I-Watchtower ONLINE LIBRARY
I-Watchtower ONLINE LIBRARY
WeSicongosekulindza
SiSwati
  • LIBHAYIBHELI
  • LOKUTFOLAKALAKO
  • IMIHLANGANO
  • mwbr19 September emakh. 1-14
  • Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo

Kute i-video kulolokukhetsile.

Siyacolisa. Kube nenkinga nayisavuleka le-video.

  • Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
  • Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo—2019
  • Tihlokwana
  • SEPTEMBER 2-8
  • UMCEBO LOSEVINI LANKULUNKULU | HEBHERU 7-8
  • “Ungumphristi Kuze Kube Phakadze NjengaMelkhisedeki”
  • it-2-E 366
  • Melkhisedeki
  • it-2-E 367 4
  • Melkhisedeki
  • Kuliciniso kangakanani kutsi Melikhisedeki ‘bekete lilanga lekutalwa nobe lekufa’?
  • it-2-E 366
  • Melkhisedeki
  • Kufunisisa Umcebo EVini LaNkulunkulu
  • w00-ZU 8/15 14 ¶11
  • Iminikelo Lemjabulisako Nkulunkulu
  • Sivumelwane
  • Kungani sivumelwane seMtsetfo ‘sesingasasebenti’?
  • Kufundvwa KweliBhayibheli
  • SEPTEMBER 9-15
  • UMCEBO LOSEVINI LANKULUNKULU | HEBHERU 9–10
  • “Sitfunti Setintfo Letinhle Letiseta”
  • Intsetselelo
  • cf 183-ZU ¶4
  • “Chubeka Ungilandzela”
  • it-2-E 602-603
  • Kuphelela
  • Kufunisisa Umcebo EVini LaNkulunkulu
  • w92-ZU 3/1 31 ¶4-6
  • Imibuto Levela Kubafundzi
  • it-1-E 249-250
  • Kubhajatiswa
  • Kufundvwa KweliBhayibheli
  • SEPTEMBER 16-22
  • UMCEBO LOSEVINI LANKULUNKULU | HEBHERU 11
  • “Loko Lokwenta Kukholwa Kubaluleke”
  • w16.10 27 ¶6
  • Khombisa Kukholwa Etetsembisweni TaJehova
  • w13 11/1 11 ¶2-5
  • “Jehova Ubanika Umvuzo Labo Labamfuna Ngekutimisela”
  • w16.10 23 ¶10-11
  • Cinisa Kukholwa Kwakho Ngetintfo Lonelitsemba Kuto
  • Kufunisisa Umcebo EVini LaNkulunkulu
  • it-1-E 804 ¶5
  • Kukholwa
  • wp17.1 12-13
  • “Abemjabulisile Nkulunkulu”
  • Kufundvwa KweliBhayibheli
  • SEPTEMBER 23-29
  • UMCEBO LOSEVINI LANKULUNKULU | HEBHERU 12-13
  • “Siyalo Sibufakazi Bekutsi Jehova Uyasitsandza”
  • w12 3/15 29 ¶18
  • Ungatibuki Tintfo ‘Letingemuva’
  • w12 7/1 21 ¶3
  • “Njalo Nanithantaza, Nibotsi, ‘Babe’”
  • w18.03 32 ¶18
  • “Lalela Siyalo Kuze Uhlakaniphe”
  • Kufunisisa Umcebo EVini LaNkulunkulu
  • w11 9/15 17-18 ¶11
  • Wugijime Ngekucinisela Lomncintiswano
  • w89-ZU 12/15 22 ¶10
  • Nikela Ngemihlatjelo Lejabulisa Jehova
  • Kufundvwa KweliBhayibheli
  • SEPTEMBER 30–OCTOBER 6
  • UMCEBO LOSEVINI LANKULUNKULU | JAKOBE 1-2
  • “Indlela Sono Lesikuveta Ngayo Kufa”
  • g17-ZU.4 14
  • Silingo
  • LOKO LOKUSHIWO LIBHAYIBHELI
  • g17-ZU.4 14
  • Silingo
  • Kufunisisa Umcebo EVini LaNkulunkulu
  • it-2-E 253-254
  • Tibane
  • it-2-E 222 ¶4
  • Umtsetfo
  • Kufundvwa KweliBhayibheli
Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo—2019
mwbr19 September emakh. 1-14

Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo

SEPTEMBER 2-8

UMCEBO LOSEVINI LANKULUNKULU | HEBHERU 7-8

“Ungumphristi Kuze Kube Phakadze NjengaMelkhisedeki”

(Hebheru 7:1, 2) LoMelkhisedeki, loyinkhosi yaseSalema nalongumphristi waNkulunkulu Losetikwako Konkhe, wahlangana na-Abrahama abuya kuyoncoba emakhosi futsi wambusisa. 2 Abrahama wase umnika kwelishumi kwato tonkhe tintfo. Libito laMelkhisedeki lisho kutsi “INkhosi Yekulunga,” futsi uphindze abe yinkhosi yaseSalema, lokusho kutsi “INkhosi Yekuthula.”

it-2-E 366

Melkhisedeki

Inkhosi yaseSalema ‘beyingumphristi waNkulunkulu Losetikwako Konkhe,’Jehova. (Gen. 14:18, 22) Ungumphristi wekucala lokukhulunywa ngaye emiBhalweni; wabekwa esikhundleni ngaphambi kwemnyaka wa-1933 B.C.E. Njengobe ayinkhosi yaseSalema, lokusho “Kuthula,” Pawula uchaza Melkhisedeki ‘njengeNkhosi Yekuthula’ asusela ebitweni lakhe lelisho “iNkhosi Yekulunga.” (Heb. 7:1, 2) ISalema bekulidolobha lasendvulo lelabese libitwa ngekutsi yiJerusalema, futsi iJerusalema yetsiwa ngekutsi kungetwe kuleligama lelitsi Salema, kwase kuphuma ligama lelitsi Jerusalema, kungako iJerusalema ihle ibitwa ngekutsi “yiSalema.”—Hla. 76:2.

Ngemuva kwekutsi Abrama (Abrahama) ancobe inkhosi Khedolawomere kanye nalamanye emakhosi lebekanayo, wabese uya eSigodzini saseShave nobe ‘eSigodzini seNkhosi.’ Asese lapho, Melkhisedeki ‘wamniketa sinkhwa neliwayini’ futsi wambusisa, watsi: “Abrama akabusiswe nguNkulunkulu Losetikwako Konkhe, uMdali welizulu nemhlaba; akabongwe Nkulunkulu Losetikwako Konkhe lonikete letitsa takho entsendzeni yesandla sakho!” Ngako-ke Abrahama waniketa lenkhosi lengumphristi “kwelishumi kwako konkhe,” lobekutintfo ‘lebekatitfumbile,’ latitfola nakancoba lamakhosi.—Gen. 14:17-20; Heb. 7:4.

(Hebheru 7:3) Njengobe ete uyise nenina, ete lusendvo, ete nelilanga lekutalwa nobe lekufa, futsi entiwe wafana neNdvodzana yaNkulunkulu, uhlala angumphristi kuze kube phakadze.

it-2-E 367 4

Melkhisedeki

Kuliciniso kangakanani kutsi Melikhisedeki ‘bekete lilanga lekutalwa nobe lekufa’?

Pawula wakhuluma ngeliciniso lelimangalisako mayelana naMelikhisedeki, nakatsi ngaye: “Njengobe ete uyise nenina, ete lusendvo, ete nelilanga lekutalwa nobe lekufa, futsi entiwe wafana neNdvodzana yaNkulunkulu, uhlala angumphristi kuze kube phakadze.” (Heb. 7:3) Njengabo bonkhe bantfu, Melkhisedeki watalwa futsi wafa. Nanobe kunjalo, ligama lababe wakhe nelamake wakhe alikho emiBhalweni, bokhokho bakhe kanye nentalelwane yakhe nayo akukhulunywa ngayo, futsi imiBhalo ayikhulumi kwasanhlobo ngekutalwa kwakhe nobe ngekufa kwakhe. Kodvwa Melkhisedeki bekamfanekisela kahle Jesu Khristu, longumphristi waphakadze. Njengobe kute lowaba ngumphristi ngaphambi kwaMelkhisedeki nobe lowaba ngumphristi ngemuva kwakhe, kanjalo nakuKhristu kute umphristi lophakeme lebekafana naye, futsi neliBhayibheli lisitjela kutsi kute lotawungena esikhundleni sakhe. Ngetulu kwaloko, nanobe Jesu atalwa eluhlwini lwemaJuda futsi aseluhlwini lwebukhosi ngaDavide, bokhokho bakhe bebangekho eluhlwini lwekutsi babe baphristi, futsi kuba kwakhe yinkhosi nemphristi akuzange kuye ngekutsi lusendvo lwakubo lusukaphi. Loku kwenteka ngobe Jehova bekamtsembisile.

