Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
AUGUST 5-11
UMCEBO LOSEVINI LANKULUNKULU | 2 THIMOTHI 1-4
“Nkulunkulu Akazange Asinike Umoya Webugwala”
(2 Thimothi 1:7) Ngobe Nkulunkulu akazange asinike umoya webugwala, kepha wasinika umoya wemandla, welutsandvo, newekuba nengcondvo lebhadlile.
w09-ZU 5/15 15 ¶9
Bantfu Labasha—Yentani Intfutfuko Yenu Ibonakale
9 Kute asite Thimothi, Pawula wamkhumbuta kutsi: “Nkulunkulu akazange asinike umoya webugwala, kepha wasinika umoya wemandla, welutsandvo, newekuba nengcondvo lebhadlile.” (2 Thim. 1:7) Kuba “nengcondvo lebhadlile” kufaka ekhatsi kusebentisa likhono lekucabanga ngendlela lehlakaniphile. Kuphindze kufake ekhatsi kumelana nesimo njengobe sinjalo, hhayi ngendlela longafisa kutsi sibe ngayo. Labanye labasha bakhombise umoya webugwala futsi betame kubalekela timo leticindzetelako ngekutsi balale kakhulu noma babukele kakhulu i-TV, basebentise kabi tidzakamiva kanye netjwala, baye emaphathini noma batiphatse kabi ngekwelicasi. EmaKhristu ecwayiswa kutsi ‘akulahle kungamhloniphi Nkulunkulu netifiso talelive, kodvwa aphile ngengcondvo lebhadlile, ngekulunga, nangekwesaba Nkulunkulu kulelive.’—Thithusi 2:12.
(2 Thimothi 1:8) Ngako-ke ungabi nemahloni ekufakaza ngeNkhosi nome ngami, mine lengisiboshwa ngenca yayo, kodvwa hlanganyela ekuhluphekeni ngenca yetindzaba letimnandzi, ngekutsi wetsembele emandleni aNkulunkulu.
w03-ZU 3/1 9 ¶7
‘Cina Ube Nesibindzi!’
7 Nakabhalela Thimothi, Pawula watsi: “Nkulunkulu akazange asinike umoya webugwala, kepha wasinika umoya wemandla . . . Ngako-ke ungabi nemahloni ekufakaza ngeNkhosi.” (2 Thimothi 1:7, 8; Makho 8:38) Ngemuva kwekufundza lamavi, singatibuta: ‘Ngiyesaba yini kukhuluma ngalengikukholelwako nome nginesibindzi? Nangisemsebentini nome ngisesikolweni, ngiyabatjela yini labanye kutsi nginguFakazi waJehova nobe ngivele ngikufihle loko? Ngiyahlazeka yini ngenca yekutsi ngehlukile kulabanye nobe ngiyatigcabha ngenca yekutsi nginebuhlobo lobuhle naJehova?’ Nangabe kukhona lonemahloni ekushumayela tindzaba letimnandzi nobe lokhetsa kwehluka kulabanye, kufanele akhumbule seluleko Jehova lasiniketa Joshuwa, lesitsi: “Cina, ube nesibindzi.” Kufanele singakhohlwa kutsi akusiwo umbono walesifundza nabo nobe lesisebenta nabo lobalulekile, kodvwa ngumbono waJehova newaJesu Khristu.—Galathiya 1:10.
Kufunisisa Umcebo EVini LaNkulunkulu
(2 Thimothi 2:3, 4) Njengelisotja lelihle laKhristu Jesu, nawe kubeketelele kuhlupheka. 4 Kute umuntfu lolisotja lotifaka etindzabeni tekutsengiselana, nangabe afuna kwemukelwa nguloyo lamcashe njengelisotja.
Kufuna Umcebo Sibili
13 Thimothewu bekayindvodza lenekukholwa. Ngemuva kwekutsi Pawula abite Thimothewu ngekutsi “lisotja lelihle laKhristu Jesu,” wase utsi kuye: “Kute umuntfu lolisotja lotifaka etindzabeni tekutsengiselana, nangabe afuna kwemukelwa nguloyo lamcashe njengelisotja.” (2 Thim. 2:3, 4) Lamuhla balandzeli baJesu labafaka ekhatsi libutfo lebashumayeli basikhatsi sonkhe labangetulu kwesigidzi, basebentisa leseluleko saPawula kuye ngekutsi timo tabo tibavumela kutsi benteni. Ngekungavumeli kucindzetelwa tintfo letikhangiswako kanye nekucindzetelwa ngulelive labaphila kulo, bakhumbula lesimiso lesitsi: “Nemboleki uba sigcili sembolekisi.” (Taga 22:7) Kute lokunye lokufunwa nguSathane ngaphandle kwekutsi sisebentise onkhe emandla etfu nesikhatsi setfu njengetigcili temcebo walelive. Letinye tincumo lesingatenta tingasibangela kutsi singene shi etikweletini iminyaka leminyenti. Kubhadala tikweleti temiti lemikhulu, kubhadala tikweleti tekufundzisa bantfwana etikolweni letidulile, kubhadala tikweleti tetimoto letidulile, kanye nekwenta imishado ledulile kungabangela kukhatsateka lokukhulu endzabeni yetimali. Sisuke sikhombisa kutsi sihlakaniphile nangabe siphila kuphila lokumelula, sinciphisa tikweleti futsi singatsengi tintfo letidulile, bese sitibekela umgomo wekuba tigcili taNkulunkulu kunekutsi sibe tigcili talelive.—1 Thim. 6:10.
