O ne a Rata Mosa

MILTON G. HENSCHEL, eo e bileng setho sa Sehlopha se Busang sa Lipaki Tsa Jehova ka nako e telele, o qetile bophelo ba hae ba lefatšeng ka Moqebelo oa la 22 March, 2003. O ne a le lilemo li 82.

Ha e sa le mohlankana, Milton Henschel e ile ea e-ba e mong oa ba sebetsang ntlo-khōlō ea Lipaki Tsa Jehova ’me o sebelelitse moo ka botšepehi ka lilemo tse fetang 60. Ka potlako o ile a tsebahala ka ho ba le kahlolo e molemo le ka ho thahasella ka tieo mosebetsi oa ho bolela ka ’Muso. Ka 1939, e ile ea e-ba mongoli oa N. H. Knorr, eo ka nako eo e neng e le molebeli oa lefapha la khatiso la Lipaki Tsa Jehova Brooklyn. Ha Mor’abo rōna Knorr a ne a qala ho etella pele har’a Lipaki lefatšeng ka bophara ka 1942, o ile a sebelisa Mor’abo rōna Henschel e le mothusi oa hae. Mor’abo rōna Henschel o ile a nyala Lucille Bennett ka 1956, ’me ba ile ba e-ba ’moho mathateng le manolong a bophelo.

Mor’abo rōna Henschel o ile a sebetsa haufi le Mor’abo rōna Knorr ho fihlela ha Knorr a hlokahala ka 1977. Mor’abo rōna Henschel ea neng a atisa ho tsamaea le Mor’abo rōna Knorr, o ile a ea linaheng tse fetang 150, a etela Lipaki Tsa Jehova lefatšeng ka bophara le ho li khothatsa, haholo-holo baromuoa le ba sebeletsang liofising tsa makala. Ka linako tse ling maeto ao a ne a le boima a bile a le kotsi. Ka 1963 ha a ne a etetse kopanong ea Liberia, Mor’abo rōna Henschel o ile a hlorisoa ka sehlōhō ka lebaka la ho hana ho kopanela tšebeletsong ea bochaba.a A sa tšabe letho, Mor’abo rōna Henschel o ile a khutlela Liberia likhoeli tse ’maloa feela hamorao ho ea kopana le mopresidente oa naha eo le ho ea batlela Lipaki Tsa Jehova tokoloho e khōloanyane ea borapeli moo.

Ha a ne a sebetsana le maemo a thata le a phephetsang, Mor’abo rōna Henschel o ne a tsebahala ka ho sebetsana le ’ona ka tsela e chatsi, ka ho ba ea tenyetsehang le ea nahanelang maemo. Ka ho khetheha, basebetsi-’moho le eena ba ne ba mo ratela ho hlophiseha, boinyenyefatso le ho soasoa. Kaha o ne a hlohonolofalitsoe ka ho ba le bokhoni ba ho hopola lintho hantle, baromuoa ba bangata lefatšeng ho pota ba ne ba thabisoa ke kamoo a neng a hopola mabitso a bona kateng, ebe o bua poleloana e le ’ngoe kapa tse peli ka puo ea moo a be a bue le ntho e ’ngoe e qabolang—eo a neng a roba leihlo ha a e bua.

Mikea 6:8 e re hopotsa hore Jehova Molimo o batla hore re “rate mosa.” Milton Henschel o tla hopoloa ka ho beha mohlala tabeng ena. Ho sa tsotellehe boikarabelo bo boima boo a neng a bo jere, o ne a lula a atameleha, a le bonolo a bile a le mosa. O ne a rata ho re, “Ha u qeaqea hore na u etse’ng, hopola hore ho etsa ntho e mosa ke hona ho nepahetseng.” Le hoja re utloisitsoe bohloko ke ho lahleheloa ke mora enoa oabo rōna ea ratehang, re thabela hore ebe o mameletse ka botšepehi ho fihlela bofelong, a kholisehile hore o tla fumana moputso oa hae, “moqhaka oa bophelo.”—Tšenolo 2:10.

[Mongolo o botlaaseng ba leqephe]

[Setšoantšo se leqepheng la 31]

M. G. Henschel le N. H. Knorr

[Setšoantšo se leqepheng la 31]

O na le mofumahali oa hae, Lucille