(Hebheru 7:17) Ngobe bufakazi butsi ngaye: “Wena ungumphristi kuze kube phakadze njengaMelkhisedeki.”

it-2-E 366

Melkhisedeki

Lokwenta Khristu Afaneleke Kuba Ngumphristi. Esiphrofethweni lesimayelana naKhristu, Jehova wenta setsembiso ‘eNkhosini’ Davide lesitsi: “Wena ungumphristi loyawuhlala akhona kuze kube phakadze ngekuma kwaMelkhisedeki.” (Hla. 110:1, 4) Lesetsembiso ngiso lesenta umhlabeleli wacinisekisa emaHebheru kutsi Mesiya lotsenjisiwe bekutawuba nguye lotawuba ngumphristi aphindze abe yiNkhosi. Encwadzini layibhalela emaHebheru, umphostoli Pawula wakususa konkhe kungabata mayelana netimphawu taloyo lebekuphrofethwe ngaye, lokunguJesu ‘lowaba ngumphristi lophakeme phakadze njengaMelkhisedeki.’—Heb. 6:20; 5:10; buka sihloko lesitsi SIVUMELWANE.

Kufunisisa Umcebo EVini LaNkulunkulu

(Hebheru 8:3) Wonkhe umphristi lophakeme ubekelwa kutsi anikele ngetipho nangemihlatjelo; ngako kwakufanele kutsi nalona abe nalokutsite langanikela ngako.

w00-ZU 8/15 14 ¶11

Iminikelo Lemjabulisako Nkulunkulu

11 Umphostoli Pawula watsi: “Wonkhe umphristi lophakeme ubekelwa kutsi anikele ngetipho nangemihlatjelo.” (Hebheru 8:3) Naka kutsi Pawula uhlukanisa leminikelo lebeyentiwa ngumphristi lophakeme waka-Israyeli ngetincenye letimbili, ‘lokutipho’ kanye ‘nemihlatjelo,’ nobe ‘imihlatjelo yetono.’ (Hebheru 5:1) Ngalokuvamile, bantfu baniketana tipho kute bavete indlela labatsandzana ngayo nobe indlela lababonga ngayo, kanye nekutfutfukisa buhlobo labanabo, nobe kute bemukeleke. (Genesisi 32:20; Taga 18:16) Ngendlela lefanako, iminikelo leminyenti lebeyigunyatwa ngumtsetfo ingatsatfwa ngekutsi ‘beyitipho’ letiya kuNkulunkulu kute abemukele aphindze abajabulele. Kwephula uMtsetfo bekulungiswa ngekutsi kwentiwe ‘imihlatjelo yetono.’ Tincwadzi tekucala temibhalo yesiHebheru, ikakhulu incwadzi ya-Eksodusi, Levithikhusi, kanye naNumeri, ikhuluma kabanti ngetintfo letinyenti lebetisentjetiswa nakwentiwa tihlobonhlobo temihlatjelo kanye neminikelo. Nanobe kungahle kube matima ngatsi kutsi sati futsi siphindze siyikhumbule yonkhe imininingwane lemayelana naloku, kodvwa lamanye emaphuzu layinhloko lamayelana netinhlobonhlobo temihlatjelo afuna kutsi siwanake kakhulu.

(Hebheru 8:13) Ngekukhuluma atsi “sivumelwane lesisha,” wente kutsi lesekucala singasasebenti. Ngako-ke sekusedvute kutsi siphele lesi lesingasasebenti nalesidzala.

it-1-E 523 ¶5

Sivumelwane

Kungani sivumelwane seMtsetfo ‘sesingasasebenti’?

Sivumelwane seMtsetfo asisasebenti ngenca yekutsi Nkulunkulu wabese usebentisa umphrofethi Jeremiya kutsi amemetele kutsi bekutawuba nesivumelwane lesisha. (Jer. 31:31-34; Heb. 8:13) Nga-33  C.E. sivumelwane seMtsetfo sacedvwa ngesikhatsi Khristu afela elugodvweni (Khol. 2:14), sivumelwane lesisha sangena esikhundleni saso.—Heb. 7:12; 9:15; Imis. 2:1-4.

Kufundvwa KweliBhayibheli

(Hebheru 7:1-17) LoMelkhisedeki, loyinkhosi yaseSalema nalongumphristi waNkulunkulu Losetikwako Konkhe, wahlangana na-Abrahama abuya kuyoncoba emakhosi futsi wambusisa. 2 Abrahama wase umnika kwelishumi kwato tonkhe tintfo. Libito laMelkhisedeki lisho kutsi “INkhosi Yekulunga,” futsi uphindze abe yinkhosi yaseSalema, lokusho kutsi “INkhosi Yekuthula.” 3 Njengobe ete uyise nenina, ete lusendvo, ete nelilanga lekutalwa nobe lekufa, futsi entiwe wafana neNdvodzana yaNkulunkulu, uhlala angumphristi kuze kube phakadze. 4 Niyabona-ke kutsi yinkhulu kangakanani lendvodza Abrahama longukhokho layinika kwelishumi etintfweni letincono kakhulu labetitfumbile. 5 Kuliciniso kutsi ngekweMtsetfo, emadvodzana aLevi lasebenta njengebaphristi anikwe umyalo wekutsi atsatse kwelishumi kubantfu, lokubomnakabo, nanobe nabo bayintalelwane ya-Abrahama. 6 Kodvwa lendvodza lebeyingesiyo yelusendvo lwawo yatsatsa kwelishumi ku-Abrahama futsi yambusisa loyo lobekanetetsembiso. 7 Ngako-ke ngeke sikuphike kutsi lomncane ubusiswa ngulomkhulu. 8 Bantfu labafako ngibo labanikwa kwelishumi, kodvwa kulokunye kuba nguloyo lokufakazwa ngaye kutsi uyaphila. 9 Kantsi kungaphindze kutsiwe naLevi lonikwa kwelishumi, ukhipha kwelishumi nga-Abrahama, 10 ngobe abesengakatalwa ngesikhatsi Melkhisedeki ahlangana na-Abrahama. 11 Nangabe-ke kuphelela bekutfolakala ngebuphristi bemaLevi (ngobe bebuyincenye lebalulekile yeMtsetfo lobewunikwe bantfu), besitawuba kuphi sidzingo sekutsi kuvele lomunye umphristi lokutsiwa unjengaMelkhisedeki kodvwa longasinjenga-Aroni? 12 Njengobe buphristi sebushintjwa, kunesidzingo sekutsi uMtsetfo nawo ushintjwe. 13 Ngobe lendvodza letishiwo mayelana nayo letintfo yavela kulesinye sive, lokute muntfu kuso loke wasebenta elatini. 14 Kuyakhanya kutsi iNkhosi yetfu yavela kuJuda, kodvwa Mosi akazange asho lutfo ngaleso sive mayelana nebuphristi. 15 Loku kucaca kakhulu njengobe kuvela lomunye umphristi lonjengaMelkhisedeki, 16 lobe ngumphristi, hhayi ngenca yaloko lokufunwa nguMtsetfo, lebekuya ngelusendvo, kodvwa ngemandla ekuphila lokungapheli. 17 Ngobe bufakazi butsi ngaye: “Wena ungumphristi kuze kube phakadze njengaMelkhisedeki.”

