Lebitso la Molimo

“Ekare ha e se Jehova ea hahang ntlo, ba e hahang ba sebeletsa lefeela.” Ke kamoo mongolo ona oa Selatine o balehang ka teng. Mantsoe ana a thehiloe ho Pesaleme ea 127:1 ka Bibeleng, ’me a fupere ’nete e phethahetseng: Boiteko leha e le bofe bo sa hlohonolofatsoang ke Jehova qetellong e tla ba ba lefeela.

Mongolo ona, oa 1780, o fumaneha mohahong o mong Colombo, Sri Lanka, ’me oa hlokomeleha kaha o na le lebitso la Molimo, Jehova. (Bona setšoantšo.) Makholong a lilemo a pejana lebitso leo le ne le sebelisoa ka ho pharaletseng. Hangata le ne le ngoloa mehahong, likerekeng, esita le licheleteng tsa tšepe. Baromuoa ba ile ba sebelisa lebitso la Molimo ha ba ne ba isa Bibele mafatšeng a hōle, e leng lebaka leo ka lona ntle ho pelaelo mongolo ona o leng teng Sri Lanka.

Kajeno lintho li fapane hakaakang! Ke ba seng bakae ba ipolelang hore ke Bakreste ba tsotellang lebitso la Molimo. Litsebi tse ling li bile li nyatsa Lipaki tsa Jehova bakeng sa ho beha khatiso lebitsong leo. Hobane’ng? Ho ea ka ba bang, ke hobane mokhoa oa Seheberu oa ho le bitsa ha o tsejoe hantle. Empa ke ba bakae ba tsebang mokhoa oa pele oa Seheberu oa ho bitsoa ha lebitso la Jesu? Empa, lebitso la hae le sebelisoa hohle ’me lea hlomphuoa.

Lebitso la Molimo le ne le le bohlokoa haholo ho Jesu. O re rutile ho rapela: “Lebitso la hao a le ke le khethehe.” (Mattheu 6:9) ’Me pejana feela ho lefu la hae, o itse ho Molimo: “Lebitso la hao ke le senoletse batho bao u ’neileng bona lefatšeng.” (Johanne 17:6) Bakreste ba ’nete ke balateli ba Jesu ba hatang moo a hatileng teng. Na le bona ha baa lokela ho ‘senola lebitso la Molimo’? Lipaki tsa Jehova li etsa joalo, ’me Jehova o hlohonolofatsa “ntlo” ea tsona haholo. Pesaleme ena ke ’nete ho tsona: “Ho lehlohonolo sechaba seo Jehova e leng Molimo oa sona!”—Pesaleme ea 144:15.