Yini Nkulunkulu Lakwentele Kona?

EBhayibhelini lilonkhe, lombhalo ungulomunye waleyatiwa iphindze icashunwe kakhulu. Kutsiwa alikho lelinye livesi lelibuchaza kahle buhlobo lobusemkhatsini waNkulunkulu nebantfu kanye nendlela yekusindziswa njengaleli. Ngaleso sizatfu, kulamanye emave, kuvame kunanyekwa lombhalo waJohane 3:16 noma-ke emavi awo etindzaweni lapho kunemcimbi khona, etimotweni, labanye bawabhala etibondzeni nakunoma ngutiphi letinye tindzawo.

Kungenteka kutsi bonkhe labo labenta njalo baciniseka ngekutsi lutsandvo lwaNkulunkulu lutabenta basindziswe phakadze. Wena-ke? Lutsandvo lwaNkulunkulu lusho kutsini kuwe? Ucabanga kutsi yini Nkulunkulu layentile lekhombisa kutsi uyakutsandza?

“NKULUNKULU WALITSANDZA KAKHULU LIVE”

Bantfu labanyenti bayavuma kutsi nguNkulunkulu lowadala konkhe lesikubonako, lokufaka ekhatsi nebantfu. Konkhe lokuphilako kwentiwe kahle nangendlela leyinkimbinkimbi, lokuyinkhomba yekutsi vele kunalotsite lohlakaniphe kakhulu lowakwenta. Bantfu labanyenti babonga Nkulunkulu onkhe emalanga ngenca yesipho sekuphila. Baphindze bayacondza kutsi betsembele ngalokuphelele kuNkulunkulu kute batfole tonkhe tidzingo tekuphila, letifaka ekhatsi umoya, emanti, kudla, kanye nemijikeleto yemvelo. Loko kubenta bachubeke baphila futsi bajabule ngalabakwentako.

Senta kahle ngekubonga Nkulunkulu ngato tonkhe letintfo, ngobe vele nguye uMdali neMlondvoloti wetfu. (Tihlabelelo 104:10-28; 145:15, 16; Imisebenti 4:24) Kucabanga ngaloko Nkulunkulu lasentele kona kute siphile kungasenta silwatise lutsandvo lasikhombise lona. Umphostoli Pawula ukubeka ngalendlela: “[Nkulunkulu] unika bonkhe bantfu kuphila, umoya, nato tonkhe tintfo. Ngaye siyaphila, siyanyakata, futsi sikhona.”​—Imisebenti 17:25, 28.

Nome kunjalo, lutsandvo lwaNkulunkulu lubonakala ngetindlela letinyenti ngaphandle nje kwendlela lasinakekela ngayo ekuphileni kwetfu kwamalanga onkhe. Uphindze wasenta sehluka kunetilwane, saba ngulabakhetsekile ngekutsi afake kitsi sifiso sekumati futsi uyasisita kute sisenetise. (Matewu 5:3) Ngaleyo ndlela, bantfu labalalelako banelitsemba lekuba semndenini waNkulunkulu, babe ‘bantfwana’ bakhe.​—Roma 8:19-21.

Umbhalo waJohane 3:16 uchubeka utsi Nkulunkulu wasikhombisa lutsandvo lwakhe ngekutfumela iNdvodzana yakhe, Jesu, kutsi ite emhlabeni itewusifundzisa ngaNkulunkulu longuYise wayo, iphindze isifele. Noko, bantfu labanyenti bayavuma kutsi abacondzi kahle kutsi bekudzingeke ngani kutsi Jesu asifele nekutsi kufa kwakhe kukhombisa njani kutsi Nkulunkulu uyasitsandza. Asesibone indlela liBhayibheli lelichaza ngayo sizatfu sekufa kwaJesu nekubaluleka kwako.

“WANIKELA NGENDVODZANA YAKHE LEKUPHELA KWAYO”

Bantfu abaphili phakadze, bahlaselwa kugula, baguge futsi bafe. Kodvwa akusiko loko Nkulunkulu Jehova labevele akuhlosile. Waniketa bantfu bekucala litsemba lekuphila phakadze emhlabeni lolipharadisi. Kepha bekunembandzela lowodvwa: Bekufanele bamlalele. Nkulunkulu watsi batawufa nangabe bakhetsa kungamlaleli. (Genesisi 2:17) Umuntfu wekucala akazange vele alihloniphe ligunya laNkulunkulu, loko kwabangela kutsi afe, loko kufa kwaphindze kwendlulela esitukulwaneni sakhe. Nakachaza loku, umphostoli Pawula utsi: “Ngako-ke ngemuntfu munye sono sangena eveni, nekufa kwangena ngesono, ngenca yaloko kufa kwasakatekela kubo bonkhe bantfu ngobe bonkhe bonile.”​—Roma 5:12.