SEPTEMBER 9-15

UMCEBO LOSEVINI LANKULUNKULU | HEBHERU 9–10

“Sitfunti Setintfo Letinhle Letiseta”

(Hebheru 9:12-14) Wangena endzaweni lengcwele kwaba kanye kuphela, angangeni nengati yetimbuti neyetinkunzana, kodvwa angena nengati yakhe, futsi wasitfolela kukhululwa kwaphakadze. 13 Ngobe nangabe ingati yetimbuti neyetinkunzi kanye nemlotsa welitfokati lokufafatwa kulabo labangcolile kubangcwelisa kuze kuhlantwe inyama, 14 ingati yaKhristu lowatinikela kuNkulunkulu ete sici ngemoya waphakadze, itabahlambulula kakhulu kangakanani-ke bonembeza betfu emisebentini lefile, kuze sikwati kwentela Nkulunkulu lophilako umsebenti longcwele?

it-1-E 862 ¶1

Intsetselelo

Ngekusho kwemtsetfo Nkulunkulu bekawunike sive sema-Israyeli, umuntfu lowone Nkulunkulu nobe umnakabo bekatawutsetselelwa nangabe enta loko lokushiwo nguMtsetfo. Ngalokuvamile, bekufanele ente umnikelo wengati yesilwane kuJehova. (Lev. 5:5–6:7) Kungako Pawula aniketa leseluleko lesitsi: “NgekweMtsetfo, cishe tonkhe tintfo tihlanjululwa ngengati, futsi nangabe ingakacitfwa ingati ayibi khona intsetselelo.” (Heb. 9:22) Ecinisweni, ingati yetilwane letingumhlatjelo beyingakhoni kutisusa ngalokuphelele tono temuntfu asale ananembeza lomsulwa. (Heb. 10:1-4; 9:9, 13, 14) Ngalokwehlukile, lesivumelwane lo lokwaphrofethwa ngaso senta kutsi umuntfu atsetselelwe ngalokuphelele, ngesisekelo senhlawulo yaJesu Khristu. (Jer. 31:33, 34; Mat. 26:28; 1 Khor. 11:25; Ef. 1:7) Ngisho nangesikhatsi aselapha emhlabeni, Jesu wakhombisa kutsi uneligunya lekutsetselela tono ngesikhatsi elapha umuntfu lobekafe luhlangotsi.—Mat. 9:2-7.

(Hebheru 9:24-26) Ngobe Khristu akangenanga endzaweni lengcwele leyentiwe ngetandla, lengumfanekiso waleyo lengiyo sibili, kodvwa wangena ezulwini lucobo kuze nyalo avele embikwaNkulunkulu ngenca yetfu. 25 Sizatfu saloko bekungasiko kutsi atinikele kanyenti, njengalapho umphristi lophakeme angena nengati lengasiyo yakhe endzaweni lengcwele umnyaka nemnyaka. 26 Kube bekunjalo, bekutawudzingeka kutsi ahlupheke kanyenti kusukela kwasekelwa umhlaba. Kodvwa nyalo utivete kanye kuphela ekupheleni kwalelive kuze asuse sono ngemhlatjelo wakhe.

cf 183-ZU ¶4

“Chubeka Ungilandzela”

4 ImiBhalo ayisitjeli lutfo ngekufika kwaJesu ezulwini, indlela lemukelwa ngayo, nangekuhlangana kwakhe lokujabulisako naBabe wakhe. Kodvwa yakwembula kusengaphambili kutsi bekutawentekani ezulwini ngemuva nje kwekufika kwakhe khona. Utawukhumbula kutsi besekuphele iminyaka lengu-15 emaJuda awugubha njalo lomkhosi longcwele. Kanye ngemnyaka umphristi lophakeme bekangena eNgcwelengcwele yelithempeli kute ayofafata ingati yemhlatjelo ngeLilanga lekuBuyisana lebekakwenta embikwelibhokisi lesivumelwane. Ngalelolanga, umphristi lophakeme bekafanekisela Mesiya. Jesu wagcwalisa loko lebekushiwo kusengaphambili mayelana nalebekumelelwa ngulomkhosi ngesikhatsi abuyela ezulwini, kwaba kanye kuphela. Wefika kuJehova ezulwini lapho kunenkhatimulo yakhe khona—indzawo lengcwele kunato tonkhe letikhona ezulwini nasemhlabeni—futsi wetfula kuBabe wakhe linani lemhlatjelo wakhe loyinhlawulo. (Hebheru 9:11, 12, 24) Jehova wawemukela yini?

(Hebheru 10:1-4) Njengobe uMtsetfo usitfunti setintfo letinhle letiseta, awusito letintfo lucobo lwato, ngako-ke bantfu ngeke bakwati kwenta labo labeta kuNkulunkulu baphelele ngekutsi bachubeke banikela ngemihlatjelo lefanako umnyaka nemnyaka. 2 Kube bekunjalo, bekungeke yini kuphele kunikelwa kwemihlatjelo, ngobe labo labenta umsebenti longcwele labahlantwe kwaba kanye kuphela bebangeke babe nelicala letono? 3 Kunaloko, lemihlatjelo yenta kutsi umnyaka nemnyaka tono tikhunjulwe, 4 ngobe ingati yetinkunzi neyetimbuti ayikwati kususa tono.

it-2-E 602-603

Kuphelela

Kupheleliswa KweMtsetfo WaMosi. UMtsetfo lobewuniketwe ema-Israyeli ngaMosi bewufaka ekhatsi kubekwa kwebuphristi kanye nekunikelwa kwemihlatjelo leyehlukahlukene yetilwane. Nanobe bewuchamuka kuNkulunkulu lophelele, bekungasiwo loMtsetfo, buphristi, nobe leminikelo lebeyenta bantfu babebete sono ngisho nobe bebangephansi kwawo, njengobe baphostoli baphefumulelwa kutsi babhale. (Heb. 7:11, 19; 10:1) Kunekutsi ukhulule bantfu esonweni nasekufeni, loMtsetfo wenta sibonakale kakhulu. (Rom. 3:20; 7:7-13) Nanobe kunjalo, onkhe lamalungiselelo bekafeza injongo lebalulekile levela kuNkulunkulu; loMtsetfo bewusebenta njengemcodzisi loholela bantfu kuKhristu, lobekuyintfo leyakha sitfunti lesikahle “setintfo letinhle letiseta.” (Gal. 3:19-25; Heb. 10:1) Kungako Pawula akhuluma ‘ngaloko uMtsetfo lowehluleka kukwenta ngenca yekuba butsakatsaka kwenyama’ (Rom. 8:3), bekabhekisele kuloko lebekangakhoni kukwenta umphristi lomkhulu longumJuda (loyo lebekakhetfwa ngekwaloko lebekushiwo nguMtsetfo kute abe neligunya emalungiselelweni emhlatjelo futsi lophindze angene eNgcwelengcwele nengati yesilwane lesingumhlatjelo) ‘lokukubasindzisa ngalokuphelele’ labo lebekabasita kutsi babuyisane naNkulunkulu, njengoba Hebheru 7:11, 18-28 achaza. Ngisho nobe lemihlatjelo beyentiwa baphristi lebebayintalelwane ya-Aroni, beyenta bantfu bemukeleke kuNkulunkulu, kodvwa beyingabakhululi ngalokuphelele bonembeza babo. Lomphostoli bekakhuluma ngaloku ngesikhatsi atsi umhlatjelo wekubuyisana bewungakhoni “kwenta labo labeta kuNkulunkulu baphelele,” lokusho bonembeza babo. (Heb. 10:1-4; catsanisa na-Heb. 9:9.) Umphristi lophakeme bekangakhoni kuniketa bantfu linani leliphelele lenhlawulo yetono. Ngumhlatjelo waKhristu kuphela lobewungakhona kwenta loko, njengemphristi waphakadze.—Heb. 9:14; 10:12-22.

Kufunisisa Umcebo EVini LaNkulunkulu

(Hebheru 9:16, 17) Lapho kunesivumelwane khona, kufanele kufe umuntfu lowente leso sivumelwane. 17 Ngobe sivumelwane sisebenta ngemuva kwekufa, njengobe singeke sisebente nobe ngunini lapho umuntfu losentile asaphila.

w92-ZU 3/1 31 ¶4-6

Imibuto Levela Kubafundzi

Pawula wabona kutsi bekufanele kufe lotsite kuze sisebente sivumelwane lebesentiwe emkhatsini waNkulunkulu nebantfu. Sivumelwane seMtsetfo sisibonelo saloku. Mosi bekangumlamuleli waso, nguye lebekatawukwenta kutsi sisebente lesivumelwane lebesisemkhatsini waNkulunkulu nesive sema-Israyeli. Ngaleyondlela Mosi wadlala indzima lebalulekile futsi nguye lowasebentelana nema-Israyeli ngesikhatsi angena kulesivumelwane. Ngako-ke singasho kutsi Mosi kwabanguye lowenta kutsi lesivumelwane seMtsetfo lebesisungulwe nguJehova sisebente. Kodvwa bekudzingekile yini kutsi Mosi anikele ngekuphila kwakhe kuze lesivumelwane seMtsetfo sisebente? Cha. Kunaloko, bekwentiwa iminikelo yetilwane, bese kusetjentiswa ingati yato kute itsatse sikhundla sengati yaMosi.—Hebheru 9:18-22.