(2 Thimothi 2:23) Ngetulu kwaloko, balekela timphikiswane letibulima naletilite, wati kutsi tibangela kulwa.
Bantfu BaJehova ‘Bayakulahla Kungalungi’
10 Lamuhla, akukavami kutsi bantfu baJehova bahlangabetane netihlubuki ebandleni. Nobe kunjalo, nasitfola timfundziso letingekho emibhalweni, ngisho nome tivela kumuphi umtfombo, kufanele sitsatse sinyatselo lesibalulekile sekutibalekela. Ngeke kube kuhlakanipha kuphikisana netihlubuki, kungaba kukhuluma nato buso nebuso, kuphendvula loko letikushoko emakhelini e-Internet nobe ngaletinye tindlela tekuchumana. Ngisho nobe sihlose kusita loyo muntfu lohlubukile, kucocisana lokunjalo kuphambene nalesicondziso semBhalo lesisandza kusihlola. Njengobe sibantfu baJehova sikubalekela ngalokuphelele kuhlubuka, futsi siyakulahla.
Kufundvwa KweliBhayibheli
(2 Thimothi 1:1-18) Mine Pawula, umphostoli waKhristu Jesu ngentsandvo yaNkulunkulu ngekwesetsembiso sekuphila lesikhona ngaKhristu Jesu, 2 ngibhalela Thimothi umntfwana lotsandzekako: Shengatsi ungaba nemusa, sihawu nekuthula lokuvela kuNkulunkulu longuBabe nakuKhristu Jesu iNkhosi yetfu. 3 Ngiyambonga Nkulunkulu lengimkhonta nganembeza lohlantekile, njengobe bokhokho bami bebenta, kuze ngingakukhohlwa ekuncuseni lengikwenta busuku nemini. 4 Ngilangatelela kukubona njengobe ngikhumbula tinyembeti takho, kuze ngigcwale injabulo. 5 Ngobe ngikhumbula kukholwa kwakho lokute kutentisa, lokwacala kugogo wakho Lowisi nakumake wakho Yunisi, nalengicinisekako kutsi kukhona nakuwe.6 Ngenca yaloku, ngikukhumbuta kutsi uchubeke usenta sivutse njengemlilo sipho saNkulunkulu lesikuwe, lowasitfola ngekutsi ngikubeke tandla. 7 Ngobe Nkulunkulu akazange asinike umoya webugwala, kepha wasinika umoya wemandla, welutsandvo, newekuba nengcondvo lebhadlile. 8 Ngako-ke ungabi nemahloni ekufakaza ngeNkhosi nome ngami, mine lengisiboshwa ngenca yayo, kodvwa hlanganyela ekuhluphekeni ngenca yetindzaba letimnandzi, ngekutsi wetsembele emandleni aNkulunkulu. 9 Wasisindzisa futsi wasibita ngelubito lolungcwele, hhayi ngemisebenti yetfu, kodvwa ngesizatfu senhloso nemusa wakhe. Loku sanikwa kona etikhatsini takadzeni ngaKhristu Jesu, 10 kodvwa nyalo sekwentiwe kwacaca ngekubonakaliswa kweMsindzisi wetfu, Khristu Jesu, lowacedza kufa futsi wenta kuphila nekungonakali kwakhanya ngetindzaba letimnandzi, 11 lengabekwa kutsi ngibe ngumshumayeli, umphostoli kanye nemfundzisi wato. 12 Kungako ngihlupheka ngaletintfo, kodvwa ngite emahloni. Ngobe ngiyamati loyo lengikholwe kuye, futsi ngiyaciniseka kutsi utawukwati kulondvolota loko langinike kona kudzimate kube ngulelo langa. 13 Chubeka ubambelele esibonelweni semavi laphilile lowaweva kimi ngekukholwa nangelutsandvo loluvela ebunyeni naKhristu Jesu. 14 Lilondvolote lelifa lowanikwa lona ngemoya longcwele lohlala kitsi. 15 Uyati kutsi onkhe emadvodza asesifundzeni sase-Asiya angifulatsele, lokufaka ekhatsi boFigelusi naHemogenesi. 16 Shengatsi iNkhosi ingayinika umusa indlu ya-Onesiforusi, ngobe abehlale angivuselela, futsi ete nemahloni ngekuboshwa kwami. 17 Esikhundleni saloko, ngesikhatsi aseRoma, wangifunisisa futsi wangitfola. 18 Shengatsi iNkhosi ingenta kutsi ngalelo langa atfole umusa lovela kuJehova. Nawe utati kahle tonkhe tintfo latenta e-Efesu.
AUGUST 12-18
UMCEBO LOSEVINI LANKULUNKULU | THITHUSI 1–FILEMONI
“Kubekwa Kwemadvodza Lamadzala”
(Thithusi 1:5-9) Ngakushiya eKhrethe kuze ulungise tintfo lebetidzinga kulungiswa futsi ubeke labadzala kuwo onkhe emadolobha, njengobe nje ngakuyala; 6 nangabe ikhona indvodza lengasolwa ngalutfo, lenemfati munye, nalenebantfwana labakholwako labangasolwa ngekutitika ngebubi nalabangavukeli. 7 Njengemphatsi lobekwe nguNkulunkulu, umbonisi kufanele angasoleki, angabi nenkhani, angabi nenhlitiyo lencane, angabi sidzakwa, angabi sidlova, angafuni kutizuzisa yena, 8 kodvwa kufanele emukele tihambi, atsandze lokuhle, abe nengcondvo lebhadlile, abe ngulolungile, etsembeke, atibambe, 9 futsi abambelele emavini letsembekile mayelana nelikhono lakhe lekufundzisa, kuze atewukhona kukhutsata ngemfundziso lephilile, aphindze akhalimele labo labaphikisako.
