“Ka Leseli le Tsoang ho Uena re ka Bona Leseli”
HANGATA re nka khanya habobebe ho fihlela ha motlakase o khaoha ’me motse oa habo rōna o apareloa ke lefifi. Ka lehlohonolo, ‘setsi sa rōna sa leholimo se fehlang matla a kang a motlakase’—e leng letsatsi—se tšepahala ka ho feletseng. ’Me ka lebaka la khanya e tsoang letsatsing, re khona ho bona, ho ja, ho hema le ho phela.
Kaha khanya ke ea bohlokoa haholo bakeng sa bophelo, ha rea lokela ho makala hore e be ho Genese re bala hore khanya e ile ea hlaha ka letsatsi la pele la pōpo. “Molimo a re: ‘Leseli le ke le be teng.’ Joale leseli la e-ba teng.” (Genese 1:3) Banna ba hlomphang ba kang Morena Davida kamehla ba ’nile ba hlokomela hore Jehova ke mohloli oa bophelo le khanya. Davida o ile a ngola: “Mohloli oa bophelo o ho uena. Ka leseli le tsoang ho uena re ka bona leseli.”—Pesaleme ea 36:9.
Mantsoe ana a Davida a sebetsa ka litsela tse peli, ka tsela ea sebele le ea tšoantšetso. Encyclopædia Britannica e re: “Ka sebele, khanya ke eona e etsang hore re khone ho bona.” Ea phaella: “Boitsebiso bo bongata bo fihla bokong ba motho ka mahlo ho feta ka setho leha e le sefe se seng sa kutlo.” Kaha boholo ba seo re ithutang sona bo itšetlehile ka mpho ea ho bona—e hlokang leseli hore e sebetse hantle—leseli le boetse le sebelisoa ka tsela ea tšoantšetso ka Mangolong.
Ke ka lebaka leo Jesu a ileng a bolella barutuoa ba hae a re: “Ke ’na leseli la lefatše. Ea ntatelang ho hang a ke ke a tsamaea lefifing, empa o tla ba le leseli la bophelo.” (Johanne 8:12) Leseli la tšoantšetso leo Jesu a neng a bua ka lona mona ke molaetsa oa ’nete oo a neng a o phatlalatsa, o neng o khona ho khantša likelello le lipelo tsa bamameli ba hae. Ka mor’a hore ba qete lilemo ba le lefifing la moea, qetellong barutuoa ba Jesu ba ne ba ka utloisisa morero oa Molimo bakeng sa moloko oa batho le tšepo ea ’Muso. Kannete sena e ne e le “leseli la bophelo,” kaha tsebo eo e ne e ka lebisa bophelong bo sa feleng. Ha a rapela Ntate oa hae oa leholimo, Jesu o ile a re: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.” (Johanne 17:3) E se eka le ka mohla re ke ke ra nka leseli lena la moea habobebe!