Kutsiwani ngesivumelwane lesisha Jehova lasenta nesive lesingu-Israyeli waNkulunkulu? Jesu Khristu waba nencenye lebalulekile ekuhlanganiseni lesive kanye naNkulunkulu, futsi waba nguMkhululi waso. Nanobe lesivumelwane sasungulwa nguJehova, kodvwa umphelelisi waso nguJesu Khristu. Nanobe anguMkhululi walesive, Jesu wasebentelana ngalokucondzile nalabo lebesitawusebenta kubo kwekucala lesivumelwane. (Lukha 22:20, 28, 29) Ngetulu kwaloko, Jesu bekafaneleka kutsi umhlatjelo wakhe kube ngiwo logcwalisa lesivumelwane. Lomhlatjelo bewungasiwo nje wetilwane kodvwa bewuwekuphila kwemuntfu lobekete sono. Ngako Pawula bekakhuluma ngaKhristu kutsi nguye lomuntfu lowenta kutsi sisebente lesivumelwane lesisha. Lesivumelwane lesisha sacala kusebenta ngesikhatsi ‘Khristu angena . . . ezulwini lucobo kuze nyalo avele embikwaNkulunkulu ngenca yetfu.—Hebheru 9:12-14, 24.

Ngelesikhatsi Pawula akhuluma ngaMosi naJesu kutsi ngibo bantfu labenta letivumelwane, bekangacombeleli nakatsi ngibo basunguli baletivumelwane, ecinisweni bekunguNkulunkulu cobo lwakhe lowatisungula. Kunaloko, ngamunye walabantfu lababili bekatinikele ngalokuphelele kutsi abe nguMkhululi kute kugcwaliseke letivumelwane. Esimweni ngasinye, kwakudzingeka kutsi kufe lokutsite—tilwane tingene esikhundleni saMosi, naJesu anikele ngekuphila kwakhe ngenca yalabo labasesivumelwaneni lesisha.

(Hebheru 10:5-7) Khristu naketa emhlabeni utsi: “‘Awuzange uyifune imihlatjelo neminikelo, kodvwa wangilungiselela umtimba. 6 Awuzange uyemukele iminikelo yekushiswa neminikelo yetono.’ 7 Ngako mine ngatsi: ‘Naku ngitile (encwadzini lengumculu kubhalwe ngami) kuze ngente intsandvo yakho Nkulunkulu.’”

it-1-E 249-250

Kubhajatiswa

Lukha uveta kutsi Jesu bekathantaza ngesikhatsi abhajatiswa. (Luk. 3:21) Ngetulu kwaloko, umbhali lebekabhalela emaHebheru watsi ngesikhatsi Jesu Khristu eta “emhlabeni” (loku akusho ngesikhatsi atalwa ngoba bekangeke akhone kufundza kanye nekukhuluma, kodvwa kungalesikhatsi eta kutobhajatiswa futsi acala umsebenti wakhe wekushumayela) ngekwaloko lokushiwo Tihlabelelo 40:6-8 (LXX), watsi: “Awuyifuni imihlatjelo kanye neminikelo, kodvwa ungilungiselele umtimba. . . . Naku ngitile (encwadzini lengumculu kubhalwe ngami) kuze ngente intsandvo yakho Nkulunkulu.” (Heb 10:5-9) Jesu bekalilunga lesive semaJuda ngekutalwa, lebekusive Nkulunkulu lebekente sivumelwane naso, lokusho sivumelwane seMtsetfo. (Eks. 19:5-8; Gal. 4:4) Ngenca yalamaciniso lawa, Jesu besekavele asentile sivumelwane naNkulunkulu ngaphambi kwekutsi abhajatiswe nguJohane. Jesu wenta lokungetulu nje kwaloko uMtsetfo lobewufuna kutsi akwente. Bekatetfula kuBabe wakhe Jehova kute ente “intsandvo” yaNkulunkulu lobekusho kunikela ngemtimba wakhe ‘lolungisiwe’ kanye nekuvalwa kwemihlatjelo yetilwane lebeyentiwa ngephasi kwaloMtsetfo. Umphostoli Pawula watsi: “‘Ngalentsandvo’ lokukhulunywe ngayo, singcwelisiwe ngekunikelwa kwemtimba waJesu Khristu lokwenteke kanye kuphela.” (Heb. 10:10) KuJesu, intsandvo yaBabe wakhe beyifaka ekhatsi imisebenti lemayelana neMbuso, futsi ngenca yalomsebenti, Jesu watinikela. (Luk. 4:43; 17:20, 21) Jehova wavuma waphindze wawemukela lomnikelo weNdvodzana yakhe, ngekutsi amgcobe ngemoya longcwele futsi watsi: “Wena uyiNdvodzana yami letsandzekako, ngikwemukele.”—Mak. 1:9-11; Luk. 3:21-23; Mat. 3:13-17.

Kufundvwa KweliBhayibheli

(Hebheru 9:1-14) Sivumelwane sekucala besinemitsetfo yekwenta umsebenti longcwele futsi sinendzawo yaso lengcwele emhlabeni. 2 Bekwakhiwe incenye yekucala yelithende, ekhatsi kwalo kunelutsi lwesibane, litafula, kanye netinkhwa letinikelwe kuNkulunkulu; ibitwa ngekutsi “Yindzawo Lengcwele.” 3 Ngemuva kwendvwangu yesibili bekunencenye yelithende lebitwa ngekutsi “yiNgcwelengcwele.” 4 Kuyo, bekunesitja seligolide sekushisela imphepho kanye nelibhokisi lesivumelwane lebeliligolide yonkhe indzawo, futsi kulo bekufakwe imbita yeligolide lebeyinemana, indvuku ya-Aroni leyahluma, kanye netibhelekece tematje esivumelwane; 5 etikwalo kwakunemakherubi lakhatimulako labesibekele simbonyo sekuhlawulela. Kepha nyalo akusiso sikhatsi sekuchaza konkhe mayelana naletintfo. 6 Nasetakhiwe ngalendlela letintfo, baphristi bebangena ngaso sonkhe sikhatsi encenyeni yekucala yelithende, kuze bente imisebenti lengcwele; 7 kodvwa kanye ngemnyaka, umphristi lophakeme nguye yedvwa labengena encenyeni yesibili, futsi angena nengati layinikela ngenca yakhe nangenca yetono bantfu labatente ngekungati. 8 Umoya longcwele ukwenta kucace kutsi indlela leya endzaweni lengcwele beyisengakembulwa ngesikhatsi kusenelithende lekucala. 9 Lelithende lingumfanekiso lomayelana nalesikhatsi sanyalo, futsi ngekuvumelana nalendlela, kunikelwa ngetipho nangemihlatjelo. Nanobe kunjalo, letintfo atikwati kuphelelisa nembeza walomuntfu lowenta umsebenti longcwele. 10 Timane nje timayelana nekudla, lokunatfwako kanye nekucwiliswa kwetintfo emantini. Loku bekufunwa nguMtsetfo ngalokuphatselene nemtimba, futsi kwaba khona kwadzimate kwaba sikhatsi lesibekiwe sekulungisa tintfo. 11 Kodvwa ngesikhatsi Khristu eta njengemphristi lophakeme wetintfo letinhle lesetentekile, wadzabula ethendeni lelikhulu naleliphelele kakhulu lelingakentiwa ngetandla, lokusho kutsi lelingasilo lalapha emhlabeni. 12 Wangena endzaweni lengcwele kwaba kanye kuphela, angangeni nengati yetimbuti neyetinkunzana, kodvwa angena nengati yakhe, futsi wasitfolela kukhululwa kwaphakadze. 13 Ngobe nangabe ingati yetimbuti neyetinkunzi kanye nemlotsa welitfokati lokufafatwa kulabo labangcolile kubangcwelisa kuze kuhlantwe inyama, 14 ingati yaKhristu lowatinikela kuNkulunkulu ete sici ngemoya waphakadze, itabahlambulula kakhulu kangakanani-ke bonembeza betfu emisebentini lefile, kuze sikwati kwentela Nkulunkulu lophilako umsebenti longcwele?

SEPTEMBER 16-22

UMCEBO LOSEVINI LANKULUNKULU | HEBHERU 11

“Loko Lokwenta Kukholwa Kubaluleke”

(Hebheru 11:1) Kukholwa kukutilindzela ngekuciniseka tintfo letetsenjwako, futsi kubufakazi bekuciniseka ngetintfo letikhona mbamba letingakabonwa.

w16.10 27 ¶6

Khombisa Kukholwa Etetsembisweni TaJehova

6 Inchazelo yekukholwa leseBhayibhelini itfolakala kuHebheru 11:1. (Fundza.) Kukholwa kusho tintfo letimbili lesingakhoni kutibona ngemehlo etfu: (1) “Tintfo letetsenjwako”—loku kufaka ekhatsi tetsembiso letitawugcwaliseka esikhatsini lesitako njengekucedvwa kwebubi emhlabeni kanye nekufika kwemhlaba lomusha. (2) “Tintfo letikhona mbamba letingakabonwa.” KuloMbhalo, ligama lesiGriki lelisetjentisiwe lelihunyushwe ngekutsi “bufakazi bekuciniseka” lisho tintfo letingabonakali lesetsembako kutsi tikhona, njengekutsi ukhona Jehova Nkulunkulu, Jesu Khristu, tingilosi kanye neMbuso wasezulwini. (Heb. 11:3) Singatjengisa njani kutsi kukholwa kwetfu kuyaphila futsi siyatetsemba tintfo lesingakatiboni leto Nkulunkulu lakhuluma ngato eVini lakhe? Singakukhombisa ngemavi nangetento tetfu, lokutintfo letibalulekile, ngobe ngaphandle kwato kukholwa kwetfu kufile.