Imibuto Levela Kubafundzi
Nanobe imiBhalo ingachazi kabanti kutsi bazalwane bebabekwa njani esikhatsini lesendlulile, siyakhona kubona kutsi loku bekwentiwa njani. Siyatjelwa kutsi ngesikhatsi Pawula naBhanabasi basendleleni lebuyela ekhaya besuka eluhambweni lwabo lwekucala lwetitfunywa telivangeli, “babeka labadzala kulelo nalelo bandla. Bathantaza futsi bazila kudla, ngaleyo ndlela babaletsa kuJehova, ngobe nguye lebebakholwe kuye.” (Imis. 14:23) Ngemuva kweminyaka letsite, Pawula wabhalela Thithusi labevame kuhamba naye watsi: “Ngakushiya eKhrethe kuze ulungise tintfo lebetidzinga kulungiswa futsi ubeke labadzala kuwo onkhe emadolobha, njengobe nje ngakuyala.” (Thit. 1:5) Ngendlela lefanako, kubonakala shengatsi Thimothi lowahamba kakhulu nemphostoli Pawula naye wanikwa ligunya lelifanako. (1 Thim. 5:22) Kuyacaca-ke kutsi lokubekwa kwalabazalwane kwakwentiwa babonisi labajikeletako, hhayi baphostoli nemadvodza lamadzala eJerusalema.
Sicabanga ngalesibonelo lesiseBhayibhelini, Sigungu Lesibusako saBoFakazi BaJehova silungise indlela bazalwane labadzala netinceku letisebentako lababekwa ngayo. Kusukela ngaSeptember 1, 2014, lokubekwa kwalabazalwane kutawentiwa ngalendlela: Umbonisi wesigodzi ngamunye utawubuketa ngekucophelela luhla lwebazalwane labanconyiwe esigodzini lasihambelako. Nakavakashele emabandla, utawetama kwati labo labanconyiwe, nakungenteka asebente nabo ensimini. Nasekacoce nesigungu salabadzala balelo bandla ngalabazalwane labanconyiwe, umbonisi wesigodzi unemtfwalo wekubeka labazalwane labadzala netinceku letisebentako emabandleni lasesigodzini lasihambelako. Nakwentiwa njalo, lenchubo itawucishe ifanane naleyo lebeyisetjentiswa ngelikhulu lekucala.
Bobani labanakekela letindzima letehlukahlukene kulenchubo? Njengenhlalayenta, ‘sisebenti lesetsembekile nalesihlakaniphile’ sinemtfwalo loyinhloko wekondla letinye tisebenti. (Mat. 24:45-47) Loku kufaka ekhatsi kutsi lesisebenti lesetsembekile sihlole imiBhalo sisitwa ngumoya longcwele, kute sinikete ticondziso endleleni letingasetjentiswa ngayo timiso teliBhayibheli letitsintsa indlela emabandla lasemhlabeni wonkhe lahlelwe ngayo. Sisebenti lesetsembekile siphindze sibeke bonkhe babonisi betigodzi nemalunga eKomidi Yeligatja. Lihhovisi leligatja ngalinye liniketa lusito endleleni yekusebentisa leticondziso leliniketwe tona. Sigungu salabadzala ngasinye sinendzima lebalulekile yekubuketa ngekucophelela tintfo letishiwo yimiBhalo lokufanele tentiwe bazalwane lababancome kutsi babekwe ebandleni laNkulunkulu. Umbonisi wesigodzi ngamunye unemtfwalo lobalulekile wekuhlolisisa labazalwane labanconywe ngulabadzala, futsi athantaze ngalendzaba ngemuva kwaloko abeke bazalwane labafanelekako.
Kufunisisa Umcebo EVini LaNkulunkulu
(Thithusi 1:12) Lomunye longumphrofethi wawo watsi: “Bantfu baseKhrethe bahlale bacala emanga, batilwane tesiganga letilimatako, netimiti letivilaphako.”
w89-ZU 5/15 31 ¶5
Imibuto Levela Kubafundzi
Umphostoli Pawula bekangavumelani nekubukelwa phasi kwebantfu baseKhrethe. Lokusenta siciniseke ngaloko kutsi Pawula bekati kutsi eKhrethe bekunemaKhristu lebekamukelwa nguNkulunkulu futsi labegcotjwe ngemoya wakhe longcwele. (Imisebenti 2:5, 11, 33) “Kuwo onkhe emadolobha” bekunemabandla labenemaKhristu latinikele. Ngisho nobe lamaKhristu bekanesono, singaciniseka kutsi lamaKhristu bekangahlali acala emanga, atilwane tesiganga letilimatako netimiti letivilaphako; ngobe kube bekunjalo, Jehova bekangeke achubeke awemukela. (Filiphi 3:18, 19; Sembulo 21:8) Kungenteka eKhrethe bebakhona bantfu labanetinhlitiyo leticotfo lebebeva buhlungu ngenca yekutiphatsa kwebantfu labebabatungeletile futsi lebebatimisele kwemukela umlayeto loseBhayibhelini.—Hezekeli 9:4; catsanisa Imisebenti 13:48.