Nome kunjalo, Nkulunkulu “uyakutsandza kwenta tintfo ngendlela lefanele.” (Tihlabelelo 37:28) Nanobe abengeke akushalatelele kona kwangemabomu kwemuntfu wekucala, Nkulunkulu akazange avumele kutsi bonkhe bantfu bacindzeteleke futsi bafe siphelane ngenca yekungalaleli kwemuntfu munye. Kepha, wasebentisa simiso lesitsi “kuphila ngekuphila,” ngaleyondlela wakhombisa kulunga kwakhe, kute bantfu labalalelako baphindze batfole kuphila lokuphakadze. (Eksodusi 21:23) Umbuto ukutsi: Kuphila lokungenasono lokwalahlwa ngu-Adamu kwakungaphindze kutfolakale njani? Nayi imphendvulo: Kwakufanele kutsi umuntfu lotsite anikele ngekuphila lokwakungenasono, njengekwa-Adamu.

Kuyacaca-ke kutsi akekho esitukulwaneni sa-Adamu lesinesono lobekangakhona kunikela ngaloko kuphila. Kodvwa Jesu abengakhona. (Tihlabelelo 49:6-9) Yena watalwa angenasono njengobe na-Adamu abete sono. Ngako-ke, ngekunikela ngekuphila kwakhe, Jesu wahlenga bonkhe bantfu ekugcilatweni sono. Ngekwenta njalo, waniketa situkulwane salabantfu bekucala litfuba lekutfola kuphila lokungenasono labebake baba nako bo-Adamu na-Eva. (Roma 3:23, 24; 6:23) Kukhona yini lokufanele sikwente kute sizuze kulesento selutsandvo lesikhulu kangaka?

“WONKHE UMUNTFU LOKHOLWA NGIYO”

Nasibuyela kulokushiwo nguJohane 3:16, sinaka emavi latsi “wonkhe umuntfu lokholwa [nguJesu] angabhubhi, kodvwa atfole kuphila lokuphakadze.” Loku kusho kutsi kutfola kuphila lokuphakadze kunemibandzela. Nangabe sifuna “kutfola kuphila lokuphakadze,” kufanele sikholelwe kuJesu siphindze simlalele.

Mhlawumbe ungahle utibute kutsi: “Kulalela kungena kanjani kulendzaba? Kantsi Jesu akashongo yini kutsi: ‘Wonkhe umuntfu lokholwa nguye’ utawutfola kuphila lokuphakadze?” Kuliciniso kutsi kukholwa kumcoka. Nome kunjalo, kubalulekile kukhumbula kutsiZ ngekusho kweliBhayibheli kumane ukholelwe kuJesu akukeneli. Sichazamagama i-Vine’s Expository Dictionary of Old and New Testament Words, sitsi etilwimini tekucala, leligama lelitsi ‘kukholwa’ lelishiwo nguJohane, lichaza “kwetsembela kulokutsite, hhayi nje kumane ukholwe kutsi kukhona.” Kute sitfole umusa waNkulunkulu sidzinga lokungetulu nje kwekwati kutsi Jesu unguMsindzisi. Loyo lokholwako kufanele atimisele kwenta loko Jesu lakufundzisa. Nome ngabe ngukuphi kukholwa kulite nangabe kute imisebenti. LiBhayibheli litsi: ‘Kukholwa ngaphandle kwemisebenti kufile.’ (Jakobe 2:26) Loku kungaphindze kuchazwe ngekutsi, loyo lokholwako kudzingeka akholelwe kuJesu, lokusho kutsi kufanele aphile ngekuvumelana naloko lakukholelwako.

Pawula uyichaza kanjena lendzaba: “Lutsandvo Khristu lanalo luyasichuba, ngobe nguloku lesesiphetse ngako, kutsi umuntfu munye [Jesu] wafela bonkhe bantfu . . . futsi wafela bonkhe bantfu kuze labo labaphilako bangasatiphileli bona, kodvwa baphilele loyo lowabafela waphindze wavuswa.” (2 Khorinte 5:14, 15) Kukhombisa kubonga lokusuka enhlitiyweni ngemhlatjelo waJesu kufanele kusente sishintje kuphila kwetfu, siyekele kuba nebugovu, ngekutsi sitiphilele tsine kodvwa siphilele Jesu lowasifela. Loko kusho kutsi, kwenta loko Jesu lakufundzisa, kufanele kute kucala ekuphileni kwetfu. Lushintjo lolunjalo lutawutsintsa loko lesikutsatsa njengalokubalulekile kitsi, tincumo tetfu, kanye nako konkhe lesikwentako. Uyoba yini umvuzo walabo labakholelwa kuJesu?

