Incwadzi Yekucala YeTikhronike
19 Ngemuva kwesikhatsi, Nahashi inkhosi yema-Amoni wafa futsi indvodzana yakhe yaba yinkhosi esikhundleni sakhe.+ 2 Davide wabese utsi: “Ngitamentela umusa+ Hanuni indvodzana yaNahashi njengobe kwenta babe wakhe kimi.” Ngako Davide watfumela tinceku takhe kutsi tiyomdvudvuta ngobe afelwe ngubabe wakhe. Kodvwa ngesikhatsi tinceku taDavide tifika eveni lema-Amoni+ kute titewudvudvuta Hanuni, 3 tindvuna takhona tatsi kuHanuni: “Ucabanga kutsi Davide uhlonipha babe wakho yini ngekutfumela bantfu kutsi batokudvudvuta? Awucabangi yini kutsi utfumele letinceku takhe kuze tibe tinhloli kulelidolobha tiphindze tibukisise lelive bese tiyakuketula?” 4 Ngako Hanuni watsatsa letinceku taDavide watihhula tilevu+ futsi wajuba netembatfo tato ekhatsi macondzana netibunu wase uyatijikisa. 5 Davide watsi nakatjelwa ngalamadvodza, wavele watfumela lamanye emadvodza kutsi ayowahlangabeta ngobe lamadvodza abehlaziswe kakhulu; futsi inkhosi yatsi kuwo: “Hlalani eJerikho+ tize tikhule tilevu tenu bese niyabuya.”
6 Ngekuhamba kwesikhatsi, ema-Amoni abona kutsi asaliphunga lelibi kuDavide, ngako Hanuni kanye nema-Amoni batfumela emathalenta* langu-1 000 elisiliva ekucasha tinkalishi kanye nebagibeli bemahhashi baseMesophothamiya,* e-Aramu-makha naseSobha.+ 7 Baticasha ngaleyo ndlela netinkalishi letingu-32 000, inkhosi yaseMakha kanye nebantfu bayo. Ngemuva kwaloko bafike bamisa emathende embikwaseMedeba.+ Ema-Amoni abutsana ndzawonye esuka emadolobheni awo futsi aphuma aya emphini.
8 Nakeva ngaloko Davide watfumela Jowabe+ nalo lonkhe libutfo, lokufaka ekhatsi emasotja akhe langemachawe.+ 9 Ema-Amoni aphuma futsi atihlela aba libutfo lemphi ekungeneni kwalelidolobha, ngesikhatsi lesifanako, emakhosi labesafikile bekeme odvwana endzaweni levulekile.
10 Ngesikhatsi Jowabe abona kutsi lelibutfo belisondzela kuye lichamuka ngembili nangemuva, wakhetsa lamanye kumasotja aka-Israyeli langemachawe, wawahlela kuze ayokulwa nemaSiriya.+ 11 Onkhe lalamanye emasotja wawanika Abishayi umnakabo+ kutsi abe ngumcondzisi* wawo kuze awahlelele kuyokulwa nema-Amoni. 12 Jowabe wase utsi kumnakabo: “Nangabe libutfo lemaSiriya+ liba nemandla kunami ubokuta utongilekelela; kodvwa nangabe libutfo lema-Amoni liba nemandla kunawe, ngitakuta ngitokulekelela. 13 Kufanele sicine futsi sibe nesibindzi+ silwele bantfu bakitsi nemadolobha aNkulunkulu wetfu, futsi Jehova utawenta lokulungile emehlweni akhe.”
14 Ngemuva kwaloko Jowabe nelibutfo lakhe balisondzelela libutfo lemaSiriya kuze balwe nalo futsi lababalekela.+ 15 Ngesikhatsi ema-Amoni abona kutsi emaSiriya sekabalekile, nawo abalekela Abishayi, umnakabo, angena ngekhatsi edolobheni. Ngemuva kwaloko Jowabe waya eJerusalema.
16 Atsi emaSiriya nakabona kutsi ema-Israyeli asawancobile, ase atfumela titfunywa kutsi tiyolandza emaSiriya lasesigodzini seMfula,*+ futsi abeholwa nguShofaki indvuna yelibutfo lemphi laHadadezeri.+
17 Kwatsi nakufika umbiko kuDavide, ngekushesha wabita onkhe ema-Israyeli, bewela iJordane futsi befika kuwo batihlela baba libutfo bamelana nawo. Davide wawahlela aba libutfo lelilungele imphi kuze ahlangane nemaSiriya futsi balwa nawo.+ 18 Kodvwa emaSiriya ambalekela Israyeli futsi Davide wabulala emasotja lebekagibele tincola temahhashi langu-7 000 kanye nalangu-40 000 labekahamba ngetinyawo, wase ubulala Shofaki indvuna yelibutfo. 19 Ngesikhatsi tinceku taHadadezeri tibona kutsi setehlulwe ngema-Israyeli,+ ngekushesha takha kuthula naDavide futsi taba ngephansi kwakhe;+ emaSiriya awazange aphindze afune kusita sive sema-Amoni.