Kushumayela Ngembuso​—Kusakata Tindzaba Letimnandzi Emhlabeni Wonkhe

TICABANGE ulungiselela kuya ensimini ngelilanga longayi ngalo emsebentini. Njengobe ulungisa, ucala kungabata ngobe utiva udziniwe. Ubona shengatsi kuncono kutsi uphumule ngalelo langa. Kodvwa uyathantaza ngalendzaba futsi uncuma kuhamba. Ensimini wabelwa kusebenta nadzadze lotsembekile losakhulile ngeminyaka, futsi kubeketela nemusa wakhe kukutsintsa inhlitiyo. Njengobe ucocela bantfu umlayeto lomayelana nemaciniso emtini ngemuti, uyakhumbula kutsi bazalwane kanye nabodzadze wenu labasemhlabeni wonkhe nabo bacoca ngemlayeto lofananako, nisebentisa tincwadzi letifananako futsi nonkhe nizuza ekuceceshweni lokufananako. Nawufika ekhaya, utiva unemandla. Ujabula kakhulu nangekutsi awuzange uhlale ekhaya.

Kwanyalo, umsebenti wemaKhristu wekushumayela ungumsebenti loyinhloko weMbuso waNkulunkulu. Jesu wabiketela kutsi lomsebenti wekushumayela bewutawukhula ngelizinga lelimangalisako ngemalanga ekugcina. (Mat. 24:14) Lesiphrofetho sakhe sigcwaliseke njani? Kulencenye, sitawucoca ngebantfu, ngetindlela kanye nangemathulusi labe lusito lolukhulu kulomsebenti wekushumayela wemaKhristu, losita tigidzi tebantfu emhlabeni wonkhe kutsi tibone kutsi uMbuso waNkulunkulu uyintfo sibili.