(Filemoni 15, 16) Mhlawumbe kungako abekushiye sikhashana, kuze utewuba naye siphelane, 16 hhayi njengesigcili, kodvwa abe ngetulu kwesigcili, abe ngumzalwane lotsandzekako, ikakhulukati kimi, kodvwa kakhulu kangakanani-ke kuwe njengobe usihlobo sakhe enyameni naseNkhosini.
w08-ZU 10/15 31 ¶4
Emaphuzu Lagcamile Lasencwadzini YaThithusi, Filemoni, neyemaHebheru
15, 16—Kungani Pawula angazange atjele Filemoni kutsi akhulule Onesimuse? Pawula bekanake kakhulu umsebenti wakhe ‘wekushumayela kubo ngeMbuso waNkulunkulu, abafundzisa ngesibindzi ngetintfo letimayelana neNkhosi lenguJesu Khristu.’ Ngako wakhetsa kungatingeni tindzaba talabanye bantfu, letifaka ekhatsi kuba sigcili.—Imisebenti 28:31.
Kufundvwa KweliBhayibheli
(Thithusi 3:1-15) Chubeka ubakhumbuta kutsi batfobele futsi balalele babusi netiphatsimandla, balungele yonkhe imisebenti lemihle, 2 bangakhulumi kabi nganobe ngubani, bangatsandzi kulwa, bacabangele, babe nemusa kubo bonkhe bantfu. 3 Ngobe natsi sake saba bete ingcondvo, singalaleli, sidukiswa, sitigcili tetifiso letehlukahlukene kanye nenjabulo, siphila ebubini nangemona, senyanyeka, futsi sitondzana. 4 Kodvwa-ke ngesikhatsi umusa weMsindzisi wetfu, lokunguNkulunkulu, kanye nelutsandvo lwakhe ngebantfu luvetwa, 5 (hhayi ngenca yemisebenti lemihle lesayenta, kodvwa ngenca yemusa wakhe) wasisindzisa ngekusigeza lokwasinika kuphila, nangekusenta sibe basha ngemoya longcwele. 6 Lomoya wawutfululela kitsi ngalokuphuphumako ngaJesu Khristu uMsindzisi wetfu, 7 kuze kutsi nasekutsiwe silungile ngemusa wakhe, sibe tindlalifa ngekuvumelana nelitsemba lekuphila lokuphakadze. 8 Etsembekile lamavi, futsi ngifuna kutsi ngaso sonkhe sikhatsi utigcizelele letintfo, kuze labo labakholwe nguNkulunkulu batewunaka kwenta imisebenti lemihle. Letintfo tinhle futsi tilusito kubantfu. 9 Kodvwa tibalekele timphikiswane letibulima, imilandvo yetinhlu tekutalana, imibango kanye nekulwisana ngeMtsetfo, ngobe akuzuzisi ngalutfo futsi kulite. 10 Ngemuva kwekutsi umuntfu lokhutsata lihlelo sewumyale kwekucala nekwesibili, uboyekela kutihlanganisa naye; 11 ngobe loyo muntfu uphambukile endleleni, uyona, futsi utilahla yena. 12 Nangitfuma Athemasi nobe Thikhikhusi kuwe, ubokwenta konkhe lokusemandleni akho kutsi ute kimi eNikhopolisi, ngobe ngihlele kubucitsa khona busika. 13 Yetama kutsi unike Zenasi, lowati uMtsetfo, na-Apholosi tonkhe tintfo labatawutidzinga eluhambeni lwabo. 14 Bantfu bakitsi nabo abafundze kuhlale benta imisebenti lemihle kuze banakekele tidzingo tabo letibalulekile, khona bangatewuba ngulabangatseli. 15 Bonkhe labo lenginabo bayakuvusela. Ubovusela labo labasitsandzako ekukholweni. Shengatsi umusa waNkulunkulu ungaba nani nonkhe.
AUGUST 19-25
UMCEBO LOSEVINI LANKULUNKULU | HEBHERU 1-3
“Tsandza Kulunga Utondze Bubi”
(Hebheru 1:8) Kodvwa mayelana neNdvodzana utsi: “Nkulunkulu usihlalo sakho sebukhosi phakadze naphakadze, nentfonga yeMbuso wakho iyintfonga yekulunga.
Dvumisani Khristu, INkhosi Lekhatimulako!
8 Jehova wabeka iNdvodzana yakhe kutsi ibe yiNkhosi lenguMesiya ezulwini nga-1914. ‘Intfonga yembuso wakhe iyintfonga yekulunga,’ ngako singaciniseka kutsi kubusa kwakhe kutawuba ngulokukahle nalokulungile. Unelilungelo lekuba yiNkhosi ngobe Nkulunkulu ‘usihlalo sakhe sebukhosi,’ lokusho kutsi nguJehova lombeke kutsi abe yiNkhosi. Ngetulu kwaloko, bukhosi baJesu butawuba khona “phakadze naphakadze.” Akukujabulisi yini kukhonta Jehova uholwa yiNkhosi lenemandla lebekwe nguye?
(Hebheru 1:9) Wakutsandza kulunga, wabutondza bubi. Kungako Nkulunkulu, longuNkulunkulu wakho akugcobe ngemafutsa lakwenta ujabule kwendlula balingani bakho.”
Dvumisani Khristu, INkhosi Lekhatimulako!
