Buka ea Pele ea Likronike
27 Ena ke palo ea Baiseraele, lihlooho tsa malapa a habo ntate, balaoli ba ba likete le ba ba makholo+ le balaoli ba bona ba neng ba sebeletsa morena+ tabeng e ’ngoe le e ’ngoe e amanang le lihlopha tse neng li chenchana* ka likhoeli selemo kaofela. Sehlopheng ka seng e ne e le ba 24 000.
2 Ea okametseng sehlopha sa pele sa khoeli ea pele e ne e le Jashobeame+ mora oa Zabdiele ’me sehlopheng sa hae ho e-na le ba 24 000. 3 Ho bara ba Pereze,+ ke eena eo e neng e le hlooho ea balaoli bohle ba lihlopha tse neng li abetsoe ho sebeletsa ka khoeli ea pele. 4 Ea okametseng sehlopha sa khoeli ea bobeli e ne e le Dodai+ oa Moakoki+ le sehlopha sa hae ’me Miklothe e le moeta-pele. Sehlopheng sa hae ho e-na le ba 24 000. 5 Mookameli oa sehlopha sa boraro se abetsoeng ho sebeletsa ka khoeli ea boraro e ne e le Benaia+ mora oa moprista e moholo Jehojada+ ’me sehlopheng sa hae ho e-na le ba 24 000. 6 Benaia enoa e ne e le monna ea matla ho ba 30 ’me a ba okametse. Mookameli oa sehlopha sa hae e ne e le mora oa hae Amizadabe. 7 Mookameli oa bone bakeng sa khoeli ea bone e ne e le Asahele+ ngoan’abo Joabe+ le mora oa hae Zebadia ka mor’a hae ’me sehlopheng sa hae ho e-na le ba 24 000. 8 Mookameli oa bohlano bakeng sa khoeli ea bohlano e ne e le Shamehuthe oa Moizrahia ’me sehlopheng sa hae ho e-na le ba 24 000. 9 Mookameli oa botšelela bakeng sa khoeli ea botšelela e ne e le Ira+ mora oa Ikeshe oa Motekooa+ ’me sehlopheng sa hae ho e-na le ba 24 000. 10 Mookameli oa bosupa bakeng sa khoeli ea bosupa e ne e le Heleze+ oa Mopelone oa Baefraime ’me sehlopheng sa hae ho e-na le ba 24 000. 11 Mookameli oa borobeli bakeng sa khoeli ea borobeli e ne e le Sibekai+ oa Mohushathe oa Bazera+ ’me sehlopheng sa hae ho e-na le ba 24 000. 12 Mookameli oa borobong bakeng sa khoeli ea borobong e ne e le Abi-ezere+ oa Moanathothe+ oa Babenjamine ’me sehlopheng sa hae ho e-na le ba 24 000. 13 Mookameli oa leshome bakeng sa khoeli ea leshome e ne e le Maharai+ oa Monetofa oa Bazera+ ’me sehlopheng sa hae ho e-na le ba 24 000. 14 Mookameli oa bo11 bakeng sa khoeli ea bo11 e ne e le Benaia+ oa Mopirathone oa bara ba Efraime ’me sehlopheng sa hae ho e-na le ba 24 000. 15 Mookameli oa bo12 bakeng sa khoeli ea bo12 e ne e le Heldai oa Monetofa oa Othniele ’me sehlopheng sa hae ho e-na le ba 24 000.
16 Bana e ne e le baeta-pele ba maloko a Iseraele: Ho Barubene moeta-pele e ne e le Eliezere mora oa Zikri, ho Basimeone e le Shefatia mora oa Maaka. 17 Ho Levi e le Hashabia mora oa Kemuele, ho Arone e le Tsadoke. 18 Ho Juda e le Elihu,+ e mong oa bana ba bo Davida, ho Isakare e le Omri mora oa Mikaele. 19 Ho Zabulone e le Ishmaia mora oa Obadia, ho Nefthali e le Jerimothe mora oa Azriele. 20 Ho Baefraime e le Hoshea mora oa Azazia, halofong ea leloko la Manase e le Joele mora oa Pedaia. 21 Halofong ea leloko la Manase e Gileade e le Ido mora oa Zakaria, ho Benjamine e le Jasiele mora oa Abnere.+ 22 Ho Dane e le Azarele mora oa Jerohame. Bana e ne e le likhosana tsa maloko a Iseraele.
23 Davida ha aa ka a bala ba lilemo li 20 ho ea tlase hobane Jehova o ne a tšepisitse ho etsa hore Baiseraele ba be bangata joaloka linaleli tsa maholimo.+ 24 Joabe mora oa Tseruja o ne a qalile ho bala batho empa ha aa ka a qeta. Molimo o ile a halefela Baiseraele* ka lebaka la sena+ ’me palo eo ha ea ka ea kenngoa tlalehong ea histori ea mehleng ea Morena Davida.
25 Ea hlokomelang matlotlo a morena+ e ne e le Azmavethe mora oa Adiele. Ea hlokomelang litoro* tse masimong, tse metseng, tse metsaneng le tse litoreng e le Jonathane mora oa Uzia. 26 Ea okametseng batho ba neng ba lema masimong e le Ezri mora oa Kelube. 27 Ea hlokomelang lirapa tsa morara e le Shimei oa Morama. Zabdi oa Moshefame o ne a hlokomela litoro tsa veine. 28 Ea hlokomelang meru ea mohloaare le lifate tsa sikamora+ tse Shefela+ e le Baale-hanane oa Mogedere. Joashe o ne a hlokomela litoro tsa oli. 29 Ea hlokomelang mehlape ea liphoofolo e neng e fula Sharone+ e le Shiterai oa Mosharone ’me ea hlokomelang mehlape e lithoteng e le Shafate mora oa Adlai. 30 Ea hlokomelang likamele e le Obile oa Moishmaele. Ea hlokomelang litonki* e le Jehdeia oa Momeronothe. 31 Ea hlokomelang mehlape ea linku le lipoli e le Jazize oa Mohagare. Bana bohle e ne e le bahlokomeli ba thepa ea Morena Davida.
32 Jonathane+ mochana oa Davida e ne e le moeletsi e le monna ea nang le kutloisiso ebile e le mongoli. Jehiele mora oa Hakmoni o ne a hlokomela bara ba morena.+ 33 Akitofele+ e ne e le moeletsi oa morena ’me Hushai+ oa Moareke e le motsoalle oa morena. 34 Ka mor’a Akitofele e ne e le Jehojada mora oa Benaia+ le Abiathare.+ Joabe+ e ne e le molaoli oa lebotho la sesole la morena.