SIFUNDVO 6

Chaza UmBhalo Lowufundzile

Johane 10:33-36

LOKUFANELE UKWENTE: Fundza umBhalo bese uyawuchaza. Ciniseka kutsi labakulalele bayabona kutsi umBhalo lowufundzile uhlangana njani neliphuzu lokhuluma ngalo.

INDLELA YEKUKWENTA:

Yenta emagama lamcoka kulomBhalo agcame. Ngemuva kwekufundza umBhalo lotsite, gcamisa emagama lahambisana ncamashi neliphuzu lokhuluma ngalo. Loko ungakwenta ngekuwaphindza lamagama nobe ngekubuta umbuto lotawenta labakulalele bawabone.

Nawuchaza umcondvo wemBhalo lotsite ngekusebentisa emagama lehlukile, ciniseka kutsi labakulalele bayabona kutsi emavi laseBhayibhelini ahambisana njani neliphuzu lakho lelimcoka.
Gcamisa liphuzu lelimcoka. Nangabe usivetile sizatfu sekufundza umBhalo lotsite, chaza kutsi emagama lamcoka kulomBhalo ahlangana njani naleso sizatfu.

Chubeka ulivulile futsi uliphatse liBhayibheli lakho nawusawuchaza lomBhalo. Loko kusita labakulalele babone kutsi lokushoko kusuka kulelivesi.
Chaza umBhalo ngendlela lemelula. Ungachazi tincenye talelivesi letingahambisani neliphuzu lelimcoka. Kuye ngekutsi yini labo labakulalele labayatiko ngalesihloko lokhuluma ngaso, khetsa kutsi kungakanani lokufanele ukusho kute labakulalele balicondze kahle liphuzu lelimcoka.