SIHLOKO LESIFUNDVWAKO 19
INGOMA 6 Emazulu Amemetela Inkhatimulo YaNkulunkulu
Lingisa Tingilosi Letetsembekile
“Dvumisani Jehova nonkhe nine tingilosi takhe.”—HLA. 103:20.
LOKUTAWUCOCWA NGAKO
Lesihloko sitasisita sitfole tifundvo esibonelweni setingilosi letetsembekile.
1-2. (a) Sehluke njani etingilosini? (b) Ngukuphi kufana lokukhona emkhatsini wetfu netingilosi?
NGESIKHATSI Jehova akudvonsela ecinisweni, waba yincenye yemndeni lowakhiwa bazalwane nabodzadze labasemhlabeni wonkhe futsi labakutsandzako, kanye netigidzigidzi tetingilosi letetsembekile. (Dan. 7:9, 10) Nasicabanga ngetingilosi, kungenteka sicabange ngekutsi tehluke njani kitsi. Sibonelo nje, tingilosi setiphile sikhatsi lesidze kunatsi. (Jobe 38:4, 7) Tinemandla kakhulu kunatsi. Ngenca yekutsi sinesono, tingcwele kakhulu kunatsi futsi tilunge kakhulu kunatsi.—Luk. 9:26.
2 Nanobe tingilosi tehlukile kunatsi, kodvwa tikhona tintfo lesifana ngato. Nasi sibonelo, natsi singakhona kulingisa buntfu lobuhle baJehova njengetingilosi. Siphindze sibe nenkhululeko yekutikhetsela njengato. Nguloyo naloyo uneligama njengato futsi sinebuntfu lobungafanani, siphindze sente imisebenti lengafanani. Ngetulu kwaloko, njengetingilosi, sinesidzingo sekukhonta uMdali wetfu.—1 Phet. 1:12.
3. Yini lesingayifundza etingilosini letetsembekile?
3 Njengobe titinyenti tintfo lesifana ngato netingilosi, sibonelo sato lesihle singasikhutsata. Ecinisweni, singatfola tifundvo letinyenti kuto. Kulesihloko, sitawucoca ngekutsi singakulingisa njani kutfobeka kwetingilosi letetsembekile, kanye nendlela letitsandza ngayo bantfu, kubeketela kwato kanye naloko letikwentako kuze tigcine libandla lihlobile.
TINGILOSI TITFOBEKILE
4. (a) Tingilosi tikhombisa njani kutsi titfobekile? (b) Yini leyenta tingilosi titfobeke? (Tihlabelelo 89:7)
4 Tingilosi letetsembekile titfobekile. Nanobe kukunyenti letikwatiko, tinemandla futsi tihlakaniphile, tilalela ticondziso taJehova. (Hla. 103:20) Njengobe tenta imisebenti yato, akwenteki nakanye titishaye sifuba ngaloko letikwentako nobe tigabatise ngemandla ato lamakhulu kakhulu. Tenta intsandvo yaNkulunkulu tijabulile ngisho nobe bantfu bangawati emagama ato.a (Gen. 32:24, 29; 2 Khos. 19:35) Ativumi kwemukela ludvumo lolufanele Jehova. Yini leyenta tingilosi titfobeke kangaka? Kungenca yekutsi titsandza Jehova futsi timhlonipha ngalokujulile.—Fundza Tihlabelelo 89:7.
5. Lenye ingilosi yakhombisa njani kutsi itfobekile ngesikhatsi yekhuta umphostoli Johane? (Buka nesitfombe.)
5 Cabanga nganaku lokwenteka lokukhombisa kutsi tingilosi titfobekile. Ngabo-96 C.E., lenye ingilosi lesingatjelwa ligama layo yamikisa umbono lomangalisako kumphostoli Johane. (Semb. 1:1) Wenta njani Johane nakabona lombono? Wetama kukhotsamela lengilosi. Kodvwa lesidalwa saNkulunkulu lesetsembekile samyekelisa ngekushesha, satsi: “Ungakwenti loku! Ngobe ngimane nje ngiyinceku njengawe nanjengebazalwane bakho . . . Ngako khonta Nkulunkulu!” (Semb. 19:10) Lengilosi beyitfobeke mbamba! Beyingafuni kunikwa ludvumo nobe kuhlonishwa. Ngekushesha yasita Johane kutsi anake Jehova Nkulunkulu. Ngesikhatsi lesifanako, beyingambukeli phasi Johane. Nanobe besekuphele iminyaka leminyenti ikhonta Jehova kwendlula Johane futsi inemandla lamakhulu kunaye, yatitfoba yatjela lomphostoli kutsi beyiyinceku njengaye. Nanobe lengilosi yekhuta Johane, ayizange imtsetsise nobe imphatse kabi lomphostoli losakhulile. Kunaloko, yakhuluma naye ngemusa. Kungenteka yabona kutsi Johane beketfuswe ngulombono lawubonile.