(Hebheru 11:6) Ngetulu kwaloko, ngaphandle kwekukholwa ngeke kwenteke kutsi umuntfu amjabulise Nkulunkulu, ngobe loyo loya kuye kufanele akholwe kutsi ukhona nekutsi ubanika umvuzo labo labamfuna ngekutimisela.

w13 11/1 11 ¶2-5

“Jehova Ubanika Umvuzo Labo Labamfuna Ngekutimisela”

Yini ledzingekako kute sijabulise Jehova? Pawula wabhala watsi: “Ngaphandle kwekukholwa ngeke kwenteke kutsi umuntfu amjabulise Nkulunkulu.” Naka kutsi Pawula akasho kutsi kumatima kujabulisa Nkulunkulu ngaphandle kwekukholwa. Kunaloko, utsi ngeke kuze kwenteke kutsi umjabulise. Ngalamanye emavi, kukholwa kuyintfo lebalulekile kakhulu nakangabe sifuna kujabulisa Nkulunkulu.

Kukholwa lokunjani lokungajabulisa Nkulunkulu? Kukholwa kwetfu kufanele kufake ekhatsi tincenye letimbili. Yekucala, ‘kufanele sikukholwe kutsi ukhona.’ Lamanye emahumusho atsi “sikukholelwe kutsi ukhona mbamba.” Singamjabulisa njani Nkulunkulu nangabe singakukholelwa kutsi ukhona mbamba? Kukholwa lokungiko sibili akugcini nje ngekukholwa kuphela, ngoba nemadimoni alugcini nje ngokukholelwa, ingani namademoni ayakholwa kutsi Jehova ukhona mbamba. (Jakobe 2:19) Kukholwa kutsi Nkulunkulu ukhona mbamba kufanele kusisite sente lokutsite, lokusho kuphila ngendlela lemjabulisako.—Jakobe 2:20, 26.

Kwesibili, ‘kufanele sikukholelwe kutsi’ Nkulunkulu ‘uniketana umvuzo.’ Umuntfu lonekukholwa sibili ukukholelwa mbamba kutsi kutikhandla lakwentako kute akuphila ngendlela lejabulisa Nkulunkulu itamenta atfole umvuzo. (1 Khorinte 15:58) Singamjabulisa njani Jehova nangabe siwangabata emandla akhe nobe sifiso sakhe sekusinika kumvuzo? (Jakobe 1:17; 1 Phetro 5:7) Umuntfu lotsi Nkulunkulu akanendzaba natsi, akanandzaba nalesimentela kona futsi akephani loyo muntfu akamati Nkulunkulu longumbhali weliBhayibheli.

Bantfu labanjani Nkulunkulu labanika umvuzo? Pawula utsi: ‘Ngulabo labamfuna ngekutimisela.’ Incwadzi letsite yebahumushi beliBhayibheli itsi ligama lesiGriki lelitsi ‘ukufuna ngekutimisela’ alisho “kuphuma uyofuna,” kodvwa, lisho kuya kuNkulunkulu ngenjongo ‘kuyimkhonta’. Lenye incwadzi ichaza kutsi lesi sento sesiGriki lesisho kutikhandla kakhulu kanye nekutimisela. Jehova ubaniketa umvuzo laba kukholwa kwabo lokubenta batimisele kute bamkhonte ngenhlitiyo yabo yonkhe.—Matewu 22:37.

(Hebheru 11:33-38) Ngekukholwa bancoba imibuso, benta lokulungile, batfola tetsembiso, bavala imilomo yemabhubesi, 34 bancoba emandla emlilo, baphunyuka enkembeni, banikwa emandla ebutsakatsakeni, baba ngemachawe emphini, futsi bancoba emabutfo lahlaselako. 35 Labasikati bemukela labafile babo ngeluvuko; lamanye emadvodza wona ahlushwa ngobe abengafuni kukhululwa ngalenye indlela, kuze atfole luvuko loluncono kakhulu. 36 Labanye bebahlekwa futsi babhambabulwa, ngetulu kwaloko, bebaboshwa bafakwe nasemajele. 37 Bebagcotjwa ngematje, bahlushwa, bancunywa ngekusahwa, babulawa ngenkemba; bebahamba bembetse tikhumba tetimvu netetimbuti, beswele, bahlupheka, baphatfwa kabi; 38 futsi live belingakabafaneli. Bebazulazula etingwadvule, etintsabeni, emihumeni nasemigedzeni yemhlaba.

w16.10 23 ¶10-11

Cinisa Kukholwa Kwakho Ngetintfo Lonelitsemba Kuto

10 Encwadzini yaHebheru sehluko 11, umphostoli Pawula wachaza bumatima tinceku taNkulunkulu lokwadzingeka tibubeketelele. Nasi sibonelo: Lomphostoli wakhuluma ngebafati labanekukholwa labafelwa ngemadvodzana abo kodvwa laphindze avuswa. Wase ukhuluma ngalabanye ‘labebangafuni kukhululwa ngalenye indlela, kuze batfole luvuko loluncono kakhulu.’ (Heb. 11:35) Nanobe singati kutsi abekhuluma ngabobani umphostoli Pawula, bantfu labanjengaNabothi naZakhariya, bagcotjwa ngematje baze bafa ngenca nje yekutsi bebalalela Nkulunkulu futsi benta intsandvo yakhe. (1 Khos. 21:3, 15; 2 Khr. 24:20, 21) Danyela nebangani bakhe bebanelitfuba lelihle ‘lekukhululwa’ nabangetsembeki. Kunekutsi bangetsembeki, kukholwa kwabo kuNkulunkulu kwabenta “bavala imilomo yemabhubesi” futsi “bancoba emandla emlilo.”—Heb. 11:33, 34; Dan. 3:16-18, 20, 28; 6:13, 16, 21-23.

11 Baphrofethi labanjengaboMikha naJeremiya ‘baphukutwa . . . baphindze baboshwa ngetinketane ejele’ ngenca yekukholwa kwabo. Labanye njenga-Elija ‘bebazulazula emahlane, nasetintsabeni, nasemihumeni, nasemigedzeni yemhlaba.’ Bonkhe bakhutsatela ngenca yekutsi ‘bebaciniseka ngetintfo lebebatsembele kuto.’—Heb. 11:1, 36-38; 1 Khos. 18:13; 22:24-27; Jer. 20:1, 2; 28:10, 11; 32:2.

Kufunisisa Umcebo EVini LaNkulunkulu

(Hebheru 11:4) Ngekukholwa, Abela wanikela kuNkulunkulu umhlatjelo lobaluleke kakhulu kunewaKhayini, futsi ngalokukholwa kwafakazwa ngaye kutsi ulungile, ngobe Nkulunkulu wamfakazela ngekwemukela tipho takhe; nanobe afile, ngekukholwa kwakhe usakhuluma.

it-1-E 804 ¶5

Kukholwa

Tibonelo Tasendvulo Tebantfu Lebebanekukholwa. Ngamunye ‘walaba labakulelifu lelikhulu labofakazi’ lakhuluma ngalo Pawula (Heb. 12:1) unesisekelo lesicinile sekukholwa. Sibonelo nje, Abela bekati kahle kamhlophe kutsi Nkulunkulu bekatsembise kutsi ‘intalo’ beyiyawufihlita inhloko ‘yenyoka.’ Futsi wakubona ngemehlo kugcwaliseka kwalesigwebo sebatali bakhe lesabekwa nguJehova ensimini yase-Edeni. Nasebacoshiwe e-Edeni, Adamu nemndeni wakhe bebasebenta kamatima kute batfole kudla, ngobe umhlaba besewucalekisiwe futsi besewuveta emanyeva kanye nelukhula. Kungenteka Abela wambona Eva abeke litsemba lakhe lonkhe endvodzeni yakhe futsi Adamu sekambusa umkakhe. Asingabati kutsi make wakhe wakhuluma ngendlela lebekeva ngayo buhlungu nakakhulelwe. Ngetulu kwaloko, ekungeneni kwasensimini yase-Edeni, bekugadze emakherubi anenkemba levutsako. (Gen. 3:14-19, 24) Tonkhe letintfo leti ‘betibufakazi bekuciniseka,’ lebetiniketa Abela sicinisekiso sekutsi sitawukhululwa ngesisekelo ‘salentalo lebeyitsenjisiwe.’ Ngako-ke, ngenca yekukholwa, “wanikela kuNkulunkulu umhlatjelo,” lokwamenta waba ngumuntfu lobaluleke kakhulu kunaKhayini.—Heb. 11:1, 4.

