Etsa Khotso le Mor’eno Pele—Joang?

Ak’u nahane u phela Galilea mehleng ea Jesu. Joale u nkile leeto le eang Jerusalema ho ea keteka Mokete oa Maphephe. Motse o tletse ka balumeli-’moho le uena ba tsoang libakeng tse hole. U batla ho etsetsa Jehova sehlabelo ka mpho ea hao. U qalella leeto le khathatsang u nkile poli ea hao, u tsamaea literateng tsa motse tse tletseng batho u ea tempeleng. Ha u fihla u fumana tempeleng ho tletse batho ba tl’o etsa mahlabelo. Joale e-ba nako ea hore u fane ka poli ea hao ho moprista. Hang-hang ka nako eo oa hopola hore uena le mor’eno e mong eo ho ka etsahalang hore e be o teng har’a letšoele lena kapa o kae-kae motseng, ha le utloane. Jesu oa hlalosa hore na boemong bona u lokela ho etsa’ng. (Bala Matheu 5:24.) Uena le mor’eno le ka etsa’ng ho bopa khotso joalokaha Jesu a laetse? Lethathamong la likarabo tse ka tlaase mona, tšoaea karabo e nepahetseng.

U LOKELA HO. . .

• bua le mor’eno ha feela u lumela hore o na le lebaka le utloahalang la ho utloa bohloko

• mo hlokomelisa hore o feteletsa lintho kapa u mo hlokomelise hore ha e le hantle ke eena ea phoso

• mo mamela ka hloko ha a u bolella hore na o ikutloa joang le haeba u lumela hore kannete ha u molato, u be u mo kope tšoarelo ka hore u mo utloisitse bohloko ka seo u se entseng

MOR’ENO EENA O LOKELA HO . . . 

• bolella ba bang ka phuthehong kamoo u mo khopisitseng kateng hobane a batla hore ba be ka lehlakoreng la hae

• u theola seriti, a u bolelle ntho e ’ngoe le e ’ngoe e mpe eo u mo entseng eona a be a batle hore u amohele hore u molato

• ananela kamoo u ikokobelitseng kateng le sebete sa ho tla lokisa litaba ’me a u tšoarele ka pelo eohle ea hae

Le hoja mehleng ena ha re rapela Jehova re se re sa hloke ho etsa mahlabelo a liphoofolo, thuto ea Jesu ea hore re bope khotso le barab’abo rona e ama ho amoheleha ha tšebeletso ea rona ho Jehova joang?