U ka Etsa’ng E le Hore U Khothalle ho Ithuta Bibele?

Na u ka rata ho etsisa Daniele ka hore u lule u tšepahala leha u hlaheloa ke mathata? Daniele o ne a khothalla ho ithuta Lentsoe la Molimo. (Dan. 9:2) Ho khothalla ho ithuta Bibele ho ka u thusa joang hore u lule u tšepahala? Ho ka u thusa hore u lule u lumela hore litšepiso tsa Jehova li tla phethahala. (Josh. 23:14) Ho ka boela ha u thusa hore u rate Molimo le ho feta e le hore u etse lintho tse nepahetseng. (Pes. 97:10) Empa u ka ithuta Bibele joang? Litlhahiso tse latelang li ka u thusa.

• Nka ithuta’ng? Ho lokisetsa liboka ke mokhoa o mong o motle oa ho ithuta. ’Malo oa Bibele oa beke le beke o ka u tsoela molemo haeba u ipha nako ea ho batlisisa ka lintho tseo u sa li utloisiseng. Hape, ba bang ba ithuta boprofeta bo ka Bibeleng, litšobotsi tse itseng tsa tholoana ea moea oa Molimo, maeto ao moapostola Pauluse a ileng a a nka ha a ne a bolela litaba tse molemo kapa ka lintho tseo Jehova a li bopileng. Haeba u ka ipotsa potso e itseng e amanang le litaba tse ka Bibeleng, u ka e ngola fatše ’me oa batlisisa karabo ea eona nakong eo u ithutang.

• Nka fumana boitsebiso hokae? Video ea Lintho Tse ka U Thusang Hore U Thabele ho Ithuta Bibele e tla u bontša hore na u ka fumana boitsebiso hokae. U ka qala ka ho batlisisa hore na libata tseo ho buuoang ka tsona ho Daniele khaolo ea 7 li emela mebuso efe e le hore u bone hore na u ka fela oa khona ho iketsetsa lipatlisiso.

• Ke lokela ho qeta nako e kae ke ithuta? U lokela ho ithuta kamehla e le hore u be le kamano e ntle le Jehova. Ha u qala, u ka qeta nako e nyane u ithuta, eaba ha nako e ntse e e-ea, oa e eketsa. Ho ithuta Bibele ho tšoana le ho rafa taemane kapa khauta. Ha u e fumane, oa thaba ’me u utloa u batla ho rafa e eketsehileng. (Liprov. 2:3-6) Le uena ha u ntse u ithuta lintho tse ncha ka Bibeleng, u tla thaba ’me u batle ho ithuta tse eketsehileng. Kahoo, u tla lula u tloaela ho ithuta Bibele kamehla.—1 Pet. 2:2.

LIBATA TSEO HO BUUOANG KA TSONA HO DANIELE KHAOLO EA 7 LI EMELA’NG?

• Dan. 7:4

• Dan. 7:5

• Dan. 7:6

• Dan. 7:7

POTSO E ’NGOE:

Daniele 7:8, 24 e ile ea phethahala joang?

BATLISISA HAPE:

Libata tseo ho buuoang ka tsona ho Tšenolo khaolo ea 13 li emela’ng?