Lebokose la Lipotso

◼ Na ho loketse ho opa liatla ha ho tsebisoa hore motho o khutliselitsoe ka phuthehong?

Ka mosa oa hae o lerato, Jehova Molimo o fane ka tsela ea Mangolo ea hore mofosi ea bakileng a boele a fumane mohau oa hae le hore a khutlisetsoe ka phuthehong ea Bokreste. (Pes. 51:12, 17) Ha sena se etsahala, re khothalletsoa ho tiisa lerato la rōna ho batho ba joalo ba bakileng ka tieo.—2 Bakor. 2:6-8.

Esita le ha re thabile hakaalo ha mong ka rōna kapa motsoalle a khutlisetsoa ka phuthehong, ho lokela ho rene moea oa khutso o nang le seriti ha ho tsebisoa hore motho eo o khutliselitsoe ka phuthehong. Molula-Qhooa oa October 1, 1998, leqepheng la 17, o ile oa hlalosa litaba ka tsela ena: “Leha ho le joalo, re lokela ho hopola hore ba bangata ka phuthehong ha ba tsebe mabaka a tobileng a entseng hore motho eo a lelekoe kapa a khutlisetsoe ka phuthehong. Ho feta moo, ho ka ’na ha e-ba le ba bang ba anngoeng ka ho toba kapa ba utloisitsoeng bohloko ke phoso e entsoeng ke motho eo ea bakileng—mohlomong e bile e le ka nako e telele. Ka lebaka la ho ameha maikutlo ka litaba tse joalo, ha ho etsoa tsebiso ea hore o khutliselitsoe ka phuthehong, ka ho utloahalang re tla qoba ho etsa lipontšo tsa ho mo amohela ho fihlela re ka etsa joalo re le batho ka bomong.”

Le hoja re thabile haholo ho bona motho a khutlela ’neteng, ho opa liatla nakong eo a khutlisetsoang ka phuthehong e ke ke ea e-ba ho loketseng.