Ba Boholong ba Rorisa Lipaki

RAMOTSE Doña Teófila Martínez o ile a fa Lipaki tsa Jehova khau (e bontšitsoeng ka holimo) motseng oo likepe li fihlelang ho oona oa Cádiz, Spain, o ka bang lik’hilomithara tse 500 ka boroa-bophirimela ho Madrid. E na le mantsoe ana: “Kananelo ea ’masepala oa Cádiz ho Lipaki tsa Jehova ka tšebelisano-’moho ea tsona le boiteko boo li bo etsang bakeng sa motse ona.” Lipaki li ne li entse eng ha li tla fuoa tlotla ee?

E fanoe e le ho babatsa mosebetsi oo Lipaki li neng li o entse oa ho nchafatsa karolo ea lebala la lipapali la ’masepala oa motse oo. Ka mafelo-beke a ’maloa, Lipaki tse makholo li ile tsa ithaopela ho thusa ho lokisa matloana a mokatong o ka tlaase-tlase oa lebala la papali ea bolo ea maoto la Carranza. Hona joale, bohle ba sebelisang lebala lena ba rua molemo ka lipeipi tsa metsi le tsa tsamaiso ea likhoerekhoere le fuluru tse ileng tsa kenngoa.

Lipaki tsa Jehova li ’nile tsa e-ba le likamano tse ntle le ’masepala oa Cádiz ka nako e telele. Selemo se seng le se seng, ’masepala o fana ka Lebala la Lipapali la Carranza hore Lipaki li le sebelise bakeng sa kopano ea tsona ea setereke ea selemo le selemo. Ka lebaka leo, Lipaki li thabela ho etsa seo li ka se khonang ho boloka lebala leo la lipapali le le maemong a matle.

Leha ho le joalo, ho phaella mosebetsing oo oa matsoho oo li o etsang ka linako tse itseng, kamehla Lipaki tsa Jehova li etela metse e haufi le oo ho thusa sechaba ka tsela e ’ngoe hape. Li bolela ‘litaba tse molemo’ tsa ’Muso oa Molimo. Ho hlakile hore ha li etse mosebetsi oo oa phatlalatsa e le hore li fumane thoriso e tsoang ho batho. Li o etsa e le ho mamela taelo ea Jesu ea hore ho boleloe ‘litaba tse molemo tsa ’muso’ le ho etsa “batho ba lichaba tsohle barutuoa.” (Matheu 24:14; 28:19) Ka tsela ena, Lipaki tsa Jehova li thusa sechaba ka ho ruta batho ho ea “tseleng ea ho loka.”—Liproverbia 12:28.