SIFUNDVO 25
Iyini Injongo YaNkulunkulu Ngatsi?
LiBhayibheli liyavuma kutsi kuphila kwebantfu, ‘kufishane futsi kugcwele tinkinga.’ (Jobe 14:1) Ngulena yini imphilo Nkulunkulu lafuna siyiphile? Iyini injongo yakhe ngatsi? Iyoke ifezeke yini? Tfola timphendvulo letidvudvutako letiseBhayibhelini.
1. Jehova ufuna siphile imphilo lenjani?
Jehova ufuna siphile imphilo lencono kakhulu. Ngesikhatsi Nkulunkulu adala bantfu bekucala, bo-Adamu na-Eva, wababeka endzaweni lenhle lelipharadisi, lokuyingadze yase-Edeni. Ngako “Nkulunkulu wabese uyababusisa, watsi kubo: ‘Talanani nandze nigcwale emhlabeni futsi niwuncobe.’” (Genesisi 1:28) Jehova bekafuna kutsi babe nebantfwana, bente umhlaba wonkhe ube lipharadisi, futsi banakekele netilwane. Injongo yakhe ngebantfu beyikutsi bajabulele imphilo lemnandzi futsi baphile phakadze.
Ngisho nobe tintfo tingazange tenteke ngaleyo ndlela,a injongo yakhe ayikashintji. (Isaya 46:10, 11) Solo usafuna kutsi bantfu labamlalelako baphile phakadze bangahlushwa lutfo.—Fundza Sembulo 21:3, 4.
2. Singayijabulela njani imphilo lenenjongo nyalo?
Jehova wasidala saba nesifiso sekunaka “tintfo letiphatselene naNkulunkulu,” lokusifiso sekumati nekumkhonta. (Fundza Matewu 5:3-6.) Ufuna sibe nebuhlobo lobuhle naye, ‘sihambe ngato tonkhe tindlela takhe, simtsandze futsi simkhonte ngayo yonkhe inhlitiyo yetfu.’ (Dutheronomi 10:12; Tihlabelelo 25:14) Nasenta njalo, singajabula mbamba ngisho sinetinkinga. Kukhonta Jehova kwenta kutsi kuphila kwetfu kube nenjongo.
CHUBEKA UFUNISISA
Fundza ngelutsandvo lolukhulu Jehova lalukhombisa nakasilungiselela umhlaba, kanye naloko liVi lakhe lelikufundzisako ngenjongo yekuphila.
3. Jehova ufuna bantfu baphile imphilo lejabulisako
Dlala le-VIDEO, bese nicoca ngalombuto lolandzelako.
Kungani Nkulunkulu adala umhlaba waba muhle?
Fundza Umshumayeli 3:11, bese nicoca ngalombuto:
Loku kukufundzisani ngaJehova?
4. Injongo yaJehova ayikashintji
Fundza Tihlabelelo 37:11, 29 na-Isaya 55:11, bese nicoca ngalombuto:
Sati njani kutsi injongo yaJehova ngatsi ayikashintji?
Indlu lesesimeni lesibi isengalungiseka. Ngendlela lefanako, umhlaba lowentiwe bantfu waba sesimeni lesikabi, Nkulunkulu utawulungisela bantfu labamtsandzako
5. Kukhonta Jehova kwenta kuphila kwetfu kube nenjongo
Kwati injongo yekuphila kungasenta sijabule. Dlala le-VIDEO, bese nicoca ngalombuto lolandzelako.
Kwamsita njani Terumi kufundza ngenjongo yekuphila?
Fundza Umshumayeli 12:13, bese nicoca ngalombuto:
Njengobe Jehova asentele tintfo letinyenti kangaka, yini tsine lokufanele simentele yona?
LOMUNYE ANGASE AKUBUTE: “Iyini injongo yekuphila?”
Ungamphendvula utsini?
LOKO LESICOCE NGAKO
Jehova ufuna sikujabulele kuphila kuze kube phakadze emhlabeni lote kuhlupheka. Nasimkhonta ngenhlitiyo yetfu yonkhe, kuphila kwetfu kuba nenjongo ngisho kwanyalo.
Yini Loyifundzile?
Beyiyini injongo yaJehova yasekucaleni ngabo-Adamu na-Eva?
Sati njani kutsi injongo yaNkulunkulu ngebantfu ayikashintji?
Ungayitfola njani injongo yekuphila?
LOKUNYE LONGAKUHLOLA
Fundza kuze utfole bufakazi bekutsi ingadze yase-Edeni beyikhona mbamba.
“Insimi Yase-Edeni—Iyinganekwane Yini Nobe Iliciniso?” (Sicongosekulindza saJanuary 1, 2011)
Tfola kutsi kungani siciniseka kutsi umhlaba utawuhlala kuze kube phakadze.
Hlola loko lokushiwo liBhayibheli ngekutfola kuphila lokunenjongo.
Buka kutsi indvodza lebeyicabanga kutsi inako konkhe, yakutfola njani loko bekushoda ekuphileni kwayo.
a Esifundvweni lesilandzelako, utawufundza kutsi konakala kuphi.