Ukhona Yini Nkulunkulu?

Lokushiwo liBhayibheli

Yebo, liBhayibheli liniketa bufakazi lobucinile bekutsi Nkulunkulu ukhona. Lisikhutsata kutsi sisebentise “ingcondvo” yetfu kanye ‘nelikhono letfu lekucabanga’ kuze sakhe kukholwa kuNkulunkulu, singamane nje sikholwe loko lokushiwo tinkholo. (KubaseRoma 12:1; 1 Johane 5:20, umbhalo longentasi) Cabanga nganankha emaphuzu lanengcondvo lasekelwe eBhayibhelini:

• Kuhleleka kwetintfo letidaliwe kukhombisa kutsi kuneMdali. LiBhayibheli litsi: “Ecinisweni, nguleyo naleyondlu inemakhi wayo, kodvwa loyo lowakhe tonkhe tintfo nguNkulunkulu.” (KumaHebheru 3:4) Nanobe loko lokushiwo ngulelivesi kumelula, kodvwa bantfu labanyenti labafundze kakhulu batsi lawa ngemavi lanemandla.a

• Njengobe sibantfu, sinesifiso lesikhulu sekucondza injongo yekuphila, futsi lesifiso sichubeka sikhona ngisho sesitenetisile tidzingo tetfu tenyama. LiBhayibheli libita lesifiso ngekutsi ‘kunakisisa tintfo letiphatselene naNkulunkulu,’ lokufaka ekhatsi sifiso sekumati nekumkhonta. (Matewu 5:3; Sembulo 4:11) Kunakisisa tintfo letiphatselene naNkulunkulu akuveti nje kuphela kutsi Nkulunkulu ukhona kodvwa kuphindze kuvete kutsi uMdali wetfu lonelutsandvo ufuna sisenetise sidzingo setfu sekumati.​—Matewu 4:4.

• Tiphrofetho teliBhayibheli letichaza yonkhe imininingwane letabhalwa esikhatsini lesidze ngaphambi kwekutsi tenteke, tagcwaliseka njengobe bekubhaliwe. Kunemba nekushaya emhlolweni kwaletiphrofetho kufakazela kutsi tivela kumuntfu lophakeme kakhulu kunabo bonkhe bantfu.​—2 Phetro 1:21.

• 

  Babhali beliBhayibheli bebatati kancono tintfo letiphatselene nesayensi kwendlula bantfu lebebaphila ngesikhatsi sabo. Sibonelo saloko kutsi kadzeni bantfu bebakholelwa kutsi umhlaba usekelwe tilwane letinjengendlovu, ingulube nobe inkunzi. Ngalokwehlukile, liBhayibheli litsi Nkulunkulu ‘ulengisa umhlaba eteni.’ (Jobe 26:7) Ngalokufanako, liBhayibheli liphindze lichaze kutsi umhlaba ‘uyindingilizi.’ (Isaya 40:22) Bantfu labanyenti batsi kucondza kwebabhali beliBhayibheli lemininingwane leyinkimbinkimbi kufakazela kutsi batfola imilayeto levela kuNkulunkulu.

• LiBhayibheli liphendvula imibuto leminyenti lematima, futsi nayingakaphendvulwa kahle ingenta umuntfu angakholelwa kutsi Nkulunkulu ukhona. Nasi sibonelo salemibuto: Nangabe Nkulunkulu anelutsandvo futsi anawo onkhe emandla, kungani avumela bubi nekuhlupheka emhlabeni? Kungani inkholo ihlale inesandla lesikhulu etintfweni letimbi kunasetintfweni letinhle?​—KuThithusi 1:16.