Lintho Tsa Bohlokoa Boitšoarong Tse Tlisang Thabo

KE ENG seo ngoana a neng a tla se etsa haeba a tloheloa tafoleng e nang le lijo tse matlafatsang hammoho le lipompong? Haeba ho se motho ea mo eletsang, o ne a tla ikhethela seo a se ratang haholo—mohlomong lipompong—ho fihlela a kula.

Le tabeng ea boitšoaro, motho o talimane le likhetho. Ke eng seo a se batlang ka ho fetisisa? Na o batla bophelo ba lelapa bo thabileng le bokamoso bo tsitsitseng, ho sa tsotellehe liphello tsa bophelo ba letsatsi le letsatsi bo likolohang menateng? Ho sa tsotellehe seo a se khethang, khetho ea hae ke eona e tla bōpa bophelo ba hae le ho ama bokamoso ba hae—ebang ke ka tsela e mpe kapa e ntle.

Liphello

Litholoana tsa phetoho ea botona le botšehali le tokoloho e sa laoleheng ha li ea tlisa molemo oa letho. Batho ba ileng ba itšoara kamoo ba ratang kateng ba kopane le letoto la mathata a sa batloeng: malapa a qhalaneng, ho ima ho sa batloeng, lefu le bakoang ke AIDS le mafu a mang a tšoaetsanoang ka likamano tsa botona le botšehali, bophelo bo senyehileng ka baka la tšebeliso e mpe ea lithethefatsi, le liphello tse ling tse bohloko. Liphello tsena tse mpe li lumellana le tlhaloso e ngotsoeng Bibeleng ho Liproverbia 16:25: “Mohlomong ho motho tsela e ’ngoe eka e sasametse, athe phello ea eona ke lefu.”—Bona hape Ba-Galata 5:19-21.

Boithati bo jeleng setsi le tokoloho e hlokang boikarabelo li boetse li lumellana le tlhaloso e ho 2 Timothea 3:1-4 bakeng sa mehla ea rōna: “Mehleng ea qetello ho tla hlaha linako tse bohloko. Hobane batho e tla ba baithati, le ba ratang leruo, le bakaki, le baikakasi, le banyefoli, le ba sa utloeng batsoali ba bona, ba hlokang teboho le borapeli; e tla ba se nang lerato la hlaho, leha e le ho tšepeha, ba etselletsang ba bang, ba sa tsebeng ho itšoara, ba sehlōhō, ba hloeang ba molemo; e be baeki, le bahalefi, le baikhohomosi, ba ratang menate ea nama, e seng Molimo.”

Motheo o Molemo oa Boitšoaro

Sena sohle se bontša bohlokoa ba mohloli oa boitšoaro o phahametseng motho e le hore a ka tsamaea ka bohlale mehleng ena e bohloko. Jeremia, e mong oa bangoli ba Bibele, o ile a lumela sena ha a re: “Oho! Jehova, kea tseba hobane tsela ea motho ha e matleng a hae.”—Jeremia 10:23.

Empa ke mang ea ka ralang metheo ea lintho tsa bohlokoa tsa boitšoaro? Bukeng ea hae Cours de philosophie, moprofesa oa Fora Armand Cuvillier o hlalosa hore joaloka eena bafilosofi ba bangata ba nkile “motho e le motheo oa bohlokoa.” Leha ho le joalo, o re hopotsa hore melao ea boitšoaro e entsoeng ke motho e senyeha habonolo le hore e ka fetoloa hamorao le ho nkeloa sebaka ke e meng.

Hangata moetsi oa mochine ke motho ea tšoanelehang haholo hore mochine o sebetse hantle. Ho joalo ka Molimo le motho. Joaloka ’Mōpi oa motho, Jehova o boemong bo molemo ka ho fetisisa ho bontša motho lintho tsa bohlokoa tseo a lokelang ho ba le tsona, le hore na ke hobane’ng. Ka Bibeleng, Jehova o ipitsa Ea ‘re rutang ho ithuisa molemo, le Ea etsang hore re tsamaee tseleng eo re lokelang ho tsamaea ho eona.’—Esaia 48:17, NW.

Na ke Lintho tsa Bohlokoa tse Siiloeng ke Nako?

