Tokoloho ea Bolumeli Bulgaria
Libese tse tšeletseng tse tsoang Bulgaria tse palamisitseng baeti ba fetang 300 ba tlileng Kopanong ea Setereke ea “Barati ba Tokoloho,” li ile tsa fihla mabaleng a kopano ka ntle ho Thessalonica, Greece ka Labone mantsiboea, July 11, 1991. Ka baka la ntoa ea baahi naheng ea boahisani ea Yugoslavia le morusu oo ntoa ena e o bakileng sebakeng seo, baeti bana ba ile ba hlōleha ho fumana mangolo a bona a boeti ho fihlela motsotsong oa ho qetela.
Ka Laboraro motšehare oa mantsiboea basebetsi ba lefapha la boemeli Sofia, Bulgaria ba ile ba sebetsa nako e eketsehileng bakeng sa ho lokisa mangolo a boeti. Kahoo libese li ile tsa lata baeti ba tsoang likarolong tse fapaneng tsa Bulgaria nako e sa le teng ho ba fihlisa lebaleng la kopano bosiung ba pele ho kopano e neng e tla qala ka Labohlano, July 12.
Ka nako eo, Lipaki tsa Jehova li ne li thibetsoe Bulgaria, kahoo e bile thabo e kaakang ho tsona ho thabela botsoalle ba Bokreste ka bolokolohi naheng ea boahisani ea Greece! Baeti ba tsoang Bulgaria ba ne ba lokiselitsoe holo e nang le sethala se khabisitsoeng hantle (se leng setšoantšong) lebaleng la kopano. Baeti ba ile ba thaba hakakaang hore ebe lenaneo lohle le ile la fanoa ka puo ea bona! Mokhelo feela e bile tšoantšiso ea Bibele. Puo ea metsotso e 15 e akaretsang tšoantšiso ena e ile ea fanoa ka Sebulgaria eaba baeti ba kopana le baena ba bona ba Magerike ho shebella nehelano ena.
Sehlohlolo sa kopano ea Bulgaria e bile puo ea kolobetso ka Moqebelo hoseng. Ho bile teng tlhōrō ea ba 342 ’me ha kolobetsoa ba 39 (ba bang ho bona ba bonoa ba eme mona ka holimo). Baeti ba ile ba boela ba thabela ho lokolloa ha bukana e lekanang le makasine Meea ea Bafu—Na e ka U Thusa Kapa ea U Ntša Kotsi? Na e Hlile e Teng? ka puo ea bona hammoho le Buka ea ka ea Lipale tsa Bibele.
Empa thabo e khōlō e ne e letetse baeti nakoana hoba ba khutlele ha habo bona Bulgaria. Ka July 17, nako e ka tlaase ho beke ka mor’a kopano, mosebetsi oa Lipaki tsa Jehova o ile oa lumelloa ka molao Bulgaria! Ka ho tsotehang khoeling e latelang bahoeletsi ba phutheho Bulgaria ba bile le karolelano ea lihora tse 21,2 boboleling ba tsona. Re thaba haakakang hore ebe tokoloho ea bolumeli e boetse e thabeloa hape naheng e ’ngoe ea Europe Bochabela!