7 Fundza Tihlabelelo 45:6, 7. Ngesizatfu sekutsi Jesu wakukhombisa ngelizinga lelisetulu kutsandza kulunga futsi wenyanya nome yini lengehlisa sitfunti seYise, Jehova wamgcoba waba yiNkhosi yeMbuso wakhe. Jesu wagcotjwa “ngemafutsa enjabulo” waba ngetulu ‘kwebangani bakhe,’ emakhosi akaJuda laseluhlwini lwaDavide. Njani? Kwekucala kutsi Jesu wagcotjwa nguJehova lucobo lwakhe. Ngetulu kwaloko, Jehova wamgcoba waba yiNkhosi futsi waba ngumPhristi Lophakeme. (Hla. 2:2; Heb. 5:5, 6) Lokunye kutsi Jesu wagcotjwa ngemoya longcwele hhayi ngemafutsa, futsi bukhosi bakhe basezulwini hhayi emhlabeni.
Kufunisisa Umcebo EVini LaNkulunkulu
(Hebheru 1:3) Ikubonakaliswa kwenkhatimulo yaNkulunkulu, futsi inguwo kanye umfanekiso webunguye baKhe, isekela tonkhe tintfo ngelivi layo lelinemandla; ngemuva kwekuhlanta tono tetfu yahlala ngesekudla saNkulunkulu ezulwini.
it-1-E 1185 ¶1
Umfanekiso
Jesu bekasolo akhombisa kutsi ufana naBabe wakhe ngelizinga lelifanako yini?
Jesu lolitibulo laNkulunkulu wakhula waba ngumfanekiso waBabe wakhe. (2Khor. 4:4) Nanobe bekusebaleni kutsi Nkulunkulu bekakhuluma ngaJesu nakatsi, “Asente bantfu, babe ngumfanekiso wetfu,” lokufana kweNdvodzana kuBabe wayo longuMdali, kwacala ngalesikhatsi leNdvodzana idalwa. (Gen. 1:26; Joh. 1:1-3; Khol. 1:15, 16) Ngesikhatsi asasemhlabeni, Jesu wakhombisa timfanelo kanye nebuntfu bababe wakhe ngelizinga leliphakeme kakhulu kwendlula indlela bantfu labangakukhombisa ngayo futsi kungako bekangasho kutsi “Loyo longibonile mine umbonile naBabe.” (Joh. 14:9; 5:17, 19, 30, 36; 8:28, 38, 42) Kodvwa lokufana lokukhulunywa ngako, kwakhula ngalesikhatsi Jesu avuselwa ekuphileni kwasezulwini futsi ‘anikwa lonkhe ligunya ezulwini nasemhlabeni’ nguBabe wakhe Jehova Nkulunkulu. (1 Phet. 3:18; Mat. 28:18) Njengoba Nkulunkulu besaphakamisele Jesu “esikhundleni lesisetulu,” leNdvodzana yaNkulunkulu beseyikhombisa inkhatimulo lefana neyaBabe wayo ngelizinga leliphakeme kakhulu kunesikhatsi ishiya emazulu ita emhlabeni. (Fil. 2:9; Heb. 2:9) Nyalo, “inguwo kanye umfanekiso webunguye [baNkulunkulu].”—Heb. 1:2-4
(Hebheru 1:10-12) Futsi utsi: “Ekucaleni, wena Nkhosi wabeka tisekelo temhlaba, nemazulu angumsebenti wetandla takho. 11 Atawubhubha, kodvwa wena utawuhlale ukhona; njengengubo, onkhe atawuguga, 12 futsi utawagoca njengesembatfo nanjengengubo; atawushintjwa kodvwa wena uhlala unjalo, neminyaka yakho ngeke ize iphele.”
it-1-E 1063 ¶6
Lizulu
Emavi eTihlabelelo 102:25, 26 akhuluma ngaJehova kodvwa umphostoli Pawula wawasebentisa nakakhuluma ngaJesu Khristu. Loku kungenca yekutsi iNdvodzana yaNkulunkulu letelwe yodvwa wayisebentisa nakenta konkhe lokusemhlabeni nasezulwini. Pawula watsi iNdvodzana itawuhlale ikhona nakayicatsanisa nendalo lekhona njengobe Nkulunkulu, nakafuna, ‘angayigoca njengesembatfo’ futsi ayibeke eceleni.—Heb. 1:1, 2, 8, 10-12; catsanisa na-1 Phet. 2:3.