(Hebheru 11:5) Ngekukholwa, Enoki watsatfwa kuze angakuboni kufa, futsi akatfolakalanga ndzawo ngobe Nkulunkulu wamtsatsa; kodvwa ngesikhatsi asengakatsatfwa, kwafakazwa ngaye kutsi abemjabulisile Nkulunkulu.

wp17.1 12-13

“Abemjabulisile Nkulunkulu”

Pho-ke Enoki “watsatfwa kuze angakuboni kufa” ngamuphi umcondvo? Jehova wakutsatsa kuphila kwa-Enoki amvikela ebuhlungwini labetabuva nakabulawa. Kodvwa kwekucala, Enoki abetfole ‘bufakazi bekutsi abemjabulisile Nkulunkulu.’ Kwenteka njani loko? Ngaphambi nje kwekutsi afe, kungenteka Enoki abebone umbono lovela kuNkulunkulu lobewumkhombisa umhlaba sewulipharadisi. Ngemuva kwekubona loluphawu lolukhombisa kutsi Nkulunkulu uyamemukela, Enoki wabese uyafa. Abhala nga-Enoki nangalamanye emadvodza nebesifazane labetsembekile, umphostoli Pawula watsi: “Bonkhe laba bafa banekukholwa.” (Hebheru 11:13) Kungenteka titsa ta-Enoki tasifuna sidvumbu sakhe kodvwa atizange tisitfole ngobe kungenteka Jehova abesifihlile ngobe angafuni kutsi basone noma basisebentisele kutfutfukisa kukhonta kwemanga.

Kufundvwa KweliBhayibheli

(Hebheru 11:1-16) Kukholwa kukutilindzela ngekuciniseka tintfo letetsenjwako, futsi kubufakazi bekuciniseka ngetintfo letikhona mbamba letingakabonwa. 2 Ngobe bantfu basendvulo bafakazelwa ngako.

3 Ngekukholwa, siyati kutsi tintfo letisezulwini nasemhlabeni tentiwe taba khona ngelivi laNkulunkulu, ngobe loko lokubonwako kube khona ngetintfo letingabonakali. 4 Ngekukholwa, Abela wanikela kuNkulunkulu umhlatjelo lobaluleke kakhulu kunewaKhayini, futsi ngalokukholwa kwafakazwa ngaye kutsi ulungile, ngobe Nkulunkulu wamfakazela ngekwemukela tipho takhe; nanobe afile, ngekukholwa kwakhe usakhuluma. 5 Ngekukholwa, Enoki watsatfwa kuze angakuboni kufa, futsi akatfolakalanga ndzawo ngobe Nkulunkulu wamtsatsa; kodvwa ngesikhatsi asengakatsatfwa, kwafakazwa ngaye kutsi abemjabulisile Nkulunkulu. 6 Ngetulu kwaloko, ngaphandle kwekukholwa ngeke kwenteke kutsi umuntfu amjabulise Nkulunkulu, ngobe loyo loya kuye kufanele akholwe kutsi ukhona nekutsi ubanika umvuzo labo labamfuna ngekutimisela. 7 Ngekukholwa, Nowa watsi ngemuva kwekutfola secwayiso lesivela kuNkulunkulu ngetintfo lebetisengakenteki, wabonisa kumesaba, wakha umkhumbi kuze asindzise umndeni wakhe; ngalokukholwa walilahla live, futsi waba yindlalifa yekulunga lokuletfwa kukholwa. 8 Ngekukholwa, Abrahama watsi nakabitwa walalela ngekutsi aphume aye endzaweni labetawunikwa yona njengelifa; waphuma nanobe abengati kutsi uyaphi. 9 Ngekukholwa wahlala njengesihambi eveni lesetsembiso kwaba shengatsi kukulelinye live, futsi wahlala emathendeni na-Isaka kanye naJakobe, labatindlalifa letikanye naye tesetsembiso lesifanako. 10 Ngobe abelindzele lidolobha lelinetisekelo leticinile, lelisungulwe laphindze lakhiwa nguNkulunkulu. 11 Ngekukholwa, Sara wemukela emandla kuze atetfwale abe nentalo, ngisho nobe abesamdzala kakhulu kutsi angatala, ngobe abemetsemba loyo lowetsembisa. 12 Ngaleso sizatfu, ngemuntfu munye labesafana nalofile, kwatalwa bantfwana labanyenti ngangetinkhanyeti tasezulwini, nalabangeke babalwe njengesihlabatsi lesiselugwini lwelwandle. 13 Bonkhe laba bafa banekukholwa nanobe bangazange bakutfole kugcwaliseka kwaletetsembiso, kodvwa batibona tisekhashane, batemukela futsi bavuma kutsi batihambi netakhamuti tesikhashana eveni. 14 Labo labasho loku bakwenta kucace kutsi bayifuna ngekutimisela indzawo letawuba ngeyabo. 15 Nanobe kunjalo, kube bebasolo bayikhumbula indzawo lebebaphume kuyo, bebatawutfola litfuba lekubuyela emuva. 16 Kodvwa bebafuna kutfola indzawo lencono, lokuyindzawo yasezulwini. Ngako Nkulunkulu ute emahloni ngabo, kutsi abitwe ngaNkulunkulu wabo, ngobe ubalungiselele lidolobha.

SEPTEMBER 23-29

UMCEBO LOSEVINI LANKULUNKULU | HEBHERU 12-13

“Siyalo Sibufakazi Bekutsi Jehova Uyasitsandza”

(Hebheru 12:5) kodvwa niwukhohlwe ngalokuphelele umyalo lenatjelwa wona nakukhulunywa nani njengemadvodzana kutsiwa: “Ndvodzana yami, ungawedzeleli umyalo lovela kuJehova, ungapheli emandla nawukhalinyelwa nguye;

w12 3/15 29 ¶18

Ungatibuki Tintfo ‘Letingemuva’

18 Siyalo lesibuhlungu. Kutsiwani nasilingeka kutsi sicabange ngesiyalo lesibuhlungu lesake sasitfola? Loku angeke kusivise buhlungu nje kuphela, kodvwa kungasenta ‘siphelelwe ngemandla.’ (Heb. 12:5) Ngisho nobe siyalo sisala nobe sisemukela bese kutsi ngekuhamba kwesikhatsi singasisebentisi, umphumela utawufanana, ngobe sitawube singasivumeli kutsi sisisite. Kubalulekile-ke kutsi silalele emavi aSolomoni latsi: “Bambelela emyalweni ungawuyekeli, uwulondvolote, ngobe uyimphilo yakho.” (Taga 4:13) Njengemshayeli lohlonipha timphawu temgwaco, asisemukele siyalo, sisisebentise singabuki emuva.—Taga 4:26, 27; fundza Hebheru 12:12,13.

(Hebheru 12:6, 7) ngoba uJehova uyamyala lowo amthandayo; eqinisweni, ujezisa wonke umuntu amamukela njengendodana.” 7 Nikhuthazela ngenjongo yokuba niyalwe. UNkulunkulu usebenzelana nani ngokungathi ningamadodana. Ngoba iyiphi indodana engayalwa uyise?

w12 7/1 21 ¶3

“Njalo Nanithantaza, Nibotsi, ‘Babe’”

Babe lonelutsandvo uyabayala bantfwana bakhe, ngoba ufuna babe balabakahle nasebakhulile. (Efesu 6:4) Umtali lonjalo angahle abe nesandla lesicinile, kodvwa akabaphatsi kabi bantfwana bakhe nakabalungisa. Ngendlela lefanako, Babe wetfu losezulwini ngaletinye tikhatsi ukubona kudzingeka kutsi asiyale. Kodvwa Nkulunkulu uhlale asiyala ngelutsandvo futsi asiphatsi kabi nakasiyala. NaJesu, njengaBabe wakhe, bekete lukhahlo, ngisho nalapho bafundzi bakhe bebephuta kulalela ngekushesha kuloko lebekabalungisa kuko.—Matewu 20:20-28; Lukha 22:24-30.

