IMIBUTO LEVELA KUBAFUNDZI
Emavi aDavide lakuTihlabelelo 37:25 kanye newaJesu lakuMatewu 6:33 asho kutsi Jehova akayuze amvumele yini umKhristu kutsi eswele kudla?
Davide wabhala watsi ‘akazange sekabone lolungile alahliwe, ngisho nebantfwana bakhe abahambi bacela kudla.’ Ngesikhatsi asho njalo, abekhuluma ngentfo leyenteke kuye matfupha. Bekati kahle kutsi Nkulunkulu uhlale anakekelana. (Hla. 37:25) Nome kunjalo, lamavi aDavide awasho kutsi tikhonti taNkulunkulu atesweli nome atiyuze teswele.
Betike tibe khona tikhatsi lapho kwayena Davide abebhekana netimo letimatima. Lesinye sato kungalesikhatsi abalekela Sawula. Kudla kwaDavide kwasekukuncane kakhulu, ngako wase ucela sinkhwa lebekatawusidla nalabo lebebanaye. (1 Sam. 21:1-6) Ngaleso sikhatsi, Davide ‘abecela kudla.’ Nome kunjalo, kulesimo lesimatima bekati kutsi Jehova akakamlahli. Ecinisweni, kute lasifundza khona kutsi kwadzingeka Davide ahambe acela kute atfole kudla khona angatewubulawa yindlala.
Embhalweni waMatewu 6:33, Jesu wasicinisekisa ngekutsi Nkulunkulu utawenetisa tidzingo tetinceku takhe letetsembekile letibeka tintfo letimayelana neMbuso kucala ekuphileni kwato. Watsi: “Ngako-ke chubekani nifuna kucala uMbuso waNkulunkulu nekulunga kwakhe, tonkhe leletinye tintfo [letifaka ekhatsi kudla, kwekunatsa kanye netimphahla] nitawengetelwa tona.” Nobe kunjalo, Jesu waphindze washo nekutsi ngenca yekuhlushwa, ‘banakabo’ bebatawulamba. (Mat. 25:35, 37, 40) Loko kwenteka kumphostoli Pawula. Ngaletinye tikhatsi abelamba futsi ome.—2 Khor. 11:27.
Jehova usitjela kutsi sitawuhlushwa ngetindlela letehlukehlukene. Angase avumele kutsi seswele letinye tintfo njengobe asisebentisa ekuphendvuleni tinsolo taDeveli. (Job. 2:3-5) Nasi sibonelo: Labanye bazalwane betfu, njengalabo labafakwa etinkambu tekuhlushwa temaNazi, baba sengotini lenkhulu ngenca yekuhlushwa. Lenye indlela leyayisetjentiswa kute kwetanywe kutsi BoFakazi bephule bucotfo, kwakukungabaniki kudla lokwenele. BoFakazi labetsembekile bachubeka nekulalela Jehova futsi akazange abalahle. Wabavumela kutsi babhekane nalesilingo njengobe avumela kutsi onkhe emaKhristu abhekane netilingo letehlukehlukene. Nome kunjalo, asingabati kutsi Jehova uyabasekela bonkhe labo labahlupheka ngenca yeligama lakhe. (1 Khor. 10:13) Kufanele sikhumbule emavi lakuFiliphi 1:29, latsi: “Ninikwe lilungelo ngenca yaKhristu, hhayi kuphela kutsi nikholwe nguye kodvwa nekutsi nihlupheke ngenca yakhe.”
Jehova wetsembisa kutsi utatinakekela tinceku takhe. Sibonelo saloko kutsi Isaya 54:17, utsi: “Kute sikhali lesilolelwa kulwa nawe lesiyawuphumelela.” Lesetsembiso kanye naletinye letifana naso, tiyasicinisekisa kutsi bonkhe bantfu baNkulunkulu bavikelekile. Kodvwa umKhristu ngamunye angabhekana nekuvivinywa, aze afe ngisho nekufa.