Siyini Silwane Sesiganga Lesinetinhloko Letingu-7 LesikuSembulo Sehluko 13?
Lokushiwo liBhayibheli
Silwane sesiganga lesinetinhloko letingu-7 lokukhulunywa ngaso kuSembulo 13:1 simelela bonkhe bohulumende emhlabeni wonkhe.
Sineligunya, emandla kanye nesihlalo sebukhosi, lokuveta kutsi siyinhlangano yetepolitiki.—Sembulo 13:2.
Sibusa “tonkhe tinhlanga, bantfu, tilwimi kanye netive,” lokusho kutsi asimeleli hulumende welive linye.—Sembulo 13:7.
Sakhiwa tincenye letikuletilwane tesiganga letine letinkhulu letichazwe kulesiphrofetho lesikuDanyela 7:2-8. Sifana nengwe, kepha tinyawo taso tifana netelibhele, umlomo waso unjengewelibhubesi, futsi sinetimphondvo letingu-10. Letilwane tesiganga lokukhulunywa ngato kulesiphrofetho saDanyela timelela emakhosi latsite nobe bohulumende lababusa ngekushiyelana. (Danyela 7:17, 23) Lokusho kutsi, lesilwane sesiganga lesikuSembulo sehluko 13 simelela inhlangano yetepolitiki.
Senyuka “siphuma elwandle,” lokusho kutsi bohulumende bebantfu bachamuka kubantfu labangafuni kubuswa nguNkulunkulu futsi labakwatile.—Sembulo 13:1; Isaya 17:12, 13.
LiBhayibheli litsi, 666 lokuyinombolo nobe ligama lalesilwane sesiganga, “yinombolo yemuntfu.” (Sembulo 13:17, 18) Loku kuveta kutsi lesilwane sesiganga lesikuSembulo sehluko 13 siyinhlangano yebantfu hhayi inhlangano yetidalwa temoya nobe inhlangano yemadimoni.
Nanobe tive tivumelana etintfweni letitsite, kodvwa tiyabambisana kuze tichubeke tineligunya lekubusa kunekutsi tivume kubuswa nguMbuso waNkulunkulu. (Tihlabelelo 2:2) Letive titawusebenta ndzawonye kuze tilwe nelibutfo laNkulunkulu leliholwa nguJesu Khristu e-Amagedoni, kodvwa titawuncotjwa kulemphi.—Sembulo 16:14, 16; 19:19, 20.
‘Timphondvo letingu-10 netinhloko letingu-7’
Letinye tinombolo timelela lokutsite eBhayibhelini. Sibonelo nje, 10 kanye na-7 umelela kuphelela. Lokungasisita kutsi sicondze inchazelo ‘yetimphondvo letingu-10 netinhloko letingu-7’ talesilwane sesiganga lesikuSembulo sehluko 13 ‘ngumfanekiso walesilwane sesiganga’ lovela kulesinye sehluko sencwadzi yeSembulo—lokusilwane sesiganga lesibovu, lesinetinhloko letingu-7 netimphondvo letingu-10. (Sembulo 13:1, 14, 15; 17:3) LiBhayibheli litsi letinhloko letingu-7 talesilwane sesiganga lesibovu timelela ‘emakhosi langu-7’ nobe bohulumende.—Sembulo 17:9, 10.
Ngendlela lefanako, letinhloko letingu-7 talesilwane sesiganga lesikuSembulo 13:1 timelela bohulumende labangu-7, imibuso lemikhulu leke yabusa emlandvweni futsi lehambe embili ekuhlupheni bantfu baNkulunkulu. Lemibuso yiGibhithe, i-Asiriya, iBhabhulona, emaMediya nemaPheresiya, iGrisi, iRoma, kanye nemaNgisi NemaMelika. Nasephetsa ngekutsi letimphondvo letingu-10 timelela yonkhe imibuso letimele, lemincane nalemikhulu, loko kusho kutsi umchele loseluphondvweni ngalunye ukhombisa kutsi umbuso ngamunye ubusa ngesikhatsi lesifanako nembuso wemhlaba wangaleso sikhatsi.