(Hebheru 12:11) Kuliciniso kutsi kute siyalo lesibonakala sijabulisa ngaleso sikhatsi, kodvwa sibuhlungu; kepha ngemuva kwaloko siveta sitselo sekuthula lesikulunga kulabo labaceceshwe ngiso.

w18.03 32 ¶18

“Lalela Siyalo Kuze Uhlakaniphe”

18 Ngisho noma siyalo sibuhlungu, kute lokubuhlungu kakhulu kwendlula imiphumela lemibi yekungasemukeli. (Heb. 12:11) Cabanga ngesibonelo saKhayini neseNkhosi Sedekiya. Ngesikhatsi Khayini atfukutselele Abela futsi afuna kumbulala, Nkulunkulu wamekhuta watsi: “Utfukutseleleni? Buso bakho bunyukumaleleni? Angitsi nawenta lokulungile, uyemukeleka? Nawungenti lokulungile, sono siyakucatsamela ngasemnyango. Sifuna wena, kodvwa wena kufanele usincobe.” (Gen. 4:6, 7) Khayini akazange alalele futsi sono samncoba. Khayini watiletsela buhlungu kanye nekuhlupheka lebekangeke ahlangabetane nako. (Gen. 4:11, 12) Buhlungu besiyalo lesivela kuNkulunkulu bebutawuba ncono nabucatsaniswa nekuhlupheka latiletsela kona.

Kufunisisa Umcebo EVini LaNkulunkulu

(Hebheru 12:1) Ngako-ke ngenca yekutsi sinelifu lelikhulu kangaka labofakazi lelisitungeletile, asilahle konkhe lokusindzako nesono lesisigigela kamelula, siwugijime ngekucinisela umncintiswano losembikwetfu,

w11 9/15 17-18 ¶11

Wugijime Ngekucinisela Lomncintiswano

11 ‘Sicumbi lesikhulu sabofakazi,’ besingasibo nje bantfu labebetele kutobukela umncintiswano nobe kutewubona tingijimi labatitsandzako tincoba. Kunaloko, bebahlanganyela kulomncintiswano. Bawugijima ngemphumelelo lomncintiswano, futsi bawucedza. Ngisho nobe sebafa, kodvwa basengatikhutsata tingijimi letisandza kucala kulomncintiswano. Asewucabange nje kutsi ingijimi lengenele umncintiswano beyingativa njani nangabe beyingati kutsi emkhatsini webantfu labayibukele kukhona nalabatsite labake baba tingijimi letiphumelelako. Beyingeke yini ifune kwenta konkhe lokusemandleni ayo nobe yente kancono kwendlula labanye? Labofakazi basendvulo bebangayicinisekisa ngekutsi nanobe lomncintiswano longekwemfanekiso umatima, kodvwa ingawuncoba. Ngako-ke, ngekucabangisisa ngetibonelo ‘tesicumbi lesikhulu sabofakazi,’ emaKhristu langemaHebheru angelikhulu lekucala bewangaba nesibindzi, futsi ‘awugijime ngekucinisela lomncintiswano.’ Natsi lamuhla singenta lokufananako.

(Hebheru 13:9) Ningadukiswa timfundziso letehlukahlukene naletingatiwa; ngobe kuncono kutsi inhlitiyo iciniswe ngemusa waNkulunkulu kunekutsi iciniswe ngalokudliwako, lokungabazuzisi labo labakunakile.

w89-ZU 12/15 22 ¶10

Nikela Ngemihlatjelo Lejabulisa Jehova

10 EmaHebheru bekadzinga kugwema ‘kudukiswa timfundziso letehlukahlukene naletingatiwa’ talabo lebebaguculela labanye enkholweni yebuJuda. (Galathiya 5:1-6) Inhlitiyo bekufanele icine kute ibambelele ecinisweni “ngemusa waNkulunkulu,” hhayi-nje ngaletimfundziso. Kuyakhanya kutsi labanye bebaphikisana ngekudla kanye nangemihlatjelo, kungako Pawula atsi inhlitiyo ayiciniswa ‘ngulokudliwako lokungabazuzisi labo labakunakile.’ Tinzuzo tekuba nebuhlobo lobuhle naNkulunkulu kutsi sibese sitinikela ngalokuphelele kuye siphindze siyitsatse njengalebalulekile inhlawulo, hhayi ngekukhatsateka ngalokungenasidzingo mayelana nekudla lokutsite kanye nekugujwa kwemalanga latsite. (Roma 14:5-9) Ngetulu kwaloko, umhlatjelo waKhristu wenta iminikelo lebeyentiwa ngemaLevi kutsi ingasasebenti.—Hebheru 9:9-14; 10:5-10.

Kufundvwa KweliBhayibheli

(Hebheru 12:1-17) Ngako-ke ngenca yekutsi sinelifu lelikhulu kangaka labofakazi lelisitungeletile, asilahle konkhe lokusindzako nesono lesisigigela kamelula, siwugijime ngekucinisela umncintiswano losembikwetfu, 2 njengobe sinakisise uMmeleli Loyinhloko neMphelelisi wekukholwa kwetfu, longuJesu. Ngobe ngenca yenjabulo lebeyibekwe embikwakhe wabeketelela kufa elugodvweni, wangalinaki lihlazo, futsi wahlala ngesekudla sesihlalo sebukhosi saNkulunkulu. 3 Ngako cabangisisani ngaloyo lowabeketelela inkhulumo lephikisako yetoni lebeyitilahla, kuze ningadzinwa bese niphelelwa ngemandla. 4 Ekulweni kwenu nalesono, nisengakake namelana naso kwadzimate kwacitseka ingati, 5 kodvwa niwukhohlwe ngalokuphelele umyalo lenatjelwa wona nakukhulunywa nani njengemadvodzana kutsiwa: “Ndvodzana yami, ungawedzeleli umyalo lovela kuJehova, ungapheli emandla nawukhalinyelwa nguye; 6 ngobe Jehova uyamyala loyo lamtsandzako; ecinisweni, uyabajezisa bonkhe labemukela njengemadvodzana.” 7 Kufanele nicinisele ngobe loko kuyincenye yekuyalwa kwenu. Nkulunkulu uniphatsa njengemadvodzana. Ikhona yini indvodzana uyise langayiyali? 8 Kodvwa nangabe nonkhe ningazange nihlanganyele kulesiyalo, benitawube anisiwo emadvodzana akhe, kepha benitawube ningemavezandlebe. 9 Ngetulu kwaloko, bobabe betfu lababantfu bebasiyala, futsi besibahlonipha. Akukafaneli yini sititfobe kakhulu kuBabe wekuphila kwetfu kwemoya kuze siphile? 10 Bebasiyala kwesikhashana ngekwaloko lobekubonakala kukuhle kubo, kodvwa yena usiyala kuze kusitakale tsine khona sitewuba ngcwele njengaye. 11 Kuliciniso kutsi kute siyalo lesibonakala sijabulisa ngaleso sikhatsi, kodvwa sibuhlungu; kepha ngemuva kwaloko siveta sitselo sekuthula lesikulunga kulabo labaceceshwe ngiso. 12 Ngako-ke, cinisani tandla letibutsakatsaka nemadvolo lacegako, 13 nichubeke nicondzisa tindlela tetinyawo tenu, kuze lilunga lelichutako lingabese lichuta kakhulu, kepha liphiliswe. 14 Lwelani kuba nekuthula nabo bonkhe bantfu, nilwele nekuba ngcwele, ngobe kute umuntfu longayibona iNkhosi nakangasingcwele. 15 Caphelisisani kutsi kubete lowehluleka kutfola umusa waNkulunkulu, nekutsi kungaveli imphandze lenashevu letawubangela tinkinga, kuze kungabi khona labangcoliswa ngiyo; 16 emkhatsini wenu akungabi khona losidlundlulu nobe umuntfu longatitsatsi njengaletibalulekile tintfo letingcwele, njenga-Esawu, lowalahla lilungelo lakhe lebutibulo kute nje atfole sidlo sinye. 17 Ngobe niyati kutsi ekugcineni ngesikhatsi asafuna kutfola sibusiso, waliwa, futsi ngisho nobe abetama kushintja lesincumo ngetinyembeti, akazange akhone.

