U se ke Ua Felloa ke Lerato Leo U Neng U E-na le Lona Pele
1 Jesu ea tlotlisitsoeng o ile a lemosa phutheho ea Efese ea lekholong la pele la lilemo a re: “Ke na le hona khahlanong le uena, hore u tlohetse lerato leo u neng u e-na le lona pele.” (Tšen. 2:4) Ho totobetse hore ba bangata ba ne ba feletsoe ke lerato leo ba neng ba rata Jehova ka lona pele. Ha re ne re ithuta ’nete, re ile ra rata Molimo le moahelani ka lerato le matla, ’me sena sa re susumelletsa ho bolela ka cheseho tšepo eo re neng re sa tsoa ba le eona. Ke eng e tla re thusa hore re se ke ra felloa ke lerato leo re neng re e-na le lona pele le cheseho eo re neng re e-na le eona tšebeletsong?
2 Thuto ea Botho le ho ba Teng Libokeng: Ke eng e ileng ea re susumelletsa hore re rate Molimo le moahelani ha re ne re qala ho ithuta ’nete? Na hase lintho tsohle tseo re ileng ra ithuta tsona ka Jehova ha re ntse re ithuta Mangolo? (1 Joh. 4:16, 19) Ka lebaka leo, e le hore lerato la rōna “le ka ata ka ho eketsehileng,” re tlameha ho tsoela pele ho rua tsebo e nepahetseng, ho epa “lintho tse tebileng tsa Molimo.”—Bafil. 1:9-11; 1 Bakor. 2:10.
3 Ho khomarela kemiso e ntle ea thuto ea botho e ka ba ntho e thata haholo matsatsing ana a ho qetela a tletseng matšoenyeho le litšitiso tse ngata. (2 Tim. 3:1) Re lokela ho ba le kemiso ea ho iphepa ka lijo tsa moea. Ho ba teng kamehla libokeng tsa phutheho le hona ke habohlokoa, haholo-holo ha re “bona letsatsi le ntse le atamela.”—Baheb. 10:24, 25.
4 Tšebeletso: Ho kopanela ka cheseho tšebeletsong ho re thusa ho lula re rata Molimo ka lerato leo re neng re mo rata ka lona pele. Ha re ntse re bolela litaba tse molemo, re ikhopotsa litšepiso tsa Jehova tse lerato, ’me sena se re thusa hore re lule re e-na le tšepo e tiileng le lerato le matla. Hore re rute batho ba bang linnete tsa Bibele ho hlokahala hore re etse lipatlisiso e le hore rōna ka borōna re ka li utloisisa ka ho hlakileng, ’me sena se matlafatsa tumelo ea rōna.—1 Tim. 4:15, 16.
5 Jehova o tšoaneloa ke lintho tsohle, ho akarelletsa le lerato la rōna. (Tšen. 4:11) U se ke ua lumella lerato la hao hore le tape. Boloka lerato leo u neng u e-na le lona pele le le matla ka ho khothalla ho ithuta Bibele, ka ho kopanela libokeng kamehla le ka ho chesehela ho bolella batho ba bang seo u se ratang haholo.—Bar. 10:10.