Bibele ea Pele ea Sejeremane e Ileng ea Sebelisa Lebitso la Molimo
LEBITSO la Molimo, Jehova le hlaha ka makhetlo a likete Bibeleng ea Phetolelo ea Lefatše le Lecha ea Mangolo a Halalelang, e hatisitsoeng ka Sejeremane ka 1971.a Leha ho le joalo, ena e ne e se eona Bibele ea pele ea Sejeremane e ileng ea sebelisa lebitso leo la Molimo. Ho bonahala eka hoo e ka bang lilemong tse 500 tse fetileng, Bibele ea pele ea Sejeremane eo lebitso Jehova le hlahang ho eona e ile ea hatisoa ke setsebi se seng se neng se hlaheletse sa thuto ea bolumeli sa Kereke ea Roma e K’hatholike se bitsoang Johann Eck.
Johann Eck o hlahetse Jeremane ka boroa ka 1486. Ha a le lilemo li 24, e ne e le moprofesa oa thuto ea bolumeli univesithing ea Ingolstadt, ’me o ile a ba boemong boo ho fihlela lefung la hae ka 1543. Eck o phetse mehleng ea Martin Luther, ’me ka nakoana e ile ea e-ba metsoalle. Leha ho le joalo, hamorao Luther e ile ea e-ba moeta-pele oa Phetohelo Khahlanong le Lithuto Tsa K’hatholike empa Eck o ile a buella Kereke e K’hatholike.
’Musisi oa Bavaria o ile a fa Eck mosebetsi oa ho fetolela Bibele ka Sejeremane, eaba Bibele eo e hatisoa ka 1537. Ho latela Kirchliches Handlexikon, o ne a fetoletse Bibele ea hae a ipapisitse haufi-ufi le libuka tsa pele empa “ho tla fihlela joale, ha e e-s’o fuoe tlotla e e tšoanelang.” Bibele ea Eck e fetoletse Exoda 6:3 tjena: “Ke ’na Morena ea neng a hlahe ho Abrahama, ho Isaka le ho Jakobo ke le Molimo ea Matla ’Ohle, ’me lebitso la ka Adonai, ha kea ka ka ba senolela lona.” Temaneng ena Eck o ile a kenyelletsa tlhaloso ena moleng o moeling oa leqephe: “Lebitso leo ke Adonai Jehoua.” Litsebi tse ngata tsa Bibele li lumela hore e ne e le ka lekhetlo la pele lebitso la Molimo le sebelisoa Bibeleng ea Sejeremane.
Leha ho le joalo, ka lilemo tse likete batho ba ’nile ba tseba lebitso la Molimo le ho le sebelisa. Le ile la sebelisoa khale ka ho fetisisa tlalehong ea puo ea Seheberu, moo Molimo a le mong feela oa ’nete a ileng a bitsoa “Jehova.” (Deuteronoma 6:4) Hoo e ka bang lilemong tse fetileng tse 2 000, mantsoe a Jesu moo a reng o tsebahalitse lebitso la Molimo a ile a ngoloa ka puo ea Segerike. (Johanne 17:6) Ho tloha ka nako eo, lebitso leo le ’nile la hatisoa ka lipuo tse ngata, ’me haufinyane, Pesaleme ea 83:18 e tla phethahala, ha batho bohle ba tla tseba hore eo lebitso la hae e leng Jehova, ke Ea Phahameng ka ho Fetisisa holim’a lefatše lohle.
[Mongolo o botlaaseng ba leqephe]
a E hatisitsoe ke Lipaki Tsa Jehova, ’me e ile ea hatisoa ka Senyesemane ka lekhetlo la pele ka 1961. Hona joale e fumaneha e feletse kapa e sa fella ka lipuo tse ka holimo ho tse 50.
[Setšoantšo se leqepheng la 32]
Bibele ea Eck e hatisitsoeng ka 1558, e nang le mola o moeling oa leqephe e bua ka lebitso Jehova ho Exoda 6:3