Na lintho tsa bohlokoa tsa boitšoaro tsa Bibele li ka sebelisoa mehleng ea rōna? Lilemong tse fetang 1 900 tse fetileng, moapostola Pauluse o ile a fana ka letoto la litšoaneleho tse hlokahalang bakeng sa bahlanka ba Molimo. O boletse “lerato, le thabo, le khotso, le sebete, le khauho, le molemo, le botšepehi, le bonolo, le boitšoaro.” Na litšobotsi tsena ha li sa le bohlokoa kajeno? Che! Le hoja maemo a fetohile, litšobotsi tsena tse phahametseng e sa le tsa bohloka.—Ba-Galata 5:22, 23.

Ho ka boleloa se tšoanang ka seo Bibele e se hanelang. Ka mohlala, ke hobane’ng ha Molimo o ile oa timetsa metse ea Sodoma le Gomorrha? Morutuoa Juda o hlalosa hore ke ka baka la hobane baahi ba metse eo “ba ile ba inehela boitšoarong bo bobe ba botona le botšehali le litakatsong tse mpe.” Juda o phaella ka hore timetso ea bona e sebeletsa e le “tlhokomeliso ea ka mehla.” Kaha tlaleho ena le tse ling li ‘ngoletsoe ho re ruta,’ ‘ho re hlokomelisa,’ lithuto tsa boitšoaro tse fumanehang ho tsona li sa ntse li sebetsa.—Juda 7, Phillips; Ba-Roma 15:4; 1 Ba-Korinthe 10:11.

Lintho tsa Bohlokoa tse tla u Thabisa

Hopola hore Bibele ke buka e khethehileng. E amohele “e seng joaloka hoja e le lentsoe la batho, empa la Molimo.” (1 Ba-Thessalonika 2:13) Har’a libuka tsohle tse limillione tse leng teng lefatšeng, Bibele ke eona feela ‘e bululetsoeng ke Molimo le e rutang.’ (2 Timothea 3:16) Ke eona feela e ka re nehang lintho tsa bohlokoa boitšoarong le ho bontša kamoo li ka lebisang bophelong bo sa feleng lefatšeng le lecha. Ka sebele, tsela e bohlale ke ho e hlahloba.

Ke sona seo mohlankana e mong ea bitsoang Joël a ileng a se etsa. Lilemong tse ’maloa tse fetileng, o ne a tsamaea literateng tsa motse oa habo Fora hammoho le bacha ba bang—ba hlometse. O ne a tsebahala ka hore ke motho ea halefang kapele ’me o ne a rekisa lithethefatsi le ho ba letekatse. Joël o ile a ithuta Bibele le tšepo eo e fanang ka eona, ’me hamorao o ile a fetoha ka ho feletseng, a felisa mekhoa eohle e nyatsoang ke Bibele. Metsoalle ea hae e mengata e ile ea kholiseha hore o fumane ’nete, kahoo le eona e ile ea etsa liphetoho tse potlakileng bophelong ba eona ’me ea kolobetsoa joaloka Lipaki tsa Jehova.

Ha e le hantle, batho ba bangata ba fetohang Lipaki tsa Jehova ba ne ba sa phele bophelo bo sa lumellaneng le melao-motheo ea Bibele joaloka Joël le metsoalle ea hae. Empa bohle ba fetohang Lipaki ba lumela ho nahanisisa bohlokoa ba ho laola bophelo ba bona—esita le hoja ba se babe hakaalo—’me ba kholisehile hore ba fumane tsamaiso ea lintho tsa bohlokoa tse ka ba thabisang.

Lefatšeng lohle, hoo e ba tlang e le Lipaki tse limillione tse ’nè li leka ho phela tumellanong le melao-motheo ena ka mehla, ho sa tsotellehe naha kapa mofuta oa sechaba moo li phelang teng. Li boetse li eteletsa lithahasello tsa ’Muso oa Molimo pele, ’me li neha lintho tsa bohlokoa moeeng monyetla oa pele. Ke hobane’ng ha u sa amohele memo ea tsona ho u thusa ho hlahloba melemo eo le uena u ka e fumanang linthong tsee tsa bohlokoa? “Khotso e kholo” e tšepisoa bohle ba etsang khetho ena.—Pesaleme ea 119:165; Mattheu 6:33.

[Setšoantšo se leqepheng la 9]

Batho ba hloka lintho tsa bohlokoa tse phahametseng filosofi ea motho