SIFUNDVO 02

LiBhayibheli Lisetsembisa Likusasa Lelihle

Printed Edition

Bantfu labanyenti emhlabeni wonkhe banetinkinga letibabangela kutsi badvumateke, bakhatsateke, futsi konkhe loku kubavisa buhlungu. Wake wabhekana yini nesimo lesakwenta wativa ngaleyondlela? Kungenteka ucindzetelwa kugula nobe ushonelwe ngumuntfu lomtsandzako. Kungenteka futsi uyatibuta kutsi ‘kuphila kuyoke kube ncono yini?’ LiBhayibheli lisiniketa imphendvulo lesingayetsemba.

1. LiBhayibheli lisiniketa liphi litsemba ngelikusasa?

LiBhayibheli lisitjela kutsi kungani sinetinkinga letinyenti kangaka, liphindze lisitjele tindzaba letimnandzi tekutsi madvutane Nkulunkulu utatisusa tonkhe letinkinga. Tetsembiso talo tingakwenta ‘ube nelikusasa lelihle kanye nelitsemba.’ (Fundza Jeremiya 29:11, 12.) Letetsembiso tisisita sikhone kubeketelela tinkinga tetfu futsi sijabule ngisho nanyalo. Tiphindze tisicinisekise kutsi sitawujabula kuze kube phakadze.

2. LiBhayibheli lisetsembisa kutsi likusasa litawuba njani?

LiBhayibheli lisetsembisa kutsi esikhatsini lesitako “kufa ngeke kusaba khona, futsi kulila, nekukhala kanye nebuhlungu ngeke kusaba khona.” (Fundza Sembulo 21:4.) Tinkinga letenta bantfu baphelelwe litsemba lamuhla, letifaka ekhatsi buphuya, kungalungi, kugula kanye nekufa, ngeke tisaba khona. LiBhayibheli letsembisa kutsi bantfu batawujabulela kuphila phakadze emhlabeni loliPharadisi.

3. Yini lengakwenta uciniseke kutsi loko lokwetsenjiswa liBhayibheli kutakwenteka mbamba?

Bantfu labanyenti bayetsemba kutsi tintfo letinhle titakwenteka, kepha abaciniseki kutsi leto tintfo titakwenteka mbamba yini. Loko liBhayibheli lelisetsembisa kona kwehlukile. Singaciniseka kutsi loko lelikushoko kutakwenteka mbamba ngekutsi ‘sihlolisise imiBhalo.’ (Imisebenti 17:11) Njengobe utadisha liBhayibheli, utatikhetsela wena kutsi uyakukholelwa yini loko lelikushoko ngelikusasa.

CHUBEKA UFUNISISA

Hlola letinye tintfo liBhayibheli lelisetsembisa tona ngelikusasa. Buka indlela tetsembiso teliBhayibheli letibasita ngayo bantfu lamuhla.

Titfombe: Tikhombisa timo letikhona lamuhla, ticatsaniswa netimo bantfu labatatijabulela esikhatsini lesitako njengobe kusho liBhayibheli. Letinye timo tiyavetwa langentasi.

4. LiBhayibheli lisetsembisa kutsi sitawuphila phakadze futsi ngeke sisahlupheka

Buka nalu luhla lwetintfo letilandzelako liBhayibheli lelisetsembisa tona. Ngusiphi setsembiso lositsandza kakhulu, futsi leni?

Fundza imibhalo leseceleni kwaletetsembiso, bese nicoca ngalemibuto:

Ucabanga kutsi lemibhalo iyakusita yini? Ucabanga kutsi lemibhalo ingawusita yini umndeni wakho kanye nebangani bakho kutsi babe nelitsemba ngelikusasa?

Ticabange sewuphila emhlabeni lapho:

BONKHE BANTFU BANGEKE . . .	WONKHE MUNTFU . . .
baseva buhlungu, babe butsakatsaka ngenca yekuguga, nobe bafe.—Isaya 25:8.	atawubona tihlobo takhe tivuswa tiphindze tiphile emhlabeni.—Johane 5:28, 29.
basagula nobe bakhubateke.—Isaya 33:24; 35:5, 6.	atawujabulela imphilo lenhle futsi abe nemandla njengasebusheni.—Jobe 33:25.
basaphatfwa kabi.—Isaya 32:16, 17.	atawuba nekudla lokunyenti, likhaya lelihle, kanye nemsebenti lowenetisako.—Tihlabelelo 72:16; Isaya 65:21, 22.
basahlupheka ngenca yetimphi.—Tihlabelelo 46:9.	atawuba nekuthula lokukhulu.—Tihlabelelo 37:11.
basahlushwa kucabanga tintfo letibuhlungu nobe kukhumbula tintfo letibavisa buhlungu.—Isaya 65:17.	atawuphila kahle kuze kube phakadze.—Tihlabelelo 37:29.

