Boitšoaro bo Botle bo Tlisa Thoriso

KORANTA ea Italy ea La Gazzetta del Mezzogiorno e ile ea babatsa Lipaki tsa Jehova ka ho hatisa sehlooho se reng “Matera—Motse oa Mahaha a Khethehileng ao e Leng Bolulo.” Sehlooho sena se ile sa hlaha makasineng ea Tsoha! (ea Senyesemane) ea July 8, 1997, e ileng ea ajoa ka ho pharaletseng ka lipuo tse ngata. Hona joale Tsoha! e fetoleloa ka lipuo tse 81 ’me e ajoa ka likopi tse fetang limilione tse 19 lefatšeng ka bophara. Koranta eo e ile ea bolela hore Tsoha! eo e ne e itlhomme pele lehlabuleng leo “tabeng ea liphutuho tsa ho phatlalatsa tse neng li buella lefa la histori le la bonono la motse oo [oa Matera].”

Koranta eo e ile ea rorisa Lipaki ka Kopano ea Setereke ea “Tumelo Lentsoeng la Molimo,” e neng e tšoaretsoe Matera ka 1997. Sehlooho seo se ile sa bolela hore Lipaki li ile tsa khona ho “etsa hore batho ba 4000 ba be teng Lebaleng la Lipapali la XXI Settembre [motseng oo] bohareng ba lehlabula ’me e le tlas’a letsatsi le chesang; li ne li ile tsa nka boikarabelo ba ho hloekisa, ho penta bocha le ho lokisa lintho tsa bohlokoa tsa lebala lena la lipapali (haholo-holo matloana) ntle le tefo, li lefella ka botsona thepa eo ho hlokahalang hore li e reke.”

Lipaki tsa Jehova li leka ka matla ho ba baahisani ba molemo. (Matheu 22:37-39) Li boetse li latela keletso ena ea Mangolo: “Bolokang boitšoaro ba lōna bo le botle har’a lichaba, e le hore . . . ka lebaka la mesebetsi ea lōna e metle eo tsona e leng lipaki tsa eona tse boneng ka mahlo li ka tlotlisa Molimo letsatsing la ho hlahloba ha hae.”—1 Petrose 2:12.