova angenta buso bakhe bukhanye kini, futsi anemukele. Shengatsi Jehova anganentela umusa, aphindze anente nibe nekuthula.”—Numeri 6:24-26, Lihumusho Lemhlaba Lomusha.
“Shangatsi Simakadze angakubusisa akugcine. Shangatsi Simakadze angakhanyisa buso bakhe kuwe, abe nemusa kuwe. Shangatsi Simakadze angaphakamisela buso bakhe ngakuwe, akuphe nekuthula.”—Numeri 6:24-26, LiBhayibheli LesiSwati Lelivamile.
Usho kutsini Numeri 6:24-26
Lamavi atiwa ngekutsi asibusiso sebaphristi lesetsiwa nga-Aroni njengobe bekangumphristi lomkhulu wekucala ka-Israyeli. (Eksodusi 28:1) Lamavi bekachamuka kuNkulunkulu. (Numeri 6:22, 23) Watsi kuMosi: “Tjela Aroni nemadvodzana akhe utsi: ‘Nayi indlela lokufanele nibusise ngayo ema-Israyeli.’” Ngemuva kwaloko washo lamavi lakuNumeri 6:24-26. Baphristi labetsembekile bawulalela lomyalo lovela kuNkulunkulu. Bebaphindze balihloniphe libito laNkulunkulu lelitsi Jehova.a Vesi 27 utsi: “Kufanele [baphristi] basebentise libito lami nababusisa ema-Israyeli, kuze nami ngiwabusise.”
“Shengatsi Jehova anganibusisa futsi anivikele.” Jehova ubusisa tikhonti takhe ngekutivikela, ngekuticondzisa kanye nekutenta tiphumelele. (Taga 10:22) NgesiHebheru, kuNumeri 6:24-26 ligama lelitsi “anganibusisa” nalelitsi “anivikele” abekwe aba sebunyeni. Loku kuveta kutsi Nkulunkulu bekangagcini nje ngekuba nesifiso sekubusisa sonkhe lesive, kodvwa bekafuna nekubusisa nem-Israyeli ngamunye.
“Shengatsi Jehova angenta buso bakhe bukhanye kini, futsi anemukele.” Nangabe umuntfu acela Nkulunkulu kutsi ente “buso bakhe bukhanye” kuye, bekusho kutsi loyo muntfu ucela kutsi Nkulunkulu amkhombise umusa futsi amemukele.b Lamavi angaphindze ahunyushwe ngalendlela: “Shengatsi INKHOSI ingamamatseka nayikubuka.” (Numeri 6:25, New International Reader’s Version) Jehova ukhombisa kutsi uyabemukela bantfu bakhe ngekutsi abe nemusa kubo aphindze abavele.—Isaya 30:18.
“Shengatsi Jehovac anganentela umusa, aphindze anente nibe nekuthula.” Jehova utentela umusa tikhonti takhe ngekutitsandza, atinake futsi atinike kuthula. Ngekusho kwalenye incwadzi, “ligama lesiHebheru lelisho kuthula (shalom) lisho kutsi umuntfu unekuthula kwangekhatsi kanye nebuhlobo lobuhle naNkulunkulu, kodvwa leligama alisho kutsi umuntfu akwenteki acabane nalabanye bantfu.”
Kuze ema-Israyeli atitfole letibusiso lokukhulunywa ngato kulamavesi bekufanele alalele Jehova. (Levithikhusi 26:3-6, 9) Nawamlalela, bekawasita njengobe bekawatsembisile. Nguloko lokwenteka ngesikhatsi kubusa lamanye emakhosi, njengaSolomoni naHezekiya.—1 Emakhosi 4:20, 25; 2 Tikhronike 31:9, 10.
Nanobe emaKhristu kungadzingeki kutsi ahlale asho lamavi, kodvwa angawasebentisa nawathantaza ngalabanye bantfu kuNkulunkulu nobe nawakhutsata lamanye emaKhristu. (1 KubaseThesalonika 5:11, 25) Jehova akashintji. Uhlale afuna kutivikela aphindze atibusise tikhonti takhe letetsembekile. Loku kungenta emaKhristu eliciniso abe nekuthula ngoba ayati kutsi “buso” baJehova bukhanya ngakubo.
Loko Numeri 6:24-26 lokhuluma ngako
Tehluko tekucala letingu-10 tencwadzi yaNumeri tineticondziso Nkulunkulu latinika ema-Israyeli ngesikhatsi asentsabeni yaseSinayi alibangise eVeni Lesetsembiso. Ema-Israyeli ahlala umnyaka entsabeni yaseSinayi. Ngalesosikhatsi Jehova wahlela labantfu babasive futsi wabanika imitsetfo leyatiwa ngekutsi nguMtsetfo wesivumelwano.
Jehova waphindze watjela Mosi kutsi Aroni nemadvodzana akhe, lebebakhetfwe kutsi babe baphristi, bekufanele babusise ema-Israyeli. (Numeri 6:22, 23) Ngemuva kwaloko, Aroni kanye nesitukulwane sakhe basebentisa emavi latfolakala kuNumeri 6:24-26 kuze babusise lesive. Ngekuhamba kwesikhatsi kwabalisiko ngemphristi kutsi asho lamavi lasibusiso ngemva kwemnikelo wekugcina wangalelolanga.
Bukela le-video lemfishane kuze ubone loko lokukhulunywa ngako kulencwadzi yaNumeri.
a Jehova ligama laNkulunkulu lelisuselwa elulwimini lwesiHebheru. Kuze utfole kutsi yini leyenta lamanye emahumusho eliBhayibheli asebentise sicu lesitsi Simakadze esikhundleni seligama laNkulunkulu, fundza sihloko lesitsi “Ungubani Jehova?”
b LiBhayibheli litsi Jehova wafihlela ema-Israyeli buso bakhe ngobe bekangavumelani naloko lebekakwenta.—Isaya 59:2; Mikha 3:4.
c Ngekusho kwe-NIV study Bible, kuphindvwaphindvwa kweligama laNkulunkulu kulamavesi “kwentelwe kugcizelela emavi lasevesini 27.” Nobe kunjalo, labanye bacabanga kutsi lokuvela katsatfu kweligama laNkulunkulu kulamavesi kusekela inkholelo yaMtsatfu Amunye. Loku akusilo liciniso. Lokunye kukhulunyelwa kweliBhayibheli lokusekela inkholelo yaMtsatfu Amunye kuyavuma kutsi kusetjentiswa kweligama laNkulunkulu katsatfu kulamavesi “bekungeke kwente umphristi lebekasho lesibusiso, nobe labantfu lebebasiva bacabange ngaMtsatfu Amunye. Kubo lokuphindvwa katsatfu kweligama laNkulunkulu bekwenta lesibusiso sibesihle futsi siphelele.” (The Pulpit Commentary, Umculu 2, likhasi 52) Kuze utfole lokunyenti, fundza sihloko lesitsi “Nkulunkulu UnguMtsatfu Amunye Yini?”