Umntfwana lebekagula sewuphilile futsi wange make wakhe.

Indvodza lebeseyikhulile nyalo seyinsha futsi ishova libhara leligcwele tibhidvo.

5. Loko liBhayibheli lelisetsembisa kona kungakushintja kuphila kwetfu

Bantfu labanyenti badvumatekile futsi batfukutseliswa tinkinga letigcwele emhlabeni. Labanye balwa kamatima kuze bente tintfo tibe ncono. Buka kutsi kubasite njani bantfu lamuhla loko liBhayibheli lelikwetsembisako mayelana nekutsi tintfo titawubancono. Dlala le-VIDEO, bese nicoca ngalemibuto lelandzelako.

I-VIDEO: Bengifuna Kucedza Lubandlululo (4:07)

Titfombe: Sicephu se-video letsi ‘Bengifuna Kucedza Lubandlululo.’ Rafika uvuna kotini nebantfu besive sakubo ngesikhatsi asesemncane. 2. Rafika uyamangala njengobe asemhlanganweni waBoFakazi BaJehova nakabona bantfu bebuve lobungefani bahlangene ndzawonye ngekuvana.

Kule-video, ngukuphi kungalungi lebekuhlupha Rafika?
Ngisho nobe lokuphatfwa kabi kungazange kuphele, kodvwa liBhayibheli lamusita njani?

Loko liBhayibheli lelisetsembisa kona mayelana nelikusasa kungasisita silwisane nekudvumateka futsi sijabule ngisho nobe sinetinkinga. Fundza Taga 17:22 naKubaseRoma 12:12, bese nicoca ngalemibuto:

Ucabanga kutsi loko lokushiwo liBhayibheli ngelikusasa kungayenta yini imphilo yakho ibe ncono? Kungani usho njalo?

LABANYE BANTFU BATSI: “Loko liBhayibheli lelikwetsembisako ngelikusasa kubonakala kuliphupho.”

Ucabanga kutsi kubaluleke ngani kutsi utitfolele wena kutsi kuliciniso yini?

LOKO LESICOCE NGAKO

LiBhayibheli lisetsembisa tintfo letinyenti lesitatijabulela esikhatsini lesitako. Loku kusiniketa litsemba futsi kusente siphile imphilo lencono nyalo.

Yini Loyifundzile?

Kungani bantfu badzinga kwati tetsembiso taNkulunkulu?
Litsini liBhayibheli ngelikusasa?
Kungakusita njani kuba nelitsemba ngelikusasa, nyalo?

Lilanga locedze ngalo lesifundvo:

Umgomo

Kwati loko liBhayibheli lelisetsembisa kona ngekutsi ufundze emavesi lakulesifundvo.

Leminye Imigomo Lotibekela Yona:

Your other goal

LOKUNYE LONGAKUHLOLA

Tfola indlela litsemba ngelikusasa lelingakusita ngayo nawunetinkinga.

“Hope—Where Can You Find It?” (Awake! ya-April 22, 2004, letfolakala ngesiNgisi)

Tfola indlela litsemba ngelikusasa lelingabasita ngayo labo labanekugula lokungapheli.

“LiBhayibheli Lingakusita Yini Nawunekugula Lokungapheli?” (Sihloko lesiku-internet)

Nawubukela le-video yemculo, tibone ukanye nemndeni wakho nijabulela kuphila emhlabeni loliPharadisi.

Cabanga Ngalesikhatsi (3:37)

Fundza indlela kuphila kwalenye indvodza lebeyilwela emalungelo ebantfu lokwashintja ngayo ngemuva kwekufundza loko liBhayibheli lelikwetsembisako ngelikusasa.

“Angisenawo Umuzwa Wokuthi Kumelwe Ngiguqule Umhlaba” (Sicongosekulindza saJuly 1, 2013, lesitfolakala ngesiZulu)