SEPTEMBER 30–OCTOBER 6

UMCEBO LOSEVINI LANKULUNKULU | JAKOBE 1-2

“Indlela Sono Lesikuveta Ngayo Kufa”

(Jakobe 1:14) Kodvwa nguloyo naloyo ulingwa ngekuhungwa nangekuyengwa sifiso sakhe.

g17-ZU.4 14

Silingo

Siyalingeka nangabe sibona intfo letitsite lesikhangako, ikakhulukati nangabe kuyintfo lekabi. Asesibekise, asesitsi uya esitolo kuyotsenga lokutsite bese ubona lenye intfo lekukhangako. Ingcondvo yakho bese ikutjela kutsi lentfo ungayeba futsi bangakubambi. Nobe kunjalo, nembeza wakho akwekhute! Ngako uyayekela kucabanga ngako futsi uchubekele embili. Ngaleyondlela, usuke sewusincobile silingo.

LOKO LOKUSHIWO LIBHAYIBHELI

Kulingwa akukwenti ube ngumuntfu lomubi. LiBhayibheli liyasho kutsi sonkhe sihlale silingwa. (1 Khorinte 10:13) Kodvwa lokubaluleke kakhulu kutsi senta njani nasilingwa. Labanye bahlale bacabangisisa ngetifiso lembi futsi ngekushesha sibese siyabancoba silingo. Labanye bavele bayikhweshise ngekushesha imicabango lemibi.

“Kodvwa nguloyo naloyo ulingwa ngekuhungwa nangekuyengwa sifiso sakhe.”—Jakobe 1:14.

(Jakobe 1:15) Ngako sifiso nasesakhekile siveta sono; bese kutsi sono nasesentiwe, siletse kufa.

g17-ZU.4 14

Silingo

LiBhayibheli lisitjela ngetinyatselo letingasibangela kutsi sone. Jakobe 1:15 utsi: “Sifiso [lesibi] nasesakhekile siveta sono.” Ngemavi lalula, nasihlale sicabanga ngesifiso lesibi, sifika esigabeni lapho khona tento tetfu setisiphocelela kutsi sikwente loko besisolo sikufisa njengamake lotetfwele nasabeleka. Nobe kunjalo, singativikela kutsi singabi tigcili temicabango lemibi. Singayincoba.

Kufunisisa Umcebo EVini LaNkulunkulu

(Jakobe 1:17) Tonkhe tipho letinhle naletiphelele tivela etulu, tichamuka kuYise wetibane tasesibhakabhakeni, longagucuki nobe ashintje njengesitfunti.

it-2-E 253-254

Tibane

Jehova ‘unguYise wetibane tasesibhakabhakeni.’ (Jak. 1:17) Akasuye nje kuphela ‘loyo lowabeka lilanga kutsi likhanyise emini, lomisa inyanga netinkhanyeti kutsi tibokhanyisa ebusuku,” (Jer. 31:35) kodvwa nguye longuMtfombo wekukhanya kwetintfo letiphatselene naNkulunkulu. (2Khor. 4:6) Imitsetfo yakhe, liVi lakhe, kanye netimiso takhe, kusibane kulabo labavumela kulawulwa nguye. (Hla. 43:3; 119:105; Taga 6:23; Isa. 51:4) Umhlabeleli watsi: “Kukhanya sikubona ekukhanyeni kwakho.” (Hla. 36:9; catsanisa na-Hla. 27:1; 43:3.) Njengekukhanya kwelilanga lokuchubeka kukhanya kusukela entsantsakusa “lokuya ngekuya kuze kube ngusemini,” ikanjalo nendlela yemuntfu lolungile, isitwa kuhlakanipha lokuvela kuNkulunkulu, ikhanya kuze kube semini. (Taga 4:18) Kulandzela loko lokushiwo nguJehova kufana nekuhamba ekukhanyeni kwakhe. (Isa. 2:3-5) Ngakulokunye, nangabe umuntfu abuka tintfo ngendlela lengakalungi nobe ngetinhloso letimbi, usuke asebumnyameni lobukhulu. Njengobe Jesu asho: “Nangabe liso lakho lilibi, umtimba wakho wonkhe ngeke ukhanye. Nangabe kukhanya lokukuwe kubumnyama, lobo bumnyama butawuba bukhulu kakhulu.”—Mat. 6:23 catsanisa na-Dut. 15:9; 28:54-57; Taga 28:22; 2 Phet. 2:14.

(Jakobe 2:8) Nenta kahle nangabe niwugcina umtsetfo webukhosi ngekuvumelana nembhalo lotsi: “Kufanele utsandze makhelwane wakho njengobe utitsandza wena.”

it-2-E 222 ¶4

Umtsetfo

“UMtsetfo Webukhosi.” “Umtsetfo webukhosi” uphakeme kakhulu futsi ubaluleke kakhulu kunaleminye imitsetfo lecondzisa bantfu kutsi babe nebuhlobo inkhosi lengatsandza kutsi I be nabo nebantfu. (Jak. 2:8) Injongo leyinhloko yekusungulwa kwesivumelwane seMtsetfo bekukukhutsata lutsandvo; bese kutsi ‘kutsandza makhelwane wakho njengobe utitsandza wena’ (lokungumtsetfo webukhosi) bekungumtsetfo wesibili kuyo yonkhe iMitsetfo kanye nebaPhrofethi. (Mat. 22:37-40) Nanobe emaKhristu angekho ngaphasi kwesivumelwane seMtsetfo, kodvwa onkhe angephansi kwemtsetfo weNkhosi Jehova neNdvodzana yakhe, iNkhosi Jesu Khristu, ngekuvumelana nesivemelwane lesisha.

Kufundvwa KweliBhayibheli

(Jakobe 2:10-26) Nome ngubani logcina wonkhe uMtsetfo kodvwa ephule munye kuwo, usuke asayephule yonkhe. 11 Ngobe loyo lowatsi: “Ungaphingi,” waphindze watsi: “Ungabulali.” Nangabe-ke ungaphingi kodvwa ube ubulala, sewuwephulile uMtsetfo. 12 Chubekani nikhuluma futsi nitiphatsa ngendlela lefana neyalabo labatakwehlulelwa ngeMtsetfo webantfu labakhululekile. 13 Ngobe loyo longawubonisi umusa utakwehlulelwa ngephandle kwemusa. Umusa uncoba kakhulu kunesehlulelo. 14 Bazalwane bami, kusita ngani kutsi umuntfu atsi unekukholwa kodvwa abe ete imisebenti? Angitsi loko kukholwa ngeke kumsindzise? 15 Nangabe umzalwane nobe dzadze eswele kwekwembatsa nobe kudla lokwenele kwelilanga, 16 bese lomunye wenu utsi kuye: “Hamba ngekuthula, ufutfumale futsi wesutse,” kodvwa angamniki lokudzingwa ngumtimba wakhe, loko kusita ngani? 17 Ngendlela lefanako, nekukholwa nakute imisebenti kufile. 18 Kepha lomunye utawutsi: “Wena unekukholwa, mine nginemisebenti. Ngikhombise kukholwa kwakho ngaphandle kwemisebenti, mine ngitakukhombisa kukholwa kwami ngemisebenti.” 19 Angitsi uyakholwa kutsi kunaNkulunkulu munye? Wenta kahle, kodvwa nemadimoni nawo ayakholwa futsi achachatele. 20 Wena muntfu lolibele, uyati yini kutsi kukholwa ngaphandle kwemisebenti akusiti ngalutfo? 21 Akuzange yini kutsiwe Abrahama longubabe wetfu ulungile ngemisebenti, ngemuva kwekutsi anikele nga-Isaka indvodzana yakhe elatini? 22 Uyabona-ke kutsi kukholwa kwakhe kwahambisana nemisebenti futsi kwapheleliswa ngayo, 23 kwaphindze kwagcwaliseka nembhalo lotsi: “Abrahama wakholwa kuJehova, kwatsiwa ulungile,” wabitwa ngekutsi “ngumngani waJehova.” 24 Niyabona-ke kutsi umuntfu kutawutsiwa ulungile ngemisebenti, hhayi ngekukholwa kuphela. 25 Ngendlela lefanako, akuzange yini kutsiwe Rahabi ingwadla ulungile ngemisebenti, ngemuva kwekutsi atemukele kahle titfunywa, futsi watikhipha ngalenye indlela? 26 Ngako-ke, njengobe umtimba ngaphandle kwemoya ufile, nekukholwa ngaphandle kwemisebenti kufile.

    Tincwadzi TesiSwati (2002-2025)
    Phuma
    Ngena
    • SiSwati
    • Share
    • Khetsa Lokufunako
    • Copyright © 2025 I-Watch Tower Bible and Tract Society of Pennsylvania
    • Imibandzela Yekuyisebentisa
    • Kusetjentiswa Kwemininingwane Yakho
    • Privacy Settings
    • JW.ORG
    • Ngena
    Share