“ANGABHUBHI, KODVWA ATFOLE KUPHILA LOKUPHAKADZE”

Incenye yekugcina yaJohane 3:16 ikhuluma ngesetsembiso saNkulunkulu lesitawutfolwa ngulabo labakholelwa emhlatjelweni wesihlengo baphindze baphile ngekuvumelana netimiso takhe. Nkulunkulu uhlose kutsi labo labetsembekile ‘bangabhubhi, kodvwa batfole kuphila lokuphakadze.’ Nome kunjalo, labatsandvwa nguNkulunkulu batawutfola umvuzo longafani.

Jesu wetsembisa lelinye licembu kutsi litawutfola kuphila lokuphakadze ezulwini. Wacacisela bafundzi bakhe labetsembekile, watsi usayobalungisela indzawo, kute babuse naye embusweni wakhe. (Johane 14:2, 3; Filiphi 3:20, 21) Labo labatawuvuselwa ezulwini “batawuba baphristi baNkulunkulu nebaKhristu, babuse njengemakhosi kanye naye iminyaka leyinkhulungwane.”​—Sembulo 20:6.

Linani lelilinganiselwe kuphela lebalandzeli baKhristu lelitawutfola lomvuzo. Empeleni Jesu watsi: “Ningesabi mhlambi lomncane, ngobe uYihlo uncume kuninika uMbuso.” (Lukha 12:32) Bangakhi labatawakha ‘lomhlambi lomncane’? Umbhalo weSembulo 14:1, 4 utsi: “Ngatsi ngiyabuka, ngabona liWundlu [Jesu Khristu lowavuswa] lime eNtsabeni [yasezulwini] iSiyoni, likanye nalabatinkhulungwane letilikhulu nemashumi lamane nakune (144 000), emabuntini abo kubhalwe libito lalo neleYise.  . . Batsengwa kubantfu njengetitselo tekucala kuNkulunkulu nakulo liWundlu.” Nasicatsanisa netigidzigidzi tebantfu letike taphila, linani lelingu-144 000 limane nje lakhiwa ‘ngumhlambi lomncane.’ Batawubusa bobani njengobe kutsiwa bangemakhosi?

Jesu wakhuluma ngelicembu lesibili lalabo labetsembekile labatawutfola umvuzo ngekubuswa nguMbuso wasezulwini. Njengobe kusho Johane 10:16, Jesu watsi: “Nginaletinye timvu letingasito takulesibaya; nato kufanele ngitiletse, titalilalela livi lami, futsi titawuba ngumhlambi munye, tibe nemelusi munye.” Leto “timvu” tiyakulangatelela kuphila emhlabeni phakadze, lokwakulitsemba bo-Adamu na-Eva lebebavele banalo. Sati kanjani kutsi letimvu tiyophila emhlabeni?

LiBhayibheli likhuluma tikhatsi letinyenti ngekutsi liyawuba njani liPharadisi lasemhlabeni. Kuze utibonele loko, mhlawumbe ungatsandza kufundza lamavesi lalandzelako eBhayibhelini: Tihlabelelo 37:9-11; 46:8, 9; 72:7, 8, 16; Isaya 35:5, 6; 65:21-23; Matewu 5:5; Johane 5:28, 29; Sembulo 21:4. Lamavesi akhuluma ngekuphela kwetimphi, indlala, kugula kanye nekufa. Akhuluma ngesikhatsi lapho bantfu labalungile batawujatjuliswa kutakhela tindlu tabo, kutilimela emhlabatsini wabo, kanye nekukhulisa bantfwana babo endzaweni lenekuthula.a Alikukhangi yini wena lelotsemba? Sinetizatfu letiphatsekako tekukholelwa kutsi letetsembiso titawugcwaliseka masinyane.

NKULUNKULU USENTELE LOKUKHULU

Nawucabangisisa kahle ngako konkhe Nkulunkulu lakwentele kona wena kanye nabo bonkhe bantfu, kuyacaca kutsi sewuvele usentele tintfo letinyenti kakhulu. Sijabulela kuphila ngelizinga lelitsite, sinekuhlakanipha, futsi sinetintfo lesitidzingako kute sichubeke siphila. Ngetulu kwaloko, sipho lesiyinhlawulo Nkulunkulu lasiphe sona ngaJesu lowasifela, singasiletsela tibusiso letinyenti, njengobe sifundza kuJohane 3:16.

Kuphila phakadze ngekuthula etimeni letijabulisako, kungasekho kugula, timphi, indlala kanye nekufa, ngalokucinisekile kuyoholela enjabulweni nasetibusisweni letingapheli. Kukuwe-ke kutsi uyotitfola yini letibusiso noma cha. Umbuto losele utsi: Yini wena loyentela Nkulunkulu?