Kufundvwa KweliBhayibheli
(Hebheru 1:1-14) Endvulo Nkulunkulu wakhuluma nabokhokho betfu tikhatsi letinyenti nangetindlela letinyenti asebentisa baphrofethi. 2 Nyalo ekupheleni kwaletikhatsi, ukhulume natsi ngeNdvodzana, leyo layibeka njengendlalifa yato tonkhe tintfo, futsi watenta ngayo tintfo letisemhlabeni naletisezulwini. 3 Ikubonakaliswa kwenkhatimulo yaNkulunkulu, futsi inguwo kanye umfanekiso webunguye baKhe, isekela tonkhe tintfo ngelivi layo lelinemandla; ngemuva kwekuhlanta tono tetfu yahlala ngesekudla saNkulunkulu ezulwini. 4 Ngako seyibe ncono kakhulu kunetingilosi, kangangekutsi itfole ligama lelihle kakhulu kunelato. 5 Nasi sibonelo: Ikhona yini ingilosi Nkulunkulu lake watsi kuyo: “Wena uyindvodzana yami, lamuhla mine ngibe nguyihlo”? Nobe watsi: “Ngitawuba nguyise, yona ibe yindvodzana yami”? 6 Mayelana nesikhatsi latawuphindze aletse ngaso Litibulo lakhe emhlabeni, utsi: “Tonkhe tingilosi taNkulunkulu atimkhotsamele.” 7 Mayelana netingilosi, uphindze atsi: “Wenta tingilosi takhe tibe ngumoya, netinceku takhe tibe lilangabi lemlilo.” 8 Kodvwa mayelana neNdvodzana utsi: “Nkulunkulu usihlalo sakho sebukhosi phakadze naphakadze, nentfonga yeMbuso wakho iyintfonga yekulunga. 9 Wakutsandza kulunga, wabutondza bubi. Kungako Nkulunkulu, longuNkulunkulu wakho akugcobe ngemafutsa lakwenta ujabule kwendlula balingani bakho.” 10 Futsi utsi: “Ekucaleni, wena Nkhosi wabeka tisekelo temhlaba, nemazulu angumsebenti wetandla takho. 11 Atawubhubha, kodvwa wena utawuhlale ukhona; njengengubo, onkhe atawuguga, 12 futsi utawagoca njengesembatfo nanjengengubo; atawushintjwa kodvwa wena uhlala unjalo, neminyaka yakho ngeke ize iphele.” 13 Ikhona yini ingilosi lake wakhuluma ngayo watsi: “Hlala ngesekudla sami ngidzimate ngente titsa takho tibe senabelo setinyawo takho”? 14 Tonkhe atisito yini tidalwa letingumoya letenta umsebenti longcwele, naletitfunyelwe kusita labo labatawutfola insindziso?
AUGUST 26–SEPTEMBER 1
UMCEBO LOSEVINI LANKULUNKULU | HEBHERU 4-6
“Lwela Kungena Ekuphumuleni Kwankunkulu”
(Hebheru 4:1) Ngako njengobe sisekhona setsembiso sekungena ekuphumuleni kwakhe, asicaphele kuze kutsi emkhatsini wenu kubete losalela ngephandle.
(Hebheru 4:4) Ngobe kulomunye umbhalo wakhuluma ngelilanga lesikhombisa watsi: “Nkulunkulu waphumula kuyo yonkhe imisebenti yakhe ngelilanga lesikhombisa,”
Kuyini Kuphumula KwaNkulunkulu?
3 Kunebufakazi lobubili lobusenta siphetse ngekutsi lilanga lesikhombisa belisachubeka ekhulwini lekucala C.E. Kwekucala, cabanga ngemavi aJesu lawasho kubaphikisi bakhe labebamgceka ngekutsi uphilisa ngeliSabatha, lebebacabanga kutsi kungumsebenti. Jesu watsi kubo: “Babe wami seloku usasebenta kuze kube manje; nami-ke ngenta njalo.” (Joh. 5:16, 17) Abechaza kutsini? Jesu bebamsola ngekutsi usebenta ngeliSabatha. Imphendvulo yakhe letsi “Babe seloku usasebenta” yayitiphendvula leto tinsolo. Empeleni Jesu bekatsi kulabantfu: ‘Mine naBabe senta umsebenti lofananako. Njengobe Babe abesolomane asebenta ngeliSabatha, futsi usasebenta nanyalo, nami-ke ngingasebenta ngeliSabatha.’ Lamavi aveta kutsi ngesikhatsi saJesu bekusolo kulilanga lesikhombisa, lilanga laNkulunkulu lekuphumula.
4 Bufakazi besibili buvetwa ngumphostoli Pawula. Ngesikhatsi acaphuna Genesisi 2:2 lokhuluma ngekuphumula kwaNkulunkulu, Pawula waphefumulelwa kutsi abhale: “Tsine lesikholwako siyangena ekuphumuleni kwakhe.” (Heb. 4:3, 4, 6, 9) Loku kukhombisa kutsi ngesikhatsi saPawula, bekusolo kulilanga lesikhombisa. Belitawutsatsa sikhatsi lesingakanani lelilanga lekuphumula?
5 Kute siphendvule lowo mbuto, kufanele sikhumbule injongo yelilanga lesikhombisa. Genesisi 2:3 uyayichaza: “Nkulunkulu walibusisa lilanga lesikhombisa, walingcwelisa.” Jehova wangcwelisa lelo langa ngobe walikhetsa kutsi kube ngilo lafeza ngalo injongo yakhe. Injongo yakhe kutsi emhlabeni kugcwale bantfu labalalelako labatawunakekela, baphindze banakekele nako konkhe lokuphila kuwo. (Gen. 1:28) Ngako-ke, sizatfu lesenta Nkulunkulu Jehova kanye naJesu Khristu, ‘loyiNkhosi yeliSabatha,’ kutsi ‘bachubeke basebenta kute kube manje’ kutsi bafuna leyo njongo igcwaliseke. (Mat. 12:8) Lilanga laNkulunkulu lekuphumula litawuchubeka kute kube ngulapho injongo yakhe seyigcwalisekile. Loku kutawukwenteka ekupheleni kweMinyaka Leyinkhulungwane.
(Hebheru 4:6) Njengobe labanye basengakhona kungena kuko, futsi nalabo tindzaba letimnandzi letashunyayelwa kubo kucala bangazange bangene kuko ngenca yekungalaleli,
Kuyini Kuphumula KwaNkulunkulu?
