Baboleli ba ’muso Baa Tlaleha

Bacha ba Rorisa Molimo Democratic Republic of Congo

MAKHOLONG a lilemo a fetileng, ka mofuthu mopesaleme o ile a mema ba bacha hore ba kopanele ho roriseng Morena oa bosafeleng: ‘Bahlankana le baroetsana, maqheku hammoho le bana, rorisang lebitso la Jehova, hobane lebitso la hae ke lona le inotši le phahamileng.’ (Pesaleme ea 148:12, 13) Liphihlelo tse latelang tse hlahang Democratic Republic of Congo li totobatsa tokelo ena e ke keng ea lekanngoa.

• Mong’a ntlo eo ho eona ho lulang pula-maliboho e mong ea khethehileng o ile a khahloa ke boitšoaro ba Lipaki tsa Jehova. Kahoo, o ile a lumella Lipaki hore li ithute Bibele le morali oa hae ea lilemo li hlano, Fifi. Ka mor’a hore a hlokomele tsoelo-pele ea Fifi ho ithuteng Buka ea ka ea Lipale tsa Bibele,a ntate oa hae o ile a mo lumella hore a kopanele libokeng, Holong ea ’Muso. Moo, Fifi e monyenyane o ile a ithuta lipina tsa ’Muso tse bukeng ea lipina ea Lipaki. Ka ho khetheha, o ile a rata pina ea 4, e nang le sehlooho se reng: “Tšepiso ea Molimo ea Paradeise.”

Ka letsatsi le leng, ntate oa Fifi o ile a etsa qeto ea ho ea le eena kerekeng ea hae. E mong le e mong o ile a makatsoa ke hore Fifi o ne a hana ho bina lifela tsa kereke. Hobane’ng? Hobane o ne a utloa hore lifela tse binoang kerekeng ea ntate oa hae li ne li sa lumellane le seo a ithutileng sona thutong ea hae ea Bibele. Ho e-na le hoo, ka sebete o ile a bina pina ea ’Muso eo a e ratang.

Ka mor’a ho hlōleha ka makhetlo ho fetola mohopolo oa hae, baeta-pele ba kereke ba ile ba etsa qeto ea ho khaola Fifi ea lilemo li hlano! Ho sa tsotellehe tšoaro ena e mpe, ntate oa hae o ile a lula a khutsitse. O ne a le motlotlo ka hore ebe Fifi o ile a ema a tiile ho seo a se lumelang. Ntate oa Fifi le ’mè oa hae ka bobeli ba batla hore a tsoele pele ho kopanela le Lipaki tsa Jehova.

• Ha moshemane ea ka tlaase ho lilemo tse 20 ea bitsoang Lukodi a ne a etsa qeto ea ho ithuta Bibele le Lipaki tsa Jehova, ntate oa hae o ile a mo hanyetsa haholo. Ka nako e ’ngoe ha Lukodi a ne a itokisetsa ho ea libokeng Holong ea ’Muso, ntate oa hae o ile a mo sokela ka thipa e khōlōhali. Ka lekhetlo le leng hape, ntate oa Lukodi o ile a mo tlera ka thupa, a mo ntša leqeba le tšabehang ka mokokotlong. Ho sa tsotellehe khanyetso eo e matla, Lukodi o ile a ema a tiile qetong ea hae ea ho batla ho ba e mong oa Lipaki tsa Jehova. O ile a ’na a hatela pele ’me a kolobetsoa. Hona joale o sebeletsa e le pula-maliboho oa kamehla.

Sona, khaitseli ea Lukodi, o ile a khahloa ke boemo ba abuti oa hae hoo le eena a ileng a qala ho ithuta Bibele le Lipaki tsa Jehova. Leha ho le joalo, e le ho mo thibela ho ithuta, ntate oa bona o ile a romela Sona sekolong se motseng o mong moo ho neng ho se na Lipaki. Ho ntse ho le joalo, Sona o ile a itloaetsa ho bolella ba bang lintho tseo a ithutileng tsona. Ka lebaka la seo, motsoal’ae le eena o ile a thahasella.

Ha Lipaki tse motseng o haufinyane li utloa ka mosebetsi oa ho bolela oa Sona, li ile tsa mo etela ’me tsa lokisetsa hore a be le thuto ea lehae ea Bibele ea kamehla. O ile a ’na a hatela pele ’me ka potlako a tlatsa abuti oa hae ka ho ba Paki ea Jehova e inehetseng le e kolobelitsoeng. Ho feta moo, hona joale motsoal’ae ke mohoeletsi ea sa kolobetsoang ’me ho tšoareloa thuto ea buka motseng ona.

Ke ho tsotehang le ho khathollang hakaakang ha ba bacha ba kopanela ho roriseng lebitso la Jehova!

[Mongolo o botlaaseng ba leqephe]