Temana ea Selemo ea 2013

Ka 1473 B.C.E., Baiseraele ba ne ba le malala-a-laotsoe hore ba kene Naheng e Tšepisitsoeng, empa ba tobane le lira tse matla. Molimo o ile a re ho Joshua: “E-ba sebete ’me u be matla.” Joshua o ne a tla atleha haeba a ne a ka lula a tšepahala. Ho ile ha thoe ho eena: “U se ke ua haroha letsoalo kapa ua tšoha, etsoe Jehova Molimo oa hao o na le uena kae kapa kae moo u eang teng.” Molimo o ile a fela a ba le eena, kaha le pele ho feta lilemo tse tšeletseng, Baiseraele ba ne ba se ba hlōtse lira tseo tsa bona.—Josh. 1:7-9.

Bakreste ba ’nete ba mothating oa ho kena lefatšeng le lecha le tšepisitsoeng, kahoo ba lokela ho ba sebete ’me ba be matla. Joaloka Joshua, re tobane le lira tse matla tse batlang ho senya botšepehi ba rōna. Ha re loane ka marumo le ka lisabole, empa re loana ka lihlomo tsa moea, ’me Jehova oa re koetlisa e le hore re li sebelise ka tsebo. Ho sa tsotellehe boemo leha e le bofe boo u ka ’nang ua tobana le bona, kholiseha hore haeba u le sebete, u le matla ’me u tšepahala, Jehova o tla ba le uena ’me a u thuse hore u hlōle.