6 Nkulunkulu wacacisela bo-Adamu na-Eva injongo yakhe ngemhlaba, kodvwa bamelana nayo. Liciniso, bo-Adamu na-Eva baba bantfu bekucala kungalaleli Nkulunkulu, futsi balandzelwe tigidzigidzi tebantfu labangalaleli. Ngisho nebantfu baNkulunkulu, ema-Israyeli, bawela tikhatsi letinyenti kulolugibe lwekungalaleli. Pawula wecwayisa emaKhristu elikhulu lekucala kutsi nawo abengawela kulolugibe lwekungalaleli njengema-Israyeli. Wabhala: “Ngako-ke asikhutsalele kungena kuloko kuphumula, kubete lowehluleka ngenca yekungalaleli njengabo.” (Heb. 4:11) Loko Pawula lakushoko kuveta kutsi bantfu labangalaleli angeke bangene ekuphumuleni kwaNkulunkulu. Kusho kutsini loko kitsi? Kusho kutsi nasimelana nenjongo yaNkulunkulu ngandlelatsite, angeke singene yini ekuphumuleni kwakhe? Kubalulekile kutsi siyati imphendvulo yalombuto, futsi sitawucoca ngayo kabanti kulesihloko. Kwekucala, sitawucoca ngesibonelo lesibi sema-Israyeli nekutsi kungani angangenanga ekuphumuleni kwaNkulunkulu.
(Hebheru 4:9-11) Ngako-ke kusekhona kuphumula kweliSabatha lokusalele bantfu baNkulunkulu. 10 Umuntfu longene ekuphumuleni kwaNkulunkulu uphumulile emisebentini yakhe, njengobe nje naNkulunkulu aphumulile kuyakhe. 11 Asilwele kungena kulokuphumula, kuze kubete umuntfu lowela endleleni lefanako yekungalaleli.
Kuyini Kuphumula KwaNkulunkulu?
16 Ambalwa emaKhristu lamuhla lakholelwa kutsi kute asindziswe kufanele agcine uMtsetfo waMosi. Emavi aPawula laya kubase-Efesu ayacaca: “Empeleni kusindziswa kwenu ngekukholwa kuya ngemusa, futsi loko akuveli kini, sipho nje saNkulunkulu. Loko akuveli ngemisebenti, funa kube khona lotibongako.” (Ef. 2:8, 9) Ngako-ke, emaKhristu angangena njani ekuphumuleni kwaNkulunkulu lamuhla? Jehova wakhetsa lilanga lesikhombisa kutsi libe lilanga lakhe lekuphumula, kute agcwalise injongo lanayo ngemhlaba. Singangena ekuphumuleni kwaJehova ngekumlalela futsi sibambisane nenhlangano yakhe.
17 Kodvwa sisuke senta ngalokumelene nenjongo yaJehova nangabe singasilaleli sisebenti lesetsembekile nalesihlakaniphile, futsi sikhetsa kulalela kuphela loko lesikubona kukuhle kitsi. Kwenta kanjalo kungalimata buhlobo betfu naJehova. Esihlokweni lesilandzelako sitawucoca ngetimo letingasiniketa litfuba lekuveta kutsi siyalalela yini nobe cha. Tincumo lesitawutitsatsa kuletimo titawuveta kutsi singene mbamba yini ekuphumuleni kwaNkulunkulu.
Kufunisisa Umcebo EVini LaNkulunkulu
(Hebheru 4:12) Ngobe livi laNkulunkulu liyaphila, linemandla futsi likhalipha kwendlula inkemba lesika nhlangotsi totimbili, lihlaba kuze kwehlukane umphefumulo nemoya, emalunga nemnkantja, futsi liyakwati kucondza imicabango netinhloso tenhlitiyo.
Imibuto Levela Kubafundzi
Nguliphi ‘lelivi laNkulunkulu’ incwadzi yaHebheru 4:12 letsi ‘liyaphila futsi linemandla’?
▪ Lendzaba ikhombisa kutsi umphostoli Pawula abekhuluma ngemlayeto weliBhayibheli, nobe injongo yaNkulunkulu lekukhulunywa ngayo eBhayibhelini.
Sivame kusebentisa Hebheru 4:12 etincwadzini tetfu kute sichaze kutsi liBhayibheli linemandla ekugucula kuphila, futsi usebenta kahle kakhulu. Nobe kunjalo, kuyasita kuhlola Hebheru 4:12 ngendlela lebanti. Pawula abekhutsata emaKhristu langemaHebheru kutsi aphile ngekuvumelana netinjongo taNkulunkulu. Letinyenti tato tabhalwa emiBhalweni lengcwele. Pawula wenta sibonelo ngema-Israyeli labekakhululwe eGibhithe. Abenelitsemba lekungena ‘eveni lesetsembiso lelinelubisi neluju,’ lapho abetawuphumula khona.—Eks. 3:8; Dut. 12:9, 10.
Nguleyo-ke injongo yaNkulunkulu. Kodvwa ngekuhamba kwesikhatsi, ema-Israyeli aba nenkhani futsi ababete kukholwa, ngako lamanyenti awo akangenanga ekuphumuleni kwakhe. (Num. 14:30; Josh. 14:6-10) Nobe kunjalo, Pawula watsi besisekhona “setsembiso sekungena ekuphumuleni” kwaNkulunkulu. (Heb. 3:16-19; 4:1) Kuyacaca kutsi ‘lesetsembiso’ siyincenye yenjongo yaNkulunkulu. Njengobe kwenta emaKhristu langemaHebheru, natsi singafundza ngalesetsembiso futsi siphile ngekuvumelana naso. Kute agcizelele kutsi lesetsembiso sisekelwe emiBhalweni, Pawula wacaphuna tincenye letikuGenesisi 2:2 nakuTihlabelelo 95:11.
