Ho Etsahala’ng ka Keresemese?
LILEMONG tse leshome tse fetileng ka khoeli eona ena, sehlooho se ka holimo sa makasine ea U.S.News & World Report se ne se e-na le mantsoe a reng, “Ho Hlahloba Keresemese.” Sehlooho sena se ne se shebane haholo-holo le taba ea hore na Keresemese e ntse e “hloeka, khoebo e ntse e fokotseha ho eona.” Na seo ke sona se hlileng se etsahalang?
Sehlooho seo se ile sa fana ka mabaka a hore na ke hobane’ng ha re ke ke ra lebella seo. Se boletse hore: “Ha ho tlaleho e bontšang hore tsoalo ea Kreste e ne e ketekoa ka molao ho fihlela lekholong la bone la lilemo, ha Constantine . . . e ne e le moemphera oa Roma.” Sena se ne se bontša “hore bonyane ha ho na motho ea neng a hlile a tseba hantle hore na Jesu o tsoetsoe neng.” Sehlooho seo se ile sa lumela hore “likosepele ha li bue letho ka selemo, re se re sa bue ka ho totobatsa khoeli kapa letsatsi.” Ho ea ka setsebi sa histori Univesithing ea Texas, “Bakreste ba pele-pele ba ne ba se na thahasello le e nyenyane ea ho keteka Tsoalo ea Jesu.”
Tlas’a sehloohoana se reng “Ho Hakanya,” sehlooho seo se ile sa hlalosa “hore na ho tlile joang hore kereke e qetelle e khethile la 25 December.” Se itse: “Maikutlo ao batho ba bangata ba nang le ’ona ke a hore Saturnalia le mekete e meng ea bohetene li ile tsa ‘fetoloa [ka boomo] hore e be mekete ea Bokreste.’” “Ka ho etsa hore Keresemese e ketekoe ho ella bofelong ba December, ha batho ba ne ba se ba tloaetse ho keteka, baeta-pele ba kereke ba ile ba tiisa hore tsoalo ea Mopholosi e ketekoa ke batho ba bangata.” Bohareng ba lekholo la bo19 la lilemo, taba e khōlō e ile ea e-ba ho reka le ho fana ka limpho. “Moetlo ona o mocha oa ho fana ka limpho ka Keresemese o ile oa etsa hore ka ho panya ha leihlo barekisi ba iphumane ba kena-kene licheleteng, ’me kapele-pele barekisi le baphatlalatsi ba ile ba qala ho phatlalatsa nako eo ea selemo.”
Kahoo, hoa hlaka hore ha ho na lebaka la ho lebella hore ho tla etsahala se fapaneng ka Keresemese haese hore e suthele hōle-hōle le Bokreste bo hloekileng. Ha Keresemese ea kajeno e tsoela pele ka “khoebo e hohelang batho ba bangata,” ’nete ke hore ha ho mohla ho kileng ha lebelloa hore Bakreste ba ’nete ba keteke tsoalo ea Jesu. Ho e-na le hoo, Bibele e bua haholo ka thekollo eo Kreste a nehelaneng ka eona ha a ne a e-shoa ’me a tsosetsoa leholimong. (Matheu 20:28) Ena e tla lula e ntse e le eona ntho ea bohlokoa ka linako tsohle.