Ketsahalo eo U sa Lokelang ho e Fosa

“Mpho e ’ngoe le e ’ngoe e molemo le neo e ’ngoe le e ’ngoe e phethahetseng” e theoha ho Molimo, Ntate oa rōna oa leholimo. (Jakobo 1:17) Mpho e khōlōhali eo Molimo a faneng ka eona ho moloko oa motho oa boetsalibe ke tokisetso ea ho o busetsa phethehong ka Mora oa hae ea tsoetsoeng a ’notši, Jesu Kreste. Lefu la Jesu e le Morekolli oa rōna le bula monyetla oa bophelo bo sa feleng lefatšeng la paradeise. Ho Luka 22:19, re laeloa ho ikhopotsa lefu la hae.

Lipaki tsa Jehova li u mema ka mofuthu ho kopanela le tsona ho mameleng taelo ea Jesu. Mokete ona oa selemo le selemo o tla ketekoa ka mor’a ho likela ha letsatsi, letsatsing le bapang le la la 14 Nisane almanakeng ea likhoeli tsa Bibele, e leng Labobeli la la 2 April, 1996. Tšoaea letsatsi lena e le hore u se ke ua le lebala. Lipaki tsa Jehova tse sebakeng sa heno li ka u bolella sebaka seo ho tla kopaneloa ho sona le nako e nepahetseng.