Ngako kufanele kusikhutsate kutsi lisekhona litsemba lekungena “ekuphumuleni” kwaNkulunkulu. Siyaciniseka kutsi litsemba lekungena ekuphumuleni kwaNkulunkulu lokukhulunywa ngalo eBhayibhelini litawufezeka futsi sesivele sititsetse tinyatselo tekungena kuko. Loko asikakwenti nje ngekugcina uMtsetfo waMosi nobe sasebentisa letinye tindlela kuze semukelwe nguJehova. Kunaloko, ngekukholwa sente ngekuvumelana nenjongo yaNkulunkulu leyembuliwe. Ngetulu kwaloko, tinkhulungwane tebantfu emhlabeni wonkhe setivele ticalile kufundza liBhayibheli futsi tifundza ngekuvetwa kwenjongo yaNkulunkulu. Labanyenti sebashintje kuphila kwabo, baba nekukholwa futsi babangemaKhristu labhajatisiwe. Indlela labashintje ngayo ibufakazi lobucacile bekutsi ‘livi laNkulunkulu liyaphila futsi linemandla.’ Kwembulwa kwenjongo yaNkulunkulu lokutfolakala eBhayibhelini, sekuvele kukushintjile kuphila kwetfu futsi kutawuchubeka kuba nemandla kitsi.
(Hebheru 6:17, 18) Ngendlela lefanako, ngesikhatsi Nkulunkulu akhetsa kukuveta ngalokucacile kungashintji kwenjongo yakhe kulabo labatindlalifa tesetsembiso, wafunga, 18 kuze kutsi ngetintfo letimbili letingeke tishintjwe, njengobe Nkulunkulu angeke acale emanga, tsine lesibalekele esiphephelweni sikhutsateke kakhulu kutsi sibambelele etsembeni lelibekwe embikwetfu.
it-1-E 1139 ¶2
Litsemba
Lelitsemba lekuphila phakadze ‘lebazalwane labangcwele labanelubito lwasezulwini’ (Heb. 3:1) linesisekelo lesicinile futsi linesicinisekiso lekungatsenjelwa kulo. Lisekelwa tintfo letimbili Nkulunkulu langeke acale emanga ngako, setsembiso sakhe kanye nesifungo lasenta, futsi lihambisana naKhristu, lose aphila ngemtimba longafi ezulwini. Ngako, lelitsemba lichazwa “njengelihhuka lemkhumbi emiphefumulweni yetfu, kantsi licinisekisiwe futsi licinile, liphindze lingene liphumele ngale kwendvwangu, lapho Jesu lovula indlela angene khona ngenca yetfu, waba ngumphristi lophakeme phakadze njengaMelkhisedeki.”—Heb 6:17-20.
Kufundvwa KweliBhayibheli
(Hebheru 5:1-14) Ngobe wonkhe umphristi lophakeme lokhetfwa kubantfu ubekelwa kubamela etintfweni taNkulunkulu, kuze anikele ngetipho nangemihlatjelo yetono. 2 Uyakhona kusebentelana ngemusa nalabo labete lwati nalabaphambukako ngobe naye unebakhe butsakatsaka, 3 ngenca yaloko kufanele ente imihlatjelo yetono takhe njengobe nje naye entela labanye. 4 Umuntfu akatitsatseli yena lomsebenti, kodvwa uwenta kuphela nangabe abitwe nguNkulunkulu, njengobe kwakunjalo nga-Aroni. 5 Ngako naKhristu akazange atiphakamise yena kutsi abe ngumphristi lophakeme, kodvwa waphakanyiswa nguloyo lowatsi kuye: “Wena uyindvodzana yami, lamuhla mine ngibe nguyihlo.” 6 Kulomunye umbhalo uphindze atsi: “Wena ungumphristi kuze kube phakadze njengaMelkhisedeki.” 7 Ngesikhatsi asemhlabeni, Khristu wancusa waphindze wacela kuLoyo labengamsindzisa ekufeni, loku wakwenta ngekukhala lokukhulu nangetinyembeti, futsi weviwa ngemusa ngenca yekwesaba kwakhe Nkulunkulu. 8 Ngisho nome abeyiNdvodzana, wafundza kulalela etintfweni lahlupheka ngato; 9 ngemuva kwekutsi entiwe waphelela, waba ngumtfombo wensindziso yaphakadze kubo bonkhe labamlalelako, 10 ngobe ubekwe nguNkulunkulu kutsi abe ngumphristi lophakeme njengaMelkhisedeki. 11 Kunyenti lesingakusho ngaye, kodvwa kulukhuni kukuchaza ngobe senibe butfuntfu ekuveni kwenu. 12 Nanome nyalo kufanele ngabe senibafundzisi, nisadzinga umuntfu lotanifundzisa tintfo letimelula temavi aNkulunkulu, acale ekucaleni; futsi seniphindze nidzinga lubisi, hhayi kudla lokucinile. 13 Wonkhe umuntfu losanatsa lubisi akaketayelani nemavi ekulunga, ngobe usuke angumntfwana lomncane. 14 Kodvwa kudla lokucinile kwebantfu labavutsiwe, labo labaceceshe imicondvo yabo ngekuyisebentisa kuze yehlukanise lokulungile nalokungakalungi.