La 11 April, 1998—Letsatsi le Lokelang ho Hopoloa

Mantsiboeeng a pele a e-shoa, Jesu o ile a fetisetsa bohobe bo sa lomosoang le senoelo sa veine ho baapostola ba hae ’me a ba laela ho ja le ho noa. O ile a boela a re ho bona: “Le ’ne le etse sena ho nkhopola.”—Luka 22:19.

Selemong sena mokete ona oa ho hopola ketsahalo eo o tla ba ka Moqebelo, la 11 April, 1998, ka mor’a hore letsatsi le likele. Lipaki tsa Jehova lefatšeng ho pota li tla bokana hammoho bosiung bona bo khethehileng ho keteka Sehopotso sena ka tsela eo Jesu a e laetseng. U memeloa ka mofuthu ho kopanela le rōna u le moshebelli. Ka kōpo botsa Lipaki tsa Jehova tse sebakeng sa heno mabapi le sebaka le nako tse nepahetseng tsa seboka.