sinceLF/E+ via Getty Images
HLALANI NILINDZILE!
Ngubani Lotawusindzisa Bantfu Labangenacala?—Litsini LiBhayibheli?
Mhlabuhlangene ubika kutsi:
Kusukela nga-October 7 kuya ku-October 23, 2023, sekufe bantfu labangetulu kwa-6 400 futsi kwalimala labangu-15 200 emphini lesemkhatsini weGaza ne-Israyeli, futsi labanyenti babo bebangenacala. Ngetulu kwaloko, bantfu labangemakhulu etinkhulungwane bashiye emakhaya abo.
Kusukela kwacala imphi lesemkhatsini weRussia ne-Ukraine kuze kube nguSeptember 24, 2023, kufe bantfu labangenacala labangu-9 701, futsi kwalimala labangabangu-17 748 e-Ukraine.
Nguliphi litsemba liBhayibheli leliliniketa labo labahlupheka ngenca yetimphi?
Sizatfu Sekuba Nelitsemba
LiBhayibheli lisitjela kutsi Nkulunkulu utawucedza “timphi emhlabeni wonkhe.” (Tihlabelelo 46:9) Utawusebentisa hulumende wasezulwini, nobe umbuso, kuze utsatse sikhundla sabo bonkhe bohulumende bebantfu. (Danyela 2:44) UMbuso waNkulunkulu utawukhulula bonkhe bantfu.
Naka naku Jesu Khristu, loyiNkhosi yeMbuso waNkulunkulu latawukwenta:
“Itawukhulula lohluphekile lokhalela lusito, ikhulule lophansi kanye naloyo lote longamsita. Itamvela lophansi nalohluphekile, futsi itawusindzisa kuphila kwalabahluphekile. Itawubakhulula ekucindzetelweni nasebudloveni.”—Tihlabelelo 72:12-14.
Asebentisa uMbuso wakhe, Nkulunkulu utalucedza ngalokuphelele lonkhe lusizi kanye nekuhlupheka lokubangwe timphi kanye nebudlova.
“Uyakwesula tonkhe tinyembeti emehlweni abo, kufa ngeke kusaba khona, futsi kulila, nekukhala kanye nebuhlungu ngeke kusaba khona. Tintfo letindzala setendlulile.”—Sembulo 21:4.
Madvutane, uMbuso waNkulunkulu utawuletsa lushintjo lolukhulu emhlabeni. LiBhayibheli laphrofetha “ngetimphi [lesitibona] etindzaweni letehlukahlukene” lamuhla. (Matewu 24:6) Letentakalo kanye naletinye tikhombisa kutsi siphila “emalangeni ekugcina” ekubusa kwebantfu.—2 KuThimothi 3:1.