“Batho ba Babeli ba Ile ba Kokota Monyakong oa Rōna”
“HO SE ho fetile lilemo tse peli re ntse re saretsoe habohloko ka lebaka la ho hlokahalloa ke moralinyana oa rōna.” Ana ke mantsoe a qalang lengolo le phatlalalitsoeng koranteng ea Le Progrès, e hatisoang Saint-Étienne, Fora.
“Mélissa o ne a le likhoeli li tharo ’me a tšoeroe ke lefu le bohloko la trisomy 18. Ha ho bonolo hore motho a hlaphoheloe ka ho feletseng tlokotsing e bonahalang e se na toka tjena. Le hoja re hōlisitsoe re le Mak’hatholike, re ne re lula re tšoenngoa ke potso ena, ‘Molimo, haeba u teng, ke hobane’ng ha u lumella hore lintho tse tjee li etsahale?’” Ho hlakile hore ’mè ea ngotseng lengolo lena o ne a ikutloa a sithabetse a bile a tsielehile. Lengolo la hae le tsoela pele le re:
“Nakoana ka mor’a hore sena se etsahale, batho ba babeli ba ile ba kokota monyakong oa rōna. Ke ile ka lemoha kapele hore ke Lipaki Tsa Jehova. Ke ne ke ikemiselitse ho ba kōpa hore ba tsamaee, empa ke ile ka bona bukana eo ba neng ba fana ka eona. E ne e bua ka lebaka leo ka lona Molimo a lumeletseng ho utloa bohloko. Kahoo, ke ile ka etsa qeto ea hore ba kene ka tlung ke ikemiselitse ho ba pakela hore ba fositse. Ke ne ke nahana hore lelapa la ka le hlahetsoe ke likoluoa tse ngata ka ho fetisisa ’me re ne re se re khathetse ke ho fuoa matšeliso a se nang phofo a kang a reng, ‘Molimo o ne a re file eena, joale Molimo o mo nkile.’ Lipaki li ile tsa lula nako e ka holimonyana ho hora. Li ile tsa ’mamela ka qenehelo e khōlō, ’me ha li se li tsamaea, ke ile ka ikutloa ke imolohile hoo ke ileng ka lumela hore li nketele hape. Sena se etsahetse lilemong tse peli tse fetileng. Ha ke e-s’o be e mong oa Lipaki Tsa Jehova, empa ke qalile ho ithuta Bibele le tsona, ’me ke ba teng libokeng tsa tsona hangata kamoo nka khonang.”