Basali ba Bile le Karolo e Khōlō

KAROLO ea bohlokoa eo basali ba Bakreste ba e phethileng kahong ea lekala la Zimbabwe la Lipaki tsa Jehova, e ile ea totobatsoa lenaneong la nehelano, le neng le tšoeroe ka la 12 December, 1998. Nakong ea lilemo tse ’nè tsa morero oa kaho, baithaopi ba tsoang linaheng tse ngata—ho akarelletsa le ba makholo-kholo ba tsoang Zimbabwe—ba ile ba nehelana ka nako, matla, tsebo le matlotlo a bona ho tla haha mehaho ena e metle eo u e bonang setšoantšong mona.

U tla hlokomela hore ho na le mehaho ea bolulo e tšeletseng e lekanang ka boholo karolong e ka morao. Mohaho o moholo o haufi le eona ke oa ntlo ea ho jela, kichine le sebaka seo ho hlatsoetsoang liaparo ho sona. Mehaho ena ea bolulo e na le likamore tse 61, ’me ntlong ea ho jela ho ka lula batho ba ka bang 200. Ka pele, ho elella ka lehlakoreng le letšehali, ke mohaho oa liofisi. Bohareng ke sebaka sa kamohelo ea baeti, ’me ka lehlakoreng le letona ke sebaka sa polokelo ea thepa, moo lenaneo la nehelano le ileng la tšoareloa teng.

Mohaho ona o motle oa lekala Zimbabwe, Afrika e ka boroa, ke o mong feela har’a mehaho e mengata e joalo e qetiloeng ho tloha ha Lipaki tsa Jehova li ne li qalisa lenaneo la machaba la kaho ka November 1985. Tsoha! (ea Senyesemane) ea August 22, 1991, e ile ea hlalosa lenaneo lena sehloohong se reng, “Ho Hong ho Hocha Kahong ea Machaba.”

Mabapi le karolo ea basali lenaneong leo, Tsoha! e ile ea tlaleha: “Ba bangata ba rutiloe ho fasa marinefoso ka terata, ho kenya lithaele, hammoho le ho hohla le ho penta. Ba bang ba hlokomela mesebetsi e hlokahalang ea lapeng. Kaofela ha bona ba ile ba tlatsetsa ka tsela e ntle mosebetsing o etsoang libakeng tsa kaho lefatšeng ho pota.”

Lenaneong la nehelano la haufinyane tjena Zimbabwe, George Evans le James Paulson, ba neng ba hlokometse mosebetsi oa kaho, ba ile ba bapisa karolo eo basali ba bileng le eona kahong ea lekala la Zimbabwe le karolo eo basali ba ileng ba e phetha kahong ea tabernakele ea boholo-holo ea Iseraele. Bibele e re ka Baiseraele: “Ba tla, e mong le e mong eo pelo ea hae e ileng ea mo susumetsa, . . . ba ’na ba tla, banna hammoho le basali.”—Exoda 35:21, 22, NW.

Ba sebelisa tlaleho eo ea Bibele, Mor’abo rōna Evans le Mor’abo rōna Paulson ba ile ba totobatsa boleng ba tlatsetso eo basali ba bileng le eona. Ba ile ba qotsa tlaleho ea Bibele: “Basali bohle ba nang le lipelo tse bohlale ba ohla ka matsoho, . . . basali bohle ba ileng ba susumetsoa ke lipelo tsa bona ka bohlale.” Ka sebele, basali ba bile har’a ba ileng ba ithaopela ho itella ho etsa mosebetsi. “Monna e mong le e mong le mosali bao lipelo tsa bona li ileng tsa ba susumetsa hore ba tlise ho hong bakeng sa mosebetsi oohle oo Jehova a laetseng hore o etsoe ka Moshe ba ile ba etsa joalo.”—Exoda 35:25, 26, 29, NW.

Mabapi le mohaho oa lekala la Zimbabwe, bahlokomeli ba mosebetsi oa kaho ba ile ba re: ‘Basali ba entse mosebetsi o mong le o mong oo banna ba neng ba o etsa.’ Sena se ile sa akarelletsa ho fasa litšepe le ho khanna mechine e meholo. Mor’abo rōna Paulson o boletse hore basali ba ne ba boloka literaka tsa bona tsa konkreite le mechine e meng e meholo li phatsima, li hloekile, e leng seo a boletseng hore hangata banna ha ba na tšekamelo ea ho se etsa.

Ka sebele, re ananela basali ba likete tse ’maloa ba ileng ba kopanela le banna kahong ea lefatše ka bophara ea liofisi tsa makala le Liholo tsa ’Muso tsa Lipaki tsa Jehova!

[Setšoantšo se leqepheng la 18]

Lekala la Zimbabwe