LiBhayibheli Lingakusita Yini Nawunekugula Lokungapheli?

Lokushiwo liBhayibheli

Yebo. Nkulunkulu unendzaba netikhonti takhe letigulako. Nalikhuluma ngemuntfu waNkulunkulu lowetsembekile, liBhayibheli litsi: “Jehova utamcinisa nakagula; utamnakekela ekuguleni kwakhe.” (Tihlabelelo 41:3) Nangabe unekugula lokungapheli, letindlela letintsatfu letilandzelako tingakusita:

1. Thantaza ucele emandla ekucinisela. Ungatfola “kuthula kwaNkulunkulu lokwendlula konkhe kucondza,” lokutakusita ucinisele ngisho nobe kumatima.​—KubaseFiliphi 4:6, 7.

2. Bani nesimo sengcondvo lesihle. LiBhayibheli litsi: “Kuhlala ujabulile kungumutsi lophilisako; kodvwa lohlala akhubekile utsatsa lejubako leya ekufeni.” (Taga 17:22, LiBhayibheli LeSiSwati Lelivamile) Yetama kwenta emahlaya, ngobe loku kutakusita uhlale ujabulile etikhatsini letimatima futsi ube nemphilo lenhle.

3. Tetsembe tetsembiso taNkulunkulu ngelikusasa. Kuba nelitsemba lelihle kungakusita uhlale ujabulile ngisho nobe unekugula lokungapheli. (KubaseRoma 12:12) LiBhayibheli likhuluma ngesikhatsi lapho ‘sekute lohlala khona loyawutsi: “Ngiyagula.”’ (Isaya 33:24) Nkulunkulu utawelapha konkhe kugula lokungapheli, bodokotela labehlulekako kukwelapha. Sibonelo saloko kutsi liBhayibheli lichaza indlela bantfu labagugile labatawubuyela ngayo ebusheni futsi babe nemphilo lenhle, nalitsi: “Umtimba wakhe awube musha kunewemntfwana; akabuyele abe nemandla njengalapho asemusha.”​—Jobe 33:25.

Naka: Nanobe balwemukela lusito loluvela kuNkulunkulu, BoFakazi BaJehova bayaya etibhedlela kuze batfole lusito nabanekugula lokungapheli. (Makho 2:17) Nobe kunjalo, kute imitsetfo lesiyibekile yekutsi umuntfu kufanele elashwe njani; kunaloko, umuntfu ngamunye uyatikhetsela indlela lafuna kwelashwa ngayo.