Lengilosi yakhombisa kutsi itfobekile ngesikhatsi ikhuluma naJohane (Buka sigaba 5)
6. Singakulingisa njani kutfobeka kwetingilosi?
6 Yini lesingayenta kuze sitfobeke njengetingilosi? Natsi sifuna kutsi nasiniketwa umsebenti enhlanganweni yaJehova singatigcabhi ngaloko lesikwentako nobe sente ngatsi sinemakhono lakhetsekile. (1 Khor. 4:7) Ngetulu kwaloko, akukafaneli sitibone sibalulekile kunalabanye ngenca nje yekutsi sesikhonte Jehova sikhatsi lesidze kunabo nobe ngenca yekutsi senta imisebenti letsite enhlanganweni. Ecinisweni, nasichubeka sitfola imisebenti leminyenti enhlanganweni, kulapho lakufanele sichubeke sibona labanye njengalababalulekile kunatsi. (Luk. 9:48) Njengetingilosi, sifuna kwenta imisebenti lesita labanye. Asifuni kwenta ngatsi sibalulekile kunalabanye.
7. Singakhombisa njani kutsi sitfobekile nasekhuta nobe naseluleka lotsite?
7 Singaphindze sikhombise kutsi sitfobekile nakufanele sekhute nobe seluleke lotsite, kungaba ngumzalwane nobe dzadze nobe umntfwana wetfu. Kungahle kudzingeke sinikete seluleko lesicinile. Kodvwa njengalengilosi leyamekhuta ngemusa Johane, singamniketa seluleko lesicinile kodvwa singamvisi buhlungu lona lowelulekwako. Nangabe singatikhandzi sibalulekile kunalabanye, sitawuniketa seluleko lesisekelwe eBhayibhelini ngendlela lenenhlonipho nalenemusa.—Khol. 4:6.
TINGILOSI TIYABATSANDZA BANTFU
8. (a) Ngekusho kwaLukha 15:10, tingilosi tikhombisa njani kutsi tiyabatsandza bantfu? (b) Tingilosi tisisita njani emsebentini wekushumayela? (Buka sitfombe lesisekhasini lekucala.)
8 Tingilosi tiyakunaka loko lokwenteka kubantfu futsi aticabangi kutsi abakabaluleki. Tiyabatsandza bantfu. Tiyajabula nangabe soni siphendvuka, lokusho kutsi nangabe imvu ibuyela kuJehova nobe nangabe umuntfu ashintja tindlela takhe futsi emukele liciniso. (Fundza Lukha 15:10.) Tiphindze tisite emsebentini wekushumayela. (Semb. 14:6) Nanobe tingabashumayeli bantfu ngalokucondzile, tingahle ticondzise ummemeteli kumuntfu lofuna kufundza ngaJehova. Kuliciniso kutsi angeke silisho ligcwale umlomo sitsi ingilosi isicondzise kumuntfu lotsite. Ngetulu kwako konkhe, Jehova angasebentisa naletinye tindlela, lokufaka ekhatsi umoya wakhe longcwele kuze asite bantfu nobe acondzise bantfu bakhe. (Imis. 16:6, 7) Nobe kunjalo, uyatisebentisa tingilosi takhe kuze tisisite nasenta umsebenti wekushumayela. Ngako nasishumayela tindzaba letimnandzi, singaciniseka kutsi tingilosi tisuke tikhona kuze tisisekele.—Buka libhokisi lelitsi “Imithantazo Yabo Yaphendvulwa.”b
Labashadene basandza kucedza kushumayela endzaweni yawonkhe wonkhe. Nasebaya ekhaya, lodzadze ubona lomunye sisi lobonakala acindzetelekile. Lodzadze uyabona kutsi tingilosi tingasicondzisa kulabo labadzinga kwati liciniso ngaNkulunkulu. Uyabona kutsi kufanele advudvute losisi (Buka sigaba 8)
9. Singakhombisa njani kutsi siyabatsandza bantfu njengetingilosi?
9 Yini lesingayenta kuze sitsandze bantfu njengetingilosi? Nasiva kutsi lotsite sewubuyiselwe kutsi abe nguFakazi, singajabula njengetingilosi. Singenta konkhe lokusemandleni etfu kuze sikhombise lomzalwane nobe lodzadze kutsi siyamemukela futsi simcinisekise ngekutsi siyamtsandza. (Luk. 15:4-7; 2 Khor. 2:6-8) Singaphindze silingise tingilosi ngekutsi sente konkhe lesingakwenta emsebentini wekushumayela. (Shu. 11:6) Ngetulu kwaloko, njengobe tingilosi tisisekela nasishumayela tindzaba letimnandzi, natsi singafuna tindlela tekusekela bazalwane betfu nabodzadze emsebentini wekushumayela. Sibonelo nje, singahlela yini kushumayela nemzalwane nobe dzadze lote sikhatsi lesinyenti enta lomsebenti? Singabasekela yini bazalwane nobe bodzadze lasebakhulile nobe labagulako kuze bakhone kwenta lomsebenti?
10. Yini lesingayifundza kulokwenteka kuSara?
10 Yini lesingayenta nangabe timo tetfu tisivimbela kutsi sente loko lesifuna kukwenta? Singafuna letinye tindlela tekusebenta netingilosi emsebentini wekushumayela. Cabanga ngalokwenteka kulomunye dzadze wase-India lokutsiwa nguSara.c Ngemuva kweminyaka lengaba ngu-20 alihlahlandlela, wagula futsi wangasakhoni kuphuma embhedzeni. Ngenca yaloko, wacindzeteleka kakhulu. Kodvwa ngenca yelusito lalutfola kubazalwane bakhe nabodzadze kanye nekutidadishela liBhayibheli, waphindze waba nembono lokahle. Kwadzingeka ashintje indlela lashumayela ngayo kuze ivumelane netimo takhe letinsha. Ngenca yekutsi bekangakhoni kuhlala kuze abhale tincwadzi, bekashumayela ngelucingo. Ngako washayela bonkhe lebekake wacoca nabo, futsi bamtjela ngalabanye lokungenteka bafune kufundza liBhayibheli. Waba yini umphumela? Kungakapheli tinyanga letinyenti, Sara besekanetifundvo teliBhayibheli letingu-70, futsi bekangasakhoni kufundza nabo bonkhe labantfu! Ngako wacela bazalwane nabodzadze ebandleni kutsi bafundze nalabanye babo. Linyenti lalabantfu liba khona emihlanganweni yelibandla. Siyaciniseka kutsi tingilosi tijabula kakhulu natisebenta nebazalwane nabodzadze labanjengaSara, labenta konkhe labangakwenta emsebentini wekushumayela!
TINGILOSI TIYABEKETELA
11. Tingilosi letetsembekile tikhombise njani kutsi tiyabeketela?
11 Tingilosi tisibonelo lesihle kakhulu sekubeketela. Sekuphele tinkhulungwane teminyaka tibeketelela kungalungi nebubi. Tambona Sathane naletinye tingilosi letinyenti lebetikhonta kanye nato Jehova timvukela. (Gen. 3:1; 6:1, 2; Juda 6) LiBhayibheli lisitjela ngalenye ingilosi lebeyetsembekile leyalwa nelidimoni lelinemandla. (Dan. 10:13) Ngetulu kwaloko, kusukela esikhatsini sa-Adamu na-Eva, tingilosi tibone bantfu labambalwa kakhulu bakhetsa kukhonta Jehova. Nanobe kunjalo, letingilosi letetsembekile tiyachubeka tikhonta Jehova tijabulile nangemdlandla. Tiyati kutsi ngesikhatsi lesifanele Nkulunkulu utakucedza kungalungi.
12. Yini lengasisita kuze sibeketele?
12 Singasilingisa njani sibonelo setingilosi sekubeketela? Njengaletingilosi, natsi kungenteka sibone kungalungi nobe siphikiswe. Kodvwa njengato, natsi siyaciniseka kutsi ngesikhatsi lesifanele, Nkulunkulu utabucedza bonkhe bubi. Ngako, njengaletingilosi letetsembekile, ‘asipheli emandla ekwenta lokuhle.’ (Gal. 6:9) Nkulunkulu wetsembisa kusisita kuze sibeketele. (1 Khor. 10:13) Singathantaza kuJehova sicele umoya wakhe, lotakwenta sibeketele futsi sijabule. (Gal. 5:22; Khol. 1:11) Yini longayenta nawuphikiswa? Yetsembela ngalokuphelele kuJehova futsi ungesabi. Jehova utawuhlale akusekela futsi akucinisa.—Heb. 13:6.
TINGILOSI TIGCINA LIBANDLA LIHLOBILE
13. Ngumuphi umsebenti lokhetsekile lowentiwa tingilosi kulamalanga ekugcina? (Matewu 13:47-49)
13 Kulamalanga ekugcina, Jehova unikete tingilosi umsebenti lokhetsekile. (Fundza Matewu 13:47-49.) Tigidzi tebantfu emhlabeni wonkhe tiyatitsandza tindzaba letimnandzi. Labanye balabantfu benta lokutsite kuze babe ngemaKhristu sibili, kani labanye kute labakwentako. Tingilosi tiniketwe umsebenti ‘wekwehlukanisa bantfu lababi kulabalungile.’ Loku kusho kutsi tiniketwe umsebenti wekugcina libandla lihlobile. Loku akusho kutsi bonkhe labayekela kutihlanganisa natsi ngenca yanobe ngusiphi sizatfu abayuze baphindze babuye. Akusho nekutsi angeke tibe khona tinkinga ebandleni. Nobe kunjalo, siyaciniseka kutsi tingilosi tisebenta kamatima kuze tigcine emabandla ahlobile.
14-15. Singatilingisa njani tingilosi futsi sikhombise kutsi sinesifiso sekugcina libandla lihlobile? (Buka netitfombe.)
14 Singatilingisa njani tingilosi mayelana nekugcina libandla lihlobile? Kufanele sente konkhe lesingakwenta kuze sivikele buhlobo betfu naJehova. Loku singakwenta ngekutsi sikhetse bangani labamtsandzako, futsi sikubalekele kwenta nobe ngabe yini lengalimata buhlobo betfu naye. Nasenta njalo, sitawube sigcina libandla lihlobile. (Hla. 101:3) Singaphindze sibasite bazalwane betfu nabodzadze kutsi bahlale betsembekile kuJehova. Sibonelo nje, yini lokufanele siyente nangabe sitfola kutsi umzalwane wetfu nobe dzadze wente sono lesikhulu? Ngenca yekutsi siyamtsandza, sitamkhutsata kutsi ayokhuluma nalabadzala belibandla. Nangabe ehluleka kwenta njalo, sitawutjela labadzala belibandla ngalendzaba. Sifuna umzalwane wetfu nobe dzadze lolinyalelwe buhlobo bakhe naJehova kutsi atfole lusito ngekushesha!—Jak. 5:14, 15.
15 Lokubuhlungu kutsi labanye labente tono letinkhulu kudzingeke kutsi basuswe ebandleni. Etimeni letinjalo, ‘siyayekela kutihlanganisa’ nabo.d (1 Khor. 5:9-13) Loku kugcina libandla lihlobile. Ngetulu kwaloko, nasikhetsa kungatihlanganisi nalabasusiwe ebandleni, sisuke sibakhombisa umusa. Nasilalela Jehova ngekutsi singatihlanganisi nabo, loko kungabasita babone kutsi kufanele babuyele kuJehova. Nababuyela kuJehova, sijabula naJehova kanye netingilosi takhe.—Luk. 15:7.
Yini lokufanele siyente nasitfola kutsi umzalwane nobe dzadze wente sono lesikhulu? (Buka sigaba 14)e
16. Yini lotimisele kuyenta kuze ulingise tingilosi?
16 Sijabula kakhulu ngekutsi Jehova usivumele kutsi sifundze ngetingilosi futsi sisebente kanye nato! Shengatsi singalingisa buntfu bato lobuhle, lobufaka ekhatsi kutfobeka kwato, kutsandza bantfu, kubeketela kanye nekuba nesifiso sekugcina libandla lihlobile. Nasilingisa letingilosi letetsembekile, natsi singaba yincenye yemndeni waJehova kuze kube phakadze.
INGOMA 123 Kutitfoba KuJehova
a Kunetigidzigidzi tetingilosi, kodvwa liBhayibheli lisho letimbili kuphela ngemagama, lokunguMikhayeli naGabhriyeli.—Dan. 12:1; Luk. 1:19.
b Ungatfola lokunye lokwentekile ku-Watch Tower Publications Index ngephasi kwesihloko lesitsi “Angels,” bese ubuka sihlokwana lesitsi “angelic direction (examples).”
c Ligama lishintjiwe.
d Njengobe kwachazwa eKwatisweni Kwakamuva Kwa-2024 Lokuvela ESigungwini Lesibusako #2, nangabe umuntfu losusiwe ebandleni aba khona emihlanganweni yelibandla, ummemeteli ngamunye angasebentisa nembeza wakhe loceceshwe ngeliBhayibheli kuze ancume kutsi utambingelela yini kafishane futsi amemukele.
e KUCHAZWA KWETITFOMBE: Dzadze ucela umngani wakhe kutsi ayokhuluma nalabadzala belibandla. Ngemuva kwesikhatsi, lodzadze utjela labadzala belibandla lendzaba njengobe umngani wakhe